Islamonweb

വിശുദ്ധ ഖുർആനിലെ ഏറ്റവും വലിയ സൂറത്തിന് (സൂറത്തുൽ ബഖറ - പശു) പേര് നൽകാൻ കാരണമായതും, ഇസ്‌ലാമിക ചരിത്രത്തിലെ ഏറ്റവും അത്ഭുതകരമായ ഒരു കുറ്റാന്വേഷണത്തിന് മധ്യസ്ഥത വഹിച്ചതുമായ ജീവിയാണ് 'ബനൂ ഇസ്രായീലിലെ പശു'. ഒരു മൃഗമായിട്ടുകൂടി, പ്രവാചക മുഅ്ജിസത്തിന്റെ  ഭാഗമാകാനും, മാതാപിതാക്കളെ സംരക്ഷിച്ച ഒരു മകന് അല്ലാഹു നൽകിയ വലിയ പ്രതിഫലത്തിന്റെ പ്രതീകമാകാനും കഴിഞ്ഞു എന്ന പുണ്യത്താൽ, അന്ത്യനാളിൽ സ്വർഗ്ഗത്തിൽ പ്രവേശിപ്പിക്കപ്പെടുന്ന പത്ത് സവിശേഷ ജീവികളിൽ ഈ പശുവും ഉൾകൊള്ളുന്നുണ്ട്.

ബനൂ ഇസ്രായീലിലെ വലിയൊരു ധനികൻ കൊല്ലപ്പെടുകയും, പ്രതികൾ ആരാണെന്ന് കണ്ടെത്താൻ കഴിയാതെ ജനങ്ങൾ പരസ്പരം തർക്കിക്കുകയും ചെയ്തപ്പോഴാണ് മൂസാ നബി(അ) അല്ലാഹുവിന്റെ കൽപ്പനയനുസരിച്ച് അവരോട് ഒരു പശുവിനെ അറുക്കാൻ ആവശ്യപ്പെടുന്നത്. എന്നാൽ നേരായ വഴിക്ക് കൽപ്പന അനുസരിക്കുന്നതിന് പകരം അവർ പ്രവാചകനോട് പശുവിന്റെ ലക്ഷണങ്ങളെക്കുറിച്ച് വീണ്ടും വീണ്ടും ചോദ്യങ്ങൾ ചോദിച്ച് ബുദ്ധിമുട്ടിച്ചു.

അവരുടെ കടുംപിടുത്തം കാരണം അല്ലാഹു പശുവിന്റെ ലക്ഷണങ്ങൾ കഠിനമാക്കി. വിശുദ്ധ  ഖുർആനില്‍ അത് ഇങ്ങനെ കാണാം: "അത് പ്രായം ചെന്നതോ കന്യകയോ അല്ലാത്ത നടുപ്രായമുള്ള ഒരു പശുവായിരിക്കണം. കണ്ണിന് കുളിർമ്മ നൽകുന്ന കടും മഞ്ഞ നിറമുള്ളതായിരിക്കണം ഉഴവുചാലുകൾ കീറാനോ കൃഷിക്ക് നനയ്ക്കാനോ ഉപയോഗിക്കാത്തതും യാതൊരു പുള്ളിയുമില്ലാത്തതുമായ ഒന്നായിരിക്കണം അത്." (സൂറത്തുൽ ബഖറ: 68-71)

ഇമാം ദമീരി(റ) തന്റെ ഹയാത്തുൽ ഹയവാന്‍ അൽകുബ്രായിൽ ഈ പശുവിനെ എങ്ങനെയാണ് അവർ കണ്ടെത്തിയത് എന്ന് വിവരിക്കുന്നുണ്ട്. ഈ പറയപ്പെട്ട അത്ഭുത ലക്ഷണങ്ങളുള്ള ഒരൊറ്റ പശു മാത്രമേ ആ നാട്ടിൽ ഉണ്ടായിരുന്നുള്ളൂ. അത് മാതാപിതാക്കളോട് അതീവ ബഹുമാനവും കരുണയും കാണിച്ചിരുന്ന ഒരു അനാഥ ബാലന്റെ ഉടമസ്ഥതയിലുള്ളതായിരുന്നു.

ഒരിക്കൽ ഒരു വലിയ കച്ചവടം ഉറപ്പിക്കാൻ സാധിക്കുമായിരുന്നിട്ടും, തന്റെ പിതാവ് ഉറങ്ങുന്ന കിടക്കയുടെ അടിയിലായിരുന്നു അതിന്റെ താക്കോൽ ഇരുന്നിരുന്നത് എന്നതിനാൽ പിതാവിന്റെ ഉറക്കം കെടുത്താതിരിക്കാൻ ആ മകൻ ആ കച്ചവടം വേണ്ടെന്ന് വെച്ചു. മകന്റെ ഈ വലിയ ബഹുമാനത്തിന് അല്ലാഹു നൽകിയ സമ്മാനമായിരുന്നു ഈ പശു. ബനൂ ഇസ്രായീലുകാർ ഒടുവിൽ ആ പശുവിന്റെ തൂക്കത്തിന് തുല്യമായ സ്വർണ്ണം നൽകിയാണ്" ആ മകനിൽ നിന്നും അത് വാങ്ങിയത്. അതിലൂടെ അല്ലാഹു ആ കുടുംബത്തെ വലിയ ധനികരാക്കി മാറ്റി.

പണ്ഡിതന്മാർ ഈ പശുവിന്റെ ഇറച്ചി കൊണ്ട് മരിച്ചയാളെ ജീവിപ്പിച്ച രംഗത്തെ വലിയൊരു ആത്മീയ തത്വമായിട്ടാണ് കാണുന്നത്. അല്ലാഹു കൽപ്പിച്ച പ്രകാരം ആ പശുവിനെ അറുത്തതിന് ശേഷം അതിന്റെ ഒരു കഷണം മാംസം (തുടഭാഗം അല്ലെങ്കിൽ വാല്) കൊണ്ട് മരിച്ച കിടക്കുന്ന ആളുടെ ശരീരത്തിൽ അടിക്കാൻ മൂസാ നബി(അ) ആവശ്യപ്പെട്ടു.

ചത്തുപോയ ഒരു മൃഗത്തിന്റെ മാംസം കൊണ്ട് മറ്റൊരു മനുഷ്യന്റെ മൃതശരീരത്തിൽ അടിക്കുമ്പോൾ സാധാരണ നിലയിൽ അത് കൂടുതൽ അശുദ്ധമാവുകയാണ് ചെയ്യേണ്ടത്. എന്നാൽ അല്ലാഹു അവിടെ പ്രകൃതി നിയമത്തെ മാറ്റിമറിച്ചു. ആ മാംസം തട്ടിയ നിമിഷം മരിച്ചയാൾ ജീവനോടെ എഴുന്നേറ്റിരിക്കുകയും, "എന്നെ കൊന്നത് എന്റെ ഭ്രാതൃപുത്രന്മാരാണ്" എന്ന് കൃത്യമായി വിളിച്ചുപറയുകയും ചെയ്തതിന് ശേഷം വീണ്ടും കണ്ണുകളടച്ചു. അന്ത്യനാളിൽ മനുഷ്യരെ അല്ലാഹു എങ്ങനെ ജീവിപ്പിക്കും എന്നതിന്റെ പരസ്യമായ തെളിവായിരുന്നു ആ രംഗം.

ഇമാം മാവർദി(റ) തന്റെ അൽഹാവി അൽകബീർ എന്ന ഗ്രന്ഥത്തിൽ ഈ പശുവിനെ   അതിന്റെ തോലു നിറയെ സ്വർണ്ണം നൽകി വാങ്ങിയ രംഗത്തെ മുൻനിർത്തി ഒരു ഫിഖ്ഹീ വിധി പുറത്തെടുക്കുന്നുണ്ട്: ഒരു വസ്തുവിന് വിപണിയിലുള്ള സാധാരണ വിലയേക്കാൾ എത്രയോ ഇരട്ടി അമിതവില നൽകി അത് വാങ്ങുന്നത് ഇസ്‌ലാമിക കച്ചവട നിയമപ്രകാരം (ഫിഖ്ഹുൽ മുആമലാത്) അനുവദനീയമാണ്. വാങ്ങുന്നയാൾക്ക് അതിന് പൂർണ്ണ സമ്മതമുണ്ടാവുകയും (ഇക്‌റാഹ് ഇല്ലാതിരിക്കുക) ആ വസ്തു അത്രമേൽ അപൂർവ്വ ഗുണങ്ങളുള്ളതുമാണെങ്കിൽ ആ കച്ചവടക്കരാർ ശരിയാണ്  എന്നതിന് ഫുഖഹാക്കൾ ഈ ചരിത്രം തെളിവായി ഉദ്ധരിക്കുന്നു.

അശ്അരി പണ്ഡിതന്മാരും ഭാഷാശാസ്ത്രജ്ഞരും അല്ലാഹു പ്രകൃതിയിൽ പടച്ചിട്ടുള്ള നിറങ്ങളുടെ അത്ഭുതങ്ങളെക്കുറിച്ച് ഈ ആയത്തിന്റെ വെളിച്ചത്തിൽ വിവരിക്കുന്നുണ്ട്. ഖുർആൻ പറഞ്ഞു: {അത് കാണുന്നവർക്ക് സന്തോഷം നൽകുന്ന കടും മഞ്ഞനിറമുള്ളതാണ്}.

ഇമാം റാസി(റ) തന്റെ തഫ്സീറിൽ വ്യക്തമാക്കുന്നു: പ്രകൃതിയിലെ കടും മഞ്ഞ നിറത്തിന് (Pure Yellow) മനുഷ്യന്റെ ഹൃദയങ്ങളിൽ പെട്ടെന്ന് സന്തോഷവും ആനന്ദവും മനസ്സമാധാനവും ഉണ്ടാക്കാനുള്ള ഒരു പ്രത്യേക ജൈവിക കഴിവ് അല്ലാഹു നൽകിയിട്ടുണ്ട്. മൂസാ നബി(അ) നോട് കടുത്ത വാശിയിലും ധിക്കാരത്തിലും നിന്നിരുന്ന ബനൂ ഇസ്രായീലുകാരുടെ കഠിനമായ മനസ്സിനെ ഒന്ന് തണുപ്പിക്കാനും, അവരുടെ വാശിയെ ഇല്ലാതാക്കാനുമാണ് അല്ലാഹു അവർക്ക് കാണുമ്പോൾ തന്നെ മനസ്സിൽ സന്തോഷം തോന്നുന്ന അത്രയും ഭംഗിയുള്ള മഞ്ഞപ്പശുവിനെ തിരഞ്ഞുകൊടുത്തത്.

ഇതിന്റെ മുന്‍ ഭാഗങ്ങള്‍ വായിക്കാന്‍

01.തിരുനബിയുടെ ഖസ്‍വാഅ്

https://islamonweb.net/ml/The-creatures-who-are-the-heirs-of-heaven-01-The-Prophets-Qaswa

02.സ്വാലിഹ് നബിയുടെ ഒട്ടകം

https://islamonweb.net/ml/Creatures-that-are-in-Paradise-02-The-camel-of-Prophet-Salih

03.സുലൈമാൻ നബിയുടെ ഹുദ്ഹുദ്

https://islamonweb.net/ml/Creatures-Destined-for-Paradise-3-Prophet-Sulaimans-Hoopoe

04സുലൈമാൻ നബി (അ) ൻ്റെ ഉറുമ്പ്

https://islamonweb.net/ml/Creatures-Destined-for-Paradise-4-Prophet-Sulaiman-ASs-Ant

05.ഖിഥ്മീർ: ഗുഹാവാസികളുടെ കാവൽക്കാരൻ

https://islamonweb.net/ml/Creatures-Destined-for-Paradise-05-Qitmir-The-Guardian-of-the-Cave-Dwellers

06.ഇബ്രാഹീം നബിയുടെ കാളക്കുട്ടി

https://islamonweb.net/ml/Creatures-Destined-for-Paradise-06-Prophet-Abrahams-Calf

07.ഉസൈർ നബി (അ) ൻ്റെ കഴുത

 https://islamonweb.net/ml/Creatures-Destined-for-Paradise-07-Prophet-Uzair-s-AS-Donkey

08: ഇസ്മാഈൽ നബി (അ) ന് പകരം അറുക്കപ്പെട്ട ആട്

https://islamonweb.net/ml/Creatures-Destined-for-Paradise-08-The-Ram-Sacrificed-in-Place-of-Prophet-Ismail-AS