EDITORS PICK

കൊറോണയെ പ്രതിരോധിക്കാന്‍ എല്ലായിടത്തും സാനിറ്റൈസര്‍ വ്യാപകമായി ഉപയോഗിക്കപ്പെടുന്നു. നിലവിലെ സാഹചര്യത്തില്‍ വന്‍തോതില്‍ ആള്‍കഹോള്‍ ചേര്‍ത്താണ് ഇവയില്‍ ചിലതൊക്കെ നിര്‍മ്മിക്കുന്നത് എന്ന് അറിയുന്നു. ഇത് നജസ് ആണോ? അവ ഉപയോഗിച്ചാല്‍ നിസ്കാരം ശരിയാകുമോ?

| ചോദ്യകർത്താവ് ‍   അബ്ദുല്‍ കരീം, തിരുവേഗപ്പുറ
| മറുപടി നൽകിയത് &nb
| Subject&nb sp;  എഡിറ്റര്‍

അല്ലാഹുവിന്‍റെ തിരുനാമത്തില്‍, അവനാണ് സര്‍വ്വസ്തുതിയും, മുഹമ്മദ് നബി (സ്വ)യിലും കുടുംബത്തിലും അനുചരന്മാരിലും അല്ലാഹുവിന്‍റെ സ്വലാത്തും സലാമും സദാ വര്‍ഷിക്കട്ടേ. ഏത് വ്യാധികള്‍ക്കിടയിലും ഇത്തരം വിഷയങ്ങളിലുള്ള സൂക്ഷ്മതയും ആരാധനകളുടെ സ്വീകാര്യതയില്‍ പുലര്‍ത്തുന്ന കണിശതയും പ്രത്യേകം പ്രശംസിക്കട്ടെ. അല്ലാഹു നമ്മുടെ ഇബാദതുകളെല്ലാം കുറവുകള്‍ പരിഹരിച്ച് സ്വീകരിക്കുമാറാവട്ടെ. ഇന്ന് ലഭ്യമായ സാനിറ്റൈസറുകളിലെല്ലാം ചെറുതോ വലുതോ ആയ അളവുകളില്‍ ആള്‍കഹോള്‍ അടങ്ങിയിരിക്കുന്നു എന്നത് യാഥാര്‍ത്ഥ്യമാണ്. ലഹരിയുണ്ടാക്കുന്നതെല്ലാം നജസ് ആണ് എന്ന അടിസ്ഥാന തത്വത്തില്‍നിന്നാണ് ആള്‍കഹോള്‍ നജസ് ആണ് എന്ന നിയമം പിടിക്കപ്പെടുന്നത്.  അതേസമയം, ആള്‍കഹോള്‍ പല തരത്തിലുണ്ടെന്നത് ഇവിടെ നാം മനസ്സിലാക്കേണ്ടിയിരിക്കുന്നു. ഈഥൈല്‍, മീഥൈല്‍, ഐസോപ്രോപില്‍, ബ്രൂട്ടല്‍ തുടങ്ങി ഇത് പല വിധത്തില്‍ വര്‍ഗ്ഗീകരിക്കപ്പെടുന്നുണ്ട്. ഇവയില്‍ ലഹരിയുണ്ടാക്കുന്നവയും അല്ലാത്തവയുമുണ്ട് എന്നാണ് അവയുടെ നിര്‍മ്മാണരീതിയും ചേരുവകളും നോക്കുമ്പോള്‍ മനസ്സിലാവുന്നത്. ജൈവവസ്തുക്കളില്‍നിന്നുണ്ടാക്കുന്നവ ലഹരിക്ക് കാരണമാവുന്നവയാണെന്നും വ്യാവസായികാവശ്യങ്ങള്‍ക്കായി പെട്രോളിയം ഉല്‍പന്നങ്ങളില്‍നിന്നും മറ്റും രാസപ്രവര്‍ത്തനങ്ങളിലൂടെ നിര്‍മ്മിക്കപ്പെടുന്നവയില്‍ ലഹരി ഉണ്ടാക്കത്തവയുമുണ്ടെന്നും മനസ്സിലാവുന്നു.   സാനിറ്റൈസര്‍, സ്പ്രേ തുടങ്ങിയവയിലെല്ലാം രണ്ട് തരത്തിലുള്ളതും ഉപയോഗിക്കപ്പെടാറുണ്ട്. അത് കൊണ്ട് തന്നെ, നാം ഉപയോഗിക്കുന്ന സാനിറ്റൈസറിന്റെ ചേരുവകള്‍ നോക്കുകയാണ് ആദ്യം ചെയ്യേണ്ടത്. ലഹരിയുണ്ടാക്കാത്തതാണ് ചേര്‍ത്തിട്ടുള്ളതെങ്കില്‍ അത് ശുദ്ധമാണെന്നും ലഹരി ഉണ്ടാക്കുന്ന തരത്തിലുള്ളതാണെന്ന് ബോധ്യപ്പെട്ടാല്‍ അവ മുതനജ്ജിസ് ആവുമെന്നും പ്രത്യേകം പറയേണ്ടതില്ലല്ലോ.  ചേരുവകള്‍ വ്യക്തമായി പറയപ്പെടാത്തവയോ അറിയപ്പെടാത്തവയോ ആണെങ്കില്‍, അത് സംശയത്തിന്റെ പരിധിയിലാണെന്നതിനാലും കൂടുതല്‍ സാധ്യത ഇന്‍ഡസ്ട്രിയല്‍ ആള്‍കഹോള്‍ ആവാനാണെന്നതിനാലും, നജസ് ആണെന്ന് പറയാവതല്ല, ഉറപ്പാവുന്ന പക്ഷം മാത്രമേ ഒരു സാധനത്തെ കുറിച്ച് നജസ് ആണെന്ന് വിധിക്കാനൊക്കൂ.  മേല്‍ പറഞ്ഞവയുടെ വെളിച്ചത്തില്‍, സാനിറ്റൈസര്‍ ഉപയോഗത്തെകുറിച്ചും  ശേഷമുള്ള നിസ്കാരത്തെ കുറിച്ചും ഇങ്ങനെ പറയാവുന്നതാണ്. 1. നജസ് അല്ലാത്ത ആള്‍കഹോള്‍ ഉപയോഗിച്ചുണ്ടാക്കിയതാണെങ്കില്‍, (ഐസോപ്രോപില്‍, ബ്രൂട്ടല്‍ തുടങ്ങിയവയൊക്കെ ഈ ഗണത്തിലാണ് വരുന്നതെന്നാണ് വിദഗ്ധര്‍ പറയുന്നത്) അത് ഉപയോഗിക്കാവുന്നതാണ്, അത് നിസ്കാരത്തെ ബാധിക്കുകയുമില്ല. 2. നജസ് ആയ ആള്‍കഹോള്‍ ഉപയോഗിച്ചുണ്ടാക്കിയതാണെങ്കില്‍, ആവശ്യത്തിനല്ലാതെ അത് ഉപയോഗിക്കാവതല്ല, ഉപയോഗിക്കുന്ന പക്ഷം, നിസ്കാരത്തിന് മുമ്പായി അത് കഴുകി വൃത്തിയാക്കേണ്ടതാണ്.  3. നജസ് ആണോ അല്ലേ എന്ന് ഉറപ്പില്ലാത്ത വിധമാണെങ്കില്‍, അത് ഉപയോഗിക്കുന്നതില്‍ തെറ്റുണ്ടെന്നോ അങ്ങനെ നടത്തുന്ന നിസ്കാരം അസാധുവാണെന്നോ പറയാവതല്ല. നജസ് ആണോ എന്ന ധാരണക്ക് ശക്തിയുണ്ടെങ്കില്‍ പോലും, ഉറപ്പ് ആവാത്തിടത്തോളം അത്തരം വസ്തുക്കള്‍ ഉപയോഗിക്കുന്നതില്‍ തെറ്റില്ലെന്ന് ഫത്ഹുല്‍മുഈന്‍ അടക്കമുള്ള ഗ്രന്ഥങ്ങള്‍ വ്യക്തമായി പറയുന്നുണ്ട്. കൂടുതല്‍ അറിയാനും അത് അനുസരിച്ച് പ്രവര്‍ത്തിക്കാനും അല്ലാഹു തൌഫീഖ് പ്രദാനം ചെയ്യട്ടേ.

FEATURED QUESTION

എന്റെ ഉമ്മാക്ക് എന്നെ ഭയങ്കര ദേഷ്യമാണ് പ്രത്യേകിച്ച് ഒരു കാരണവും ഇല്ല മറ്റു മക്കളോട് ഒന്നും കുഴപ്പമില്ല ഉമ്മാക്ക്ഹിസ്റ്റീരിയ എന്ന മാനസിക പ്രശ്നം ഉണ്ട് ഉമ്മ. എന്നോട് പലപ്പോഴും കാരണമില്ലാതെ വഴക്ക് ഉണ്ടാക്കും. ആവശ്യമില്ലാതെ ഒരുപാട് ശപിക്കും വഴക്ക് സഹിക്കാതെ ആവുമ്പോൾ ഞാൻ തിരിച്ചു പറയാറുണ്ട്. അടുത്ത കാലത്ത് ഒരുപ്രശ്നം ഉണ്ടായപ്പോൾ ഉമ്മയോട് മിണ്ടാൻ വരണ്ട എന്ന് ഉമ്മ പറഞ്ഞു. ഇപ്പോൾ ഉമ്മ എന്നോട് മിണ്ടുന്നില്ല എനിക്ക് ഉമ്മയോട് ഒരു വെറുപ്പുമില്ല എനിക്ക് മിണ്ടാൻ താല്പര്യമുണ്ട് ഞാൻ എന്താണ് ചെയ്യുക? മാനസിക പ്രശ്നമുള്ള ഉമ്മയുടെ ശാപം അല്ലാഹു സ്വീകരിക്കുമോ?

| ചോദ്യകർത്താവ് ‍   Junaid kk
| മറുപടി നൽകിയത്    എസ് വി മുഹമ്മദലി (MA, BEd, MSc Psychology)

അല്ലാഹുവിന്റെ തിരുനാമത്തില്‍, അവനാണ് സര്‍വ്വ സ്തുതിയും. മുഹമ്മദ് നബി (സ്വ) യിലും കുടുംബത്തിലും അനുചരന്‍മാരിലും അല്ലാഹുവിന്റെ സ്വലാതും സലാമും സദാ വര്‍ഷിക്കട്ടെ. ആദ്യമായി ഉമ്മയുടെ പൊരുത്തം കിട്ടാതെ പോവുമോ എന്ന് ആശങ്കപ്പെടുകയും ഉമ്മയുമായി നല്ല ബന്ധം വേണമെന്ന് ആത്മാര്‍ത്ഥമായി ആഗ്രഹിക്കുകയും ചെയ്യുന്ന ആ മനസ്സിനെ പ്രത്യേകം പ്രശംസിക്കട്ടെ. ഉമ്മയുമായുള്ള നിലവിലെ സാഹചര്യം നന്നാക്കിയെടുക്കാന്‍ ഏറ്റവും സഹായകമാവുന്ന രണ്ട് ഘടകങ്ങളാണ് അവ. ഉമ്മാക്ക് ഹിസ്റ്റീരിയയാണെന്ന് സഹോദരൻ  തന്നെ പറഞ്ഞുവല്ലോ. അത് വൈദ്യശാസ്ത്രപരമായി തന്നെ തെളിയിക്കപ്പെട്ടതാണെങ്കില്‍, ആ ഉമ്മയുടെ മാനസികാവസ്ഥയെ മനസ്സിലാക്കുകയാണ് ആദ്യമായി വേണ്ടത്. ഹിസ്റ്റീരിയ എന്നത് ഒരു കൂട്ടം അസുഖങ്ങള്‍ ചേര്‍ന്നതാണ് എന്ന് പറയുന്നതാവും ശരി. അസ്വസ്ഥത, ദേഷ്യം തുടങ്ങിയ നിലയില്ലാത്ത മാനസികാവസ്ഥയിലൂടെയാണ് ഹിസ്റ്റീരിയ രോഗികള്‍ സഞ്ചരിച്ചുകൊണ്ടിരിക്കുന്നത്. വളരെ പ്രയാസകരമായ അവരുടെ ആ അവസ്ഥയെ നാം തിരിച്ചറിഞ്ഞാല്‍ തന്നെ, അവരുടെ ഏത് പെരുമാറ്റത്തിലും നമുക്ക് അവരോട് സഹതാപമേ തോന്നൂ. മാതാപിതാക്കളാവുമ്പോള്‍ അത് കൂടുതല്‍ കൂടുതല്‍ സ്നേഹമായി മാറുകയാണ് വേണ്ടത്. എട്ടും പൊട്ടും തിരിയാത്ത ചെറുപ്പകാലത്ത് നമ്മുടെ എല്ലാ ദുശ്ശീലങ്ങളും ആസ്വദിച്ചവരാണല്ലോ അവര്‍. ഇപ്പോള്‍ ഉമ്മ അത്തരം അവസ്ഥയിലേക്കെത്തുമ്പോള്‍, അവരുടെ മാനസികാവസ്ഥയിലേക്ക് ഇറങ്ങിച്ചെല്ലുകയാണ് നാം വേണ്ടത്. അങ്ങനെ ചെയ്യാനായാല്‍, അവരോട് ഒരിക്കലും തര്‍ക്കിക്കാനോ മറുവാക്കുകളോ പറയാനോ നമുക്കാവില്ല, മറിച്ച് അവരുടെ ഏത് സ്വഭാവവും സ്വീകരിക്കാനും അവയൊക്കെ ആസ്വദിക്കാനും നമുക്ക് കഴിയുകയും ചെയ്യും, തീര്‍ച്ച. അതോടൊപ്പം മക്കളും മാതാപിതാക്കളും തമ്മിലുള്ള വയസ്സിന്റെ വ്യത്യാസവും (ജനറേഷന്‍ ഗാപ്) പ്രധാനമാണ്. അവര്‍ പറയുന്നത് ശരിയാണെന്ന്, അവരുടെ പ്രായത്തിലെത്തുമ്പോഴേ അധികപേര്‍ക്കും മനസ്സിലാകൂ. അത് നേരത്തെ തിരിച്ചറിയാന്‍ കഴിയുന്നവരാണ് യഥാര്‍ത്ഥ ബുദ്ധിമാന്മാര്‍. ഇനി ഉമ്മ നിങ്ങളോട്  മാത്രം എന്ത് കൊണ്ട് മിണ്ടുന്നില്ല എന്നതാണ്. കേട്ടിടത്തോളം മനസ്സിലാകുന്നത്, അസുഖം കാരണം അനിയന്ത്രിതമായി ഉണ്ടാവുന്ന ദേഷ്യവും അസ്വസ്ഥതയുമെല്ലാം അനുഭവിക്കുന്ന ഉമ്മാക്ക്, മകളില്‍ നിന്ന് ലഭിക്കേണ്ട അനുഭാവപൂര്‍ണ്ണമായ പരിഗണന (എംപതറ്റിക് സപ്പോര്ട്ട്) വേണ്ടവിധം കിട്ടുന്നില്ലെന്നാണ്. അങ്ങനെ വരുമ്പോള്‍, അത്തരക്കാര്‍ അവരോട് സംസാരിക്കുമ്പോള്‍ അവരുടെ അസ്വസ്ഥത വര്‍ദ്ധിക്കുകയേ ഉള്ളൂ, അത് കൊണ്ടായിരിക്കും എന്നോട് നീ സംസാരിക്കേണ്ട എന്ന് വരെ പറയുന്നത്. അത് കൊണ്ട് ഇതുവരെ സംഭവിച്ചുപോയതില്‍ ആശങ്കപ്പെടാതെ, അവയെല്ലാം പോസിറ്റീവ് ആയി എടുത്ത് ഉമ്മയെ ഒരിക്കലും, ഛെ എന്ന വാക്ക് പോലും പറയാതെ സന്തോഷത്തോടെ ചേര്‍ത്ത് പിടിക്കുക. സംസാരിക്കാന്‍ പറ്റുന്ന സമയവും സന്ദര്‍ഭവും നോക്കി പരമാവധി അടുത്ത് കൂടി, ഉമ്മ പറയുന്നതെല്ലാം ശരിയാണെന്ന് സമ്മതിച്ചുകൊണ്ട് തന്നെ ഉമ്മയോട് കൂടുതല്‍ സംസാരിക്കുകയും അതിലേറെ ഉമ്മയെ കേള്‍ക്കുകയും ചെയ്യുക. നീ എന്നോട് സംസാരിക്കേണ്ടെന്നോ എന്റെ അടുത്തേക്ക് വരേണ്ടെന്നോ പറഞ്ഞാല്‍ പോലും അതെല്ലാം സ്ഥിരബുദ്ധിയില്ലാതെ നിഷ്കളങ്കമായി പറയുന്നതായി എടുത്ത് പുഞ്ചിരിച്ചുകൊണ്ടും സന്തോഷത്തോടെയും ഉമ്മാക്ക് സേവനം ചെയ്യുക. സഹോദരന് ഉമ്മയോട് മനസ്സില്‍ അല്‍പം പോലും വെറുപ്പില്ലെന്നതും ഉമ്മയുമായി നല്ല ബന്ധം ആഗ്രഹിക്കുന്നുവെന്നതും വളരെ പോസിറ്റീവ് ആയ കാര്യങ്ങളാണ്. അതിനാല്‍, ഉമ്മയോട് അടുക്കാന്‍ കിട്ടുന്ന അവസരങ്ങളെല്ലാം പരമാവധി പ്രയോജനപ്പെടുത്തുക, ക്രമേണ ഉമ്മ ഇഷ്ടപ്പെടാതിരിക്കില്ല. അങ്ങനെ ഉമ്മ താങ്കളെ ഇഷ്ടപ്പെടുന്ന സാഹചര്യമുണ്ടായിക്കഴിഞ്ഞാലും അതേ സ്വഭാവം തന്നെ തുടരുക, ഉമ്മ മാറണമെന്ന് ആഗ്രഹിക്കുന്നതില്‍ ഒരര്‍ത്ഥവുമില്ല, കാരണം ഉമ്മ അസുഖ ബാധിയതാണ്. അസുഖമൊന്നുമില്ലാത്ത നാം ആണ് മാറേണ്ടത്. ഉമ്മാക്ക് വേണ്ടി ഇങ്ങനെ എല്ലാം ചെയ്യാനായാല്‍ തീര്‍ച്ചയായും ജീവിതം കൊണ്ട് നേടാവുന്ന ഏറ്റവും വലിയ കാര്യമാവും അത്. അതോടെ, ഉമ്മാന്റെ പൊരുത്തമുണ്ടാവും, അല്ലാഹുവിന്റെയും, തീര്‍ച്ച.

ASK YOUR QUESTION

ചോദ്യങ്ങള്‍ പരമാവധി വ്യക്തമായി എഴുതുകയും മലയാളത്തില്‍ ടൈപ്പ് ചെയ്യുകയും ചെയ്യുക. മംഗ്ലീഷില്‍ എഴുതുന്നത് ഒഴിവാക്കുക . അക്ഷരത്തെറ്റുകള്‍ ഒഴിവാക്കാന്‍ ശ്രദ്ധിക്കുക. ഒന്നിലധികം ചോദ്യങ്ങള്‍ ഒന്നിച്ചു ചോദിക്കുന്നത് ഒഴിവാക്കുക.

കൌണ്‍സിലിംഗ്

എന്റെ ഭർത്താവിന്റെ വീട്ടിൽ വാപ്പ, ഉമ്മ, 2 സഹോദരങ്ങൾ (age. 24, 21)ആണുള്ളത്. സാമ്പത്തികമായി വളരെ പിന്നിൽ നിന്നിരുന്ന വീട്ടിൽ എന്റെ ഭർത്താവ് 10 ലക്ഷത്തോളം രൂപ വീടു പണിക്കും മറ്റു ആവിശ്യങ്ങൾക്കുമായി നൽകിയിട്ടുണ്ട്. വീട്ടു കാര്യo, മറ്റു ഉത്തരവാദിത്തങ്ങൾ എന്നിവ വാപ്പ നോക്കാത്തത് കൊണ്ട് ഉമ്മ യാണ് വീട്ടിലെ കാര്യങ്ങൾ നോക്കി വരുന്നത്.ഉമ്മ വീട്ടിലെ ചിലവ്, മറ്റു ആവശങ്ങൾ എന്നിവക്കായി എന്റെ ഭർത്താവിനോട് ഇപ്പോഴും പണം ആവശപ്പെടുന്നു. വീട്ടിൽ 3ആൾ (വാപ്പ, 2സഹോദരങ്ങൾ ) പണിക് പോകുന്നതിന്നാലും അവര്ക് പടച്ചോന്റെ സഹായത്താൽ മറ്റു കടങ്ങളോ ബാധ്യത കളോ ഇല്ലാത്തതിനാലും, വീട്ടിലെ റൂം, മറ്റു സൗകര്യം കുറവുകൾ, സഹോദരന്റെ വിവാഹം, എന്നിവ കൊണ്ടും ഞങ്ങൾ ഉടൻ തന്നെ അവിടെ നിന്നും മാറേണ്ടത് കൊണ്ടും ഞാൻ ഭർത്താവിനോട് ഇനി അവര്ക് പണം നൽകുന്നതിന് പകരം നമ്മുക്കായി എന്തെങ്കിലു മാറ്റി വെക്കാൻ പറയുന്നതിൽ തെറ്റ് ഉണ്ടോ? എന്റെ ഭർത്താവ് അവര്ക് പണം കൊടുക്കാൻ താല്പര്യം പെടുന്നു. ഞങ്ങൾക്കായി മാറ്റി വെക്കാൻ താല്പര്യമില്ല.. ഞാൻ വളരെ വിഷമത്തിലാണ്. ഒരു പരിഹാരം പറഞ്ഞു തരുമോ

MOST POPULAR QUESTIONS
NEW QUESTIONS