Islamonweb

അല്ലാഹുവിന്റെ തിരുനാമത്തില്‍, അവനാണ് സര്‍വ്വസ്തുതിയും, പ്രവാചകരുടെയും കുടുംബത്തിന്റെയും മേല്‍ അല്ലാഹുവിന്റെ അനുഗ്രങ്ങള്‍ വര്‍ഷിച്ചുകൊണ്ടിരിക്കട്ടെ. ജിന്നുകള്‍ എന്നത് അല്ലാഹുവിന്‍റെ പ്രത്യേക സൃഷ്ടികളാണ്. തീകൊണ്ട് സൃഷ്ടിക്കപ്പെട്ടവരാണെന്നതിനാലും ഇഷ്ടമുള്ള ഏത് രൂപവും സ്വീകരിക്കാന്‍ കഴിയുന്നവരാണെന്നതിനാലും മനുഷ്യനുള്ള പല പരിമിതികളും അവക്കില്ല. ദൂരദിക്കുകളിലേക്ക് നിമിഷനേരം കൊണ്ട് എത്തിപ്പെടാനും ഭാരിച്ച ജോലികള്‍ ചെയ്യുവാനുമൊക്കെ അവക്ക് സാധിക്കും. സുലൈമാന്‍ നബി (അ)മിന് ജിന്നുകളെ അല്ലാഹു കീഴ്പ്പെടുത്തിക്കൊടുത്തത് അവയുടെ കഴിവുകള്‍ അദ്ദേഹം പലപ്പോഴും ഉപയോഗപ്പെടുത്തിയതും ഖുര്‍ആനില്‍ തന്നെ കാണാമല്ലോ. ചുരുക്കത്തില്‍ അല്ലാഹുവിന്‍റെ സൃഷ്ടികളെന്ന നിലയില്‍ അല്ലാഹു അവക്ക് നല്‍കിയ കഴിവുകളുപയോഗിച്ച് അവക്ക് ആരെയും സഹായിക്കാവുന്നതാണ്. ആ സഹായങ്ങളൊക്കെ അവ നല്‍കുന്ന പക്ഷം, മനുഷ്യന് ലഭിക്കാവുന്നതുമാണ്. കൂടുതല്‍ അറിയാനും അത് അനുസരിച്ച് പ്രവര്‍ത്തിക്കാനും നാഥന്‍ തുണക്കട്ടെ.