Islamonweb

അല്ലാഹുവിന്റെ തിരുനാമത്തില്‍, അവന് ആണ്  സര്‍വ്വ സ്തുതിയും, പ്രവാചകരുടെയും കുടുംബത്തിന്റെയും മേല്‍ അല്ലാഹുവിന്റെ അനുഗ്രങ്ങള്‍ വര്‍ഷിച്ചുകൊണ്ടിരിക്കട്ടെ

ഇസ്‌ലാമിൽ അഞ്ചു സമയത്തെ നമസ്കാരങ്ങൾ അതതിന്‍റെ നിശ്ചിത സമയങ്ങളിൽ തന്നെ നിർവ്വഹിക്കൽ നിർബന്ധമാണ്. എന്നതിനാൽ മനഃപൂർവ്വം അത് സമയത്തുനിന്ന് പിന്തിക്കുകയോ ഒഴുവാക്കുകയോ ചെയ്യുന്നത് വലിയ തെറ്റാണ്. എങ്കിലും ജോലി തിരക്കുകൾ കാരണം അസർ നമസ്കാരം നഷ്ടപ്പെടുന്ന അവസ്ഥയ്ക്ക് ഇസ്ലാം ചില പരിഹാരങ്ങളും നിർദ്ദേശങ്ങളും നൽകുന്നുണ്ട്.

അതിൽ ആദ്യത്തേത് വളരെ കുറഞ്ഞ സമയം മാത്രം ആവശ്യമുള്ള അസർ നമസ്കാരം സ്കൂൾ അധികൃതരുമായി സംസാരിച്ച് ചെറിയൊരു ഇടവേളയോ സൗകര്യമോ കണ്ടെത്തി ജോലിസ്ഥലത്ത് വെച്ച് തന്നെ സമയത്ത് നിർവ്വഹിക്കാൻ പരമാവധി ശ്രമിക്കുക എന്നതാണ്. എന്നാൽ അതിന് ഒട്ടും സാഹചര്യമില്ലാത്ത കടുത്ത പ്രയാസങ്ങളോ അടിയന്തര സാഹചര്യങ്ങളോ ഉണ്ടാകുമ്പോൾ, യാത്രയിലല്ലെങ്കിൽ പോലും പതിവാക്കാത്ത രീതിയിൽ ളുഹറും അസറും ഒന്നിച്ച് ളുഹ്റിന്‍റെ സമയത്ത് വെച്ച് തന്നെ നിർവ്വഹിക്കാൻ (ജംഉൽ ഹാജത്) ചില  പണ്ഡിതന്മാർ അനുവാദം നൽകുന്നുണ്ട്.

ഇത് ചെയ്യുമ്പോൾ ളുഹർ നമസ്കരിക്കാൻ തുടങ്ങുമ്പോൾ തന്നെ അസറും ഇതോടൊപ്പം മുൻകൂട്ടി നിസ്കരിക്കുന്നു എന്ന നിയ്യത്ത് മനസ്സിൽ ഉണ്ടാകണമെന്നും, ളുഹർ നിസ്കരിച്ച് കഴിഞ്ഞയുടനെ അധികം താമസമില്ലാതെ അസർ നിസ്കരിക്കണമെന്നും നിബന്ധനയുണ്ട്. മറ്റൊരു മാർഗ്ഗവുമില്ലാത്ത അവസ്ഥയിൽ മാത്രം ഉപയോഗിക്കേണ്ട ഈ ഇളവ് ഒരിക്കലും ഒരു സ്ഥിരം പതിവാക്കി മാറ്റരുത്.

ഇനി മേൽപ്പറഞ്ഞ ഒരു മാർഗ്ഗവും സാധിക്കാതെ വരികയും നമസ്കാര സമയം പൂർണ്ണമായും കഴിഞ്ഞുപോവുകയും ചെയ്താൽ, പിന്നീട് എത്രയും പെട്ടെന്ന് അത് ഖളാഅ് വീട്ടൽ (മുടങ്ങിയ നമസ്കാരം പകരമായി നിസ്കരിക്കൽ) നിർബന്ധമാണ്; എന്നാൽ ഒരു കാരണവുമില്ലാതെ മനഃപൂർവ്വം നമസ്കാരം ഖളാഅ് ആക്കുന്നത് കുറ്റകരവുമാണ്. നമസ്കാരം കൃത്യമായി നിർവഹിക്കികന്നവരുടെ കൂട്ടത്തിൽ നാഥൻ നമ്മെ ഉൾപ്പെടുത്തട്ടെ.ഒപ്പം, ഈമാനോടെ ജീവിക്കാനും ഈമാനോടെ മരിക്കാനും തുണക്കട്ടെ.