Islamonweb

അല്ലാഹുവിന്റെ തിരുനാമത്തില്‍, അവനാണ് സര്‍വ്വസ്തുതിയും, പ്രവാചകരുടെയും കുടുംബത്തിന്റെയും മേല്‍ അല്ലാഹുവിന്റെ അനുഗ്രഹങ്ങള്‍ വര്‍ഷിച്ചുകൊണ്ടിരിക്കട്ടെ. വസവാസ് എന്നത് ഇന്ന് പലരും ബുദ്ധിമുട്ടുന്ന ഒരു കാര്യമാണ്. ഇബാദതുകളിലെ അമിതമായ കണിശതയാണ് പലരെയും ഇതിലേക്ക് എത്തിക്കുന്നത്. പലപ്പോഴും അത്, ആരാധനകള്‍ പിഴപ്പിക്കാനുള്ള പിശാചിന്റെ ശ്രമത്തിന്റെ ഭാഗവുമാണ്. അതില്‍നിന്ന് അല്ലാഹുവിനോട് കാവല്‍ തേടുകയും മനസ്സുറപ്പിച്ച് ആരാധനകളില്‍ പ്രവേശിക്കുകയും ചെയ്യുക. നിസ്കാരത്തിന് മുമ്പായി അഊദുബില്ലാഹി മിനശൈത്വാനിറജീം എന്ന് മനസ്സറിഞ്ഞ് അല്ലാഹുവിനോട് കാവലിനെ ചോദിക്കുക. എല്ലാ അക്ഷരങ്ങളും ശരിയാംവിധം മൊഴിഞ്ഞെന്നും കരുത്ത് മനസ്സിലുണ്ടായെന്നും ഉറപ്പാക്കി നിസ്കാരത്തില്‍ പ്രവേശിക്കുകയും പിന്നീടുണ്ടാകുന്ന അത്തരം ചിന്തകള്‍ക്ക് ചെവികൊടുക്കാതിരിക്കുകയും ചെയ്യുക. നബി (സ) പറയുന്നു, അല്ലാഹു എന്‍റെ സമുദായത്തിന് അവരുടെ മനസ്സ സൃഷ്ടിക്കുന്ന സംശയവും (വസവാസ്) മനസ്സിന്‍റെ സംസാരവും അവരത് കൊണ്ട് സംസാരിക്കുകയോ പ്രവര്‍ത്തികുകയോ ചെയ്യാത്തിടത്തോളം വിട്ടുവീഴ്ച ചെയ്തിരിക്കുന്നു (ബുഖാരി, മുസ്‌ലിം). വിശ്വാസികളെ വഴിതെറ്റിക്കാന്‍ പിശാച് ശ്രമിച്ചുകൊണ്ടേയിരിക്കും. അതിന് പല മാര്‍ഗങ്ങളും സ്വീകരിക്കും. അതില്‍ പെട്ടതാണ് ഇത്തരത്തില്‍ മനസ്സില്‍ സംശയം ജനിപ്പിക്കുകയെന്നത്. വിശ്വാസത്തിലും കര്‍മ്മകാര്യങ്ങളിലും ഇത് സംഭവിക്കാം. വിസ്വാസകാര്യങ്ങളില്‍ പിഴപ്പിക്കാന്‍ സാധിക്കാത്തവരെ പിശാച് കര്‍മ്മകാര്യങ്ങളില്‍ പിഴപ്പിച്ച് കൊണ്ടിരിക്കുമെന്ന് പണ്ഡിതര്‍ പറയുന്നുണ്ട്. ആരാധനാകര്‍മ്മങ്ങളില്‍ കൂടുതല്‍ ശ്രദ്ധ പുലര്‍ത്തണമെന്ന നല്ല ചിന്തയിലൂടെയാണ് പിശാച് പലപ്പോഴും ഇത്തരാക്കാരിലേക്ക് പ്രവേശിക്കുന്നത്. അതിന്റെ ഭാഗമായി ശരിയായോ എന്ന് ഉറപ്പിക്കാനായി വീണ്ടും വീണ്ടും ആവര്‍ത്തിച്ചുപറയുകയും അവസാനം തെറ്റായ പദം ഉച്ചരിക്കുന്ന അവസ്ഥയിലേക്ക് വരെ കാര്യങ്ങള്‍ എത്തിക്കുന്നു. ഇത്തരം സാഹചര്യങ്ങളില്‍ ഓരോന്നിലും അത് ചെയ്യുന്ന സമയത്ത് മാത്രം ശ്രദ്ധിക്കുകയും അത് കഴിഞ്ഞാല്‍ പിന്നെ ആ ഭാഗത്തേക്ക് ചിന്തിക്കാതിരിക്കുകയും ചെയ്യുക. നിയ്യത് വെക്കുമ്പോള്‍ അത് ശരിയായിട്ടുണ്ടെന്ന് ഉറപ്പുവരുത്തുക, അത് കഴിഞ്ഞ് തക്ബീര്‍ ചൊല്ലിക്കഴിഞ്ഞാല്‍ പിന്നെ നിയ്യതിനെ കുറിച്ച് ചിന്തിക്കാതിരിക്കുക. പിന്നീടുണ്ടാവുന്ന സംശയ ചിന്തകള്‍ അവഗണിച്ചു തള്ളുകയും അത്തരം കാര്യങ്ങള്‍ക്ക്‌ കൂടുതല്‍ ശ്രദ്ധ  കൊടുക്കാതിരിക്കുകയും ചെയ്യുക. അതോടൊപ്പം അല്ലാഹുവിനോട് പിശാചില്‍ നിന്നും കാവല്‍ ചോദിക്കുകയും ദൈവിക സ്മരണ(ദിക്റ്) യിലേക്ക് മുന്നിട്ടിറങ്ങുകയും അത് വര്‍ദ്ധിപ്പിക്കുയും ചെയ്യുന്നത് ഇത്തരം വസവാസുകള്‍ തടയുന്നതിനുള്ള ഏറ്റവും നല്ല ചികത്സയാണെന്നു ഇമാം നവവി തന്റെ അദ്കാര്‍ എന്ന ഗ്രന്ഥത്തില്‍ രേഖപ്പെടുത്തുന്നു. സൂറത്തുന്നാസ് പതിവാക്കുന്നതും വസവാസില്‍ നിന്ന് രക്ഷ നേടാന്‍ ഏറെ സഹായകമാണ്. നബി (സ) പറയുന്നു, അല്ലാഹു എന്‍റെ സമുദായത്തിന് അവരുടെ മനസ്സ് സൃഷ്ടിക്കുന്ന സംശയവും (വസവാസ്) മനസ്സിന്റെ സംസാരവും അവരത് കൊണ്ട് സംസാരിക്കുകയോ പ്രവര്‍ത്തികുകയോ ചെയ്യാത്തിടത്തോളം വിട്ടുവീഴ്ച ചെയ്തിരിക്കുന്നു (ബുഖാരി, മുസ്‌ലിം). വസവാസ് ഉണ്ടാക്കുന്ന പിശാചില്‍നിന്ന് അല്ലാഹു നമ്മെ രക്ഷിക്കട്ടെ.  യഥാര്‍ത്ഥ രൂപത്തില്‍ ആരാധനകള്‍ നിര്‍വ്വഹിക്കാനും അവ സ്വീകാര്യമാവാനും തൌഫീഖ് ലഭിക്കട്ടെ.