Islamonweb

ഓരോ വർഷവും ദശലക്ഷക്കണക്കിന് പുതിയ കാൻസർ കേസുകളാണ് ലോക തലത്തില്‍ റിപ്പോർട്ട് ചെയ്യപ്പെടുന്നത്. 2022-ൽ, ഏകദേശം 20 ദശലക്ഷം പുതിയ കാൻസർ കേസുകൾ റിപ്പോർട്ട് ചെയ്യപ്പെടുകയും ഏകദേശം 9.7 ദശലക്ഷം പേര്‍ ഈ രോഗം കാരണം മരണത്തിന് കീഴടങ്ങുകയും ചെയ്തുവെന്നാണ് കണക്കുകള്‍. 

കാൻസർ രോഗത്തെ പ്രതിരോധിക്കാനായി പല പദ്ധതികളും പല രാജ്യങ്ങളും ആവിഷ്കരിച്ച് നടപ്പിലാക്കുന്നുണ്ടെങ്കിലും ഇന്നും ഏറെ ഭീകരമായ രോഗമായി തന്നെ തുടരുകയാണ് അത്. ആരോഗ്യകരമായ ഭക്ഷണക്രമവും കൃത്യമായ വ്യായാമ രീതികളും വാക്സിനേഷനുകളും മെഡിക്കൽ പരിശോധനകളിലൂടെ നേരത്തെ അസുഖം കണ്ടെത്താനുള്ള ശ്രമങ്ങളുമെല്ലാം ഇതിന്റെ ഭാഗമായി നടക്കുന്നുണ്ട്.

എന്നാല്‍, കാന്‍സര്‍ പ്രതിരോധ രംഗത്തും നോമ്പിന് ഏറെ ചെയ്യാനുണ്ടെന്നാണ് പുതിയ പഠനങ്ങള്‍ തെളിയിക്കുന്നത്. ആത്മീയ ഗുണങ്ങളോടൊപ്പം തന്നെ, ശ്രദ്ധേയമായ ശാരീരികവും മാനസികവുമായ ആരോഗ്യ ഗുണങ്ങളും നോമ്പ് പ്രദാനം ചെയ്യുന്നു. ആരോഗ്യം മെച്ചപ്പെടുത്തൽ, ഭാരം നിയന്ത്രിക്കൽ തുടങ്ങി പല നേട്ടങ്ങള്‍ക്കും കാരണമാണെന്നതിനാല്‍, ഇടവിട്ടുള്ള ഉപവാസത്തിന്റെ ജനപ്രീതി പൊതുവെ ഇന്ന് വര്‍ദ്ധിച്ചുവരുന്നത് ഇതിനോട് ചേര്‍ത്ത് വായിക്കാം.

യൂറോപ്യൻ ജേണൽ ഓഫ് ക്ലിനിക്കൽ മെഡിസിനിൽ, സമീപകാലത്തായി പ്രസിദ്ധീകരിച്ച ഒരു പഠനം (സെപ്റ്റംബർ, 2024) കാൻസർ പ്രതിരോധം അടക്കം അനേകം ആരോഗ്യ ഗുണങ്ങളുള്ള ഒരു ഭക്ഷണ സമീപനമായി ഇടവിട്ടുള്ള ഉപവാസത്തെ (Intermittent fasting - ഒരു നിശ്ചിത സമയത്തേക്ക് ഉപവസിക്കുകയും ശേഷം നിശ്ചിത സമയം ഭക്ഷണം കഴിക്കുകയും ചെയ്യുന്ന രീതി) ഉയര്‍ത്തിക്കാട്ടുന്നുണ്ട്. മെറ്റബോളിസത്തെ നിയന്ത്രിക്കുന്നതിലൂടെയും, ഹോർമോണുകളെ സന്തുലിതമാക്കുന്നതിലൂടെയും, കോശ പ്രവർത്തനങ്ങളെ ക്രമപ്പെടുത്തുന്നതിലൂടെയും ഉപവാസം കാൻസറിനെ എങ്ങനെ പ്രതിരോധിക്കുന്നു എന്ന ഗവേഷണങ്ങള്‍ ഇപ്പോഴും നടക്കുന്നുണ്ട്. കരൾ കാൻസർ, സ്തനാർബുദം എന്നിവക്കെതിരെയുള്ള പ്രതിരോധത്തിന് വിശേഷിച്ചും നോമ്പ് സഹായകമാണെന്നാണ് അവരുടെ ഇത് വരെയുള്ള കണ്ടെത്തല്‍.

കൂടാതെ, കീമോതെറാപ്പിയുടെ പാർശ്വഫലങ്ങൾ ലഘൂകരിക്കാനും, മികച്ച ചികിത്സാ ഫലങ്ങളിലേക്ക് നയിക്കാനും ഉപവാസം (Intermittent fasting) സഹായകമാണത്രെ. ഉപാപചയ പ്രവർത്തനങ്ങളെ ത്വരിതപ്പെടുത്താനും വീക്കം കുറക്കാനും മരുന്നുകളുടെ ഫലപ്രാപ്തി മെച്ചപ്പെടുത്താനും ഉപവാസത്തിന് ഏറെ പങ്കുണ്ട്. ദ അമേരിക്കൻ ജേണൽ ഓഫ് ക്ലിനിക്കൽ ന്യൂട്രീഷനിൽ 2024ല്‍ പ്രസിദ്ധീകരിച്ച ഒരു പഠനം, റമദാൻ നോമ്പിന്റെ ആരോഗ്യ ഗുണങ്ങളെക്കുറിച്ച് പുതിയ ഉൾക്കാഴ്ചകൾ നൽകുന്നതാണ്. ലണ്ടൻ റമദാൻ സ്റ്റഡീസ് (LORANS), കാന്‍സര്‍ രോഗികളായ 72 പേരെ പങ്കെടുപ്പിച്ച് നടത്തിയ പഠനത്തില്‍, റമദാന് മുമ്പും ശേഷവും സ്വീകരിച്ച രക്ത സാമ്പിളുകൾ വിശകലനം ചെയ്തതില്‍, നോമ്പെടുത്തതിനെ തുടര്‍ന്ന് അസുഖത്തിന്റെ അളവില്‍ ഗണ്യമായ കുറവ് കണ്ടെത്തിയതായി പറയുന്നുണ്ട്. റമദാൻ മാസത്തിലെ ഉപവാസം ശ്വാസകോശം, വൻകുടൽ, സ്തനം എന്നീ ഭാഗങ്ങളിലെ അർബുദ സാധ്യത ഏറെ കുറയ്ക്കുമെന്ന് ഫലങ്ങളുടെ വെളിച്ചത്തില്‍ അവര്‍ തുറന്ന് പറയുകയും ചെയ്തു.

2022-ലെ ഒരു പഠന പ്രകാരം, കാൻസർ കോശങ്ങളുടെ വളര്‍ച്ചക്കും അതിജീവനത്തിനുമുള്ള കഴിവിനെ നോമ്പ് പരിമിതപ്പെടുത്തുമെന്നും ഇത് കാൻസർ ചികിത്സയിൽ നിർണായക പങ്ക് വഹിക്കുമെന്നുമാണ്. തുടര്‍ച്ചയായി ഉപവസിക്കുന്നതിന് പകരം, ഇടവിട്ടുള്ള ഉപവാസം, മെറ്റബോളിസം, പ്രതിരോധശേഷി, മൊത്തത്തിലുള്ള കാൻസർ പുരോഗതി എന്നിവയിൽ വളരെ ഫലപ്രദമായി സ്വാധീനം ചെലുത്തുന്നതായും തെളിയിക്കപ്പെട്ടിട്ടുണ്ട്. ലോകത്തിലെ ഏറ്റവും കുറഞ്ഞ കാൻസർ നിരക്കുകൾ ഉള്ളതില്‍ പലതും മുസ്‍ലിം രാജ്യങ്ങളിലാണ് എന്നത് ഇതിനോട് ചേര്‍ത്ത് വായിക്കാവുന്നതാണ്. 

ഇന്റർനെറ്റ്, ടെലിവിഷൻ, ഡിജിറ്റൽ വിനോദം എന്നിവയിലൂടെ കൂടുതൽ സമയം ഉണർന്നിരിക്കുന്ന ആധുനിക ഉദാസീന ജീവിതശൈലിയെ പ്രതിരോധിക്കുന്നതിനുള്ള ഒരു നിർണായക സമീപനമായും ഇടവിട്ടുള്ള ഉപവാസം (Intermittent fasting) ശ്രദ്ധ നേടിയിട്ടുണ്ട്. പൊണ്ണത്തടി, ടൈപ്പ് 2 പ്രമേഹം, ഹൃദ്രോഗം എന്നിവയ്ക്കുള്ള സാധ്യത വർദ്ധിപ്പിക്കുന്നത് ഈ ഉദാസീന ജീവിത രീതിയാണെന്നാണ് പറയുന്നത്. 

25 വർഷമായി ഇടവിട്ടുള്ള ഉപവാസത്തെക്കുറിച്ച് (Intermittent fasting) പഠനം നടത്തുന്ന ന്യൂറോ സയന്റിസ്റ്റ് മാർക്ക് മാറ്റ്സൺ, ഭക്ഷണമില്ലാതെ ദീർഘനേരം കഴിയുമ്പോൾ ശരീരം അതിന്റെ പഞ്ചസാരയുടെ കരുതൽ കുറയ്ക്കുകയും കൊഴുപ്പ് ഉരുകാന്‍ തുടങ്ങുകയും ചെയ്യുന്നുവെന്ന് വിശദീകരിക്കുന്നു. മെറ്റബോളിക് സ്വിച്ചിംഗ് എന്നറിയപ്പെടുന്ന ഒരു പ്രക്രിയ, ഉപാപചയ പ്രവര്‍ത്തനങ്ങള്‍ക്ക് വേഗം കൂട്ടുകയും ഭാരം നിയന്ത്രിക്കാൻ സഹായിക്കുകയും ആരോഗ്യം മെച്ചപ്പെടുത്തുകയും ചെയ്യുന്നുവത്രെ. 

കൂടാതെ, തലച്ചോറിന്റെ പ്രവർത്തനം മെച്ചപ്പെടുത്തൽ, ഇൻസുലിൻ സംവേദനക്ഷമത മെച്ചപ്പെടുത്തൽ എന്നിവയുൾപ്പെടെ നിരവധി ആരോഗ്യ ഗുണങ്ങൾ ഇടവിട്ടുള്ള ഉപവാസം(Intermittent fasting) വാഗ്ദാനം ചെയ്യുന്നുവെന്ന് പഠനങ്ങൾ സൂചിപ്പിക്കുന്നു. ഓക്സിഡേറ്റീവ് സ്ട്രെസ് കുറയ്ക്കുകയും കോശങ്ങളെ റീഫ്രഷ് ചെയ്യുകയും ചെയ്യുന്നതിലൂടെ അൽഷിമേഴ്സ്, ഹൃദയ സംബന്ധമായ പ്രശ്നങ്ങള്‍, ടൈപ്പ് 2 പ്രമേഹം എന്നിവയ്ക്കുള്ള സാധ്യത കുറയ്ക്കാനും സഹായിക്കുന്നു.

മുസ്‍ലിംകൾക്ക് അവരുടെ സഹൂറും (പ്രഭാതത്തിനു മുമ്പുള്ള ഭക്ഷണം) ഇഫ്താറും (നോമ്പ് തുറക്കുന്നതിനുള്ള ഭക്ഷണം) സന്തുലിതമാണെന്ന് ഉറപ്പാക്കുന്നതിലൂടെ ഉപവാസത്തിന്റെ ആരോഗ്യ ഗുണങ്ങൾ പരമാവധി ഉറപ്പാക്കാൻ സാധിക്കും. പോഷകസമൃദ്ധവും സന്തുലിതവുമായ ഭക്ഷണക്രമം പാലിക്കുന്നതിലൂടെ, നോമ്പിന്റെ ആഴത്തിലുള്ള ആത്മീയ പ്രതിഫലങ്ങളോടൊപ്പം, അതിന്റെ ഭൗതികവും ആരോഗ്യപരവുമായ ഗുണങ്ങൾ കൂടി അവർക്ക് അനുഭവിക്കാൻ കഴിയും.

മലേഷ്യയിലെ ഇന്റർനാഷണൽ ഇസ്ലാമിക് യൂണിവേഴ്‌സിറ്റിയിലെ ഇസ്ലാമിക് ജൂറിസ്‌പ്രൂഡൻസ് അസിസ്റ്റന്റ് പ്രൊഫസര്‍ ആണ് ലേഖകന്‍

കൂടുതല്‍ വായനക്ക്:

1. https://www.ej-clinicmed.org/index.php/clinicmed/article/view/345

2. https://www.sciencedirect.com/science/article/pii/S000291652400056X

3. https://pmc.ncbi.nlm.nih.gov/articles/PMC9530862/

4. https://acsjournals.onlinelibrary.wiley.com/doi/10.3322/caac.21834?utm_source=chatgpt.com

5. https://pmc.ncbi.nlm.nih.gov/articles/PMC4718348/?utm_source=chatgpt.com

6. https://www.hopkinsmedicine.org/health/wellness-and-prevention/intermittent-fasting-what-is-it-and-how-does-it-work

7. https://www.news-medical.net/news/20240204/Ramadan-fasting-linked-to-favorable-metabolic-changes-and-reduced-chronic-disease-risk.aspx 

8. https://www.medrxiv.org/content/10.1101/2022.08.04.22278413v1.full

9. https://www.medicalnewstoday.com/articles/323605#oxidative-stress-and-inflammation