വിഷയം: Hijab
സ്ത്രീകൾക്ക് മുഖം മറക്കൽ നിർബന്ധമുണ്ടോ? തെളിവ് സഹിതം വിശദീകരിക്കുമോ?
ചോദ്യകർത്താവ്
Hadiya
Jul 22, 2026
CODE :Abo16412
അല്ലാഹുവിന്റെ തിരുനാമത്തില്, അവന് ആണ് സര്വ്വ സ്തുതിയും, പ്രവാചകരുടെയും കുടുംബത്തിന്റെയും മേല് അല്ലാഹുവിന്റെ അനുഗ്രങ്ങള് വര്ഷിച്ചുകൊണ്ടിരിക്കട്ടെ
സ്ത്രീകൾ പുറത്തിറങ്ങുമ്പോൾ മുഖം മറയ്ക്കേണ്ടതുണ്ടോ എന്ന വിഷയത്തിൽ പണ്ഡിതന്മാർക്കിടയിൽ അഭിപ്രായവ്യത്യാസങ്ങളുണ്ട്. മുഖം മറയ്ക്കൽ നിർബന്ധമില്ല എന്നാണ് പ്രബലം. എങ്കിലും, സൂക്ഷ്മത പാലിക്കുന്നതിന്റെ ഭാഗമായി മുഖം മറച്ച് പുറത്തുപോകുന്നതാണ് കൂടുതൽ നല്ലത്.
ഇതിന് തെളിവുകളായി ആലിമീങ്ങൾ പറയാറുള്ളത്:
- "തങ്ങളുടെ അലങ്കാരങ്ങളിൽ നിന്ന് പ്രത്യക്ഷമായതൊഴികെ മറ്റൊന്നും അവർ വെളിപ്പെടുത്തരുത്...(നൂർ,31)"
ഈ ആയത്തിന്റെ വിശദീകരണമായി, 'പ്രത്യക്ഷമായത്' എന്നതുകൊണ്ട് ഉദ്ദേശിക്കുന്നത് മുഖവും മുൻകൈയുമാണ് എന്ന് ഇബ്നു അബ്ബാസ് ഉൾപ്പെടെ ഒരുപാട് സ്വഹാബികൾ വ്യക്തമാക്കിയിട്ടുണ്ട്.
- പെരുന്നാൾ ദിനത്തിൽ തിരു നബി (സ) ഉപദേശം നൽകുമ്പോൾ, സദസ്സിലിരുന്ന ഒരു സ്ത്രീയുടെ കവിളുകളിൽ കറുപ്പ് കലർന്ന ചുവപ്പുനിറം ഉണ്ടായിരുന്നു എന്ന് ഹദീസുകളിൽ വിവരിക്കുന്നുണ്ട് (മുസ്ലിം,2085).
സ്ത്രീകൾക്ക് മുഖം മറയ്ക്കൽ നിർബന്ധമില്ല എന്നതിന് ഈ ഹദീസും ആലിമീങ്ങൾ തെളിവായി ഉദ്ധരിക്കാറുണ്ട്.
- ഇഹ്റാം ചെയ്ത സ്ത്രീ മുഖവും മുൻകൈയും മറയ്ക്കാൻ പാടില്ല (ഹറാമാണ്) എന്നാണ് നിയമം.
അടിസ്ഥാനപരമായി സ്ത്രീയുടെ മുഖവും മുൻകൈയും 'ഔറത്ത്' അല്ല എന്നതിനാലാണ് ഇത്തരമൊരു നിയമമുള്ളത്. മുഖം ഔറത്തായിരുന്നുവെങ്കിൽ, ഹജ്ജിന്റെ വേളയിലും അത് മറയ്ക്കണമെന്ന് നിർബന്ധമാക്കുമായിരുന്നു.
- വ്യാപാരാവശ്യങ്ങൾ പോലെയുള്ള ചില സാഹചര്യങ്ങളിൽ സ്ത്രീകളുടെ മുഖം കാണുന്നത് അനുവദനീയമാണെന്ന് ഫിഖ്ഹിന്റെ ഗ്രന്ഥങ്ങളിൽ പരാമർശിക്കുന്നുണ്ട്.
കാണുന്നത് അനുവദനീയമാണെന്നത് മുഖം തുറന്നുവെക്കാം എന്നതിലേക്ക് സൂചന നൽകുന്നുമുണ്ട് എന്നും തെളിവ് നിരത്തുന്നു.
ചുരുക്കത്തിൽ, സ്ത്രീകൾക്ക് മുഖം മറയ്ക്കൽ നിർബന്ധമില്ലെങ്കിലും ഭിന്നാഭിപ്രായങ്ങൾ പരിഗണിച്ചും സൂക്ഷത കൈകൊള്ളാനുമായി മറക്കലാണ് ഉത്തമം. ഇനി, സ്തീ മുഖം മറച്ചാലും ഇല്ലെങ്കിലും അനാവശ്യമായി അവളുടെ മുഖം നോക്കൽ അന്യ പുരുഷർക്ക് നിഷിദ്ധമാണ്.
ഈമാനോടെ ജീവിക്കാനും ഈമാനോടെ മരിക്കാനും നാഥന് തുണക്കട്ടെ
