Islamonweb

അള്ളാഹു അദ്ദേഹത്തിന്റെ ദറജ ഉയർതികൊടുക്കട്ടെ

ബാഖവി ഉസ്താദിന്റെ ചരിത്രം വായിച്ചു. ഉസ്താദ് വഫാതാവുന്നതിന് അഞ്ചാറ് മാസം മുമ്പ് ഉസ്താദുമായി ദിവസങ്ങെളെളെടുത്ത് അഭിമുഖം നടത്തി ശേഖരിച്ച ജീവിത സംഭവങ്ങൾ സോഷ്യൽ മീഡിയകളിൽ മരണ ദിവസവും പിറ്റേന്നുമായി ഞാൻ പോസ്റ്റ് ചെയ്തിരുന്നു. അത് പലരും അവലംബമാക്കി എന്ന് ഈ കുറിപ്പ് വായിച്ചേപ്പോൾ മനസ്സിലായി. വളരെ സന്തോഷമുണ്ട്. എന്റെ ശ്രമം വിജയകരമായി എന്നതിൽ ചാരിതാർത്ഥ്യമുണ്ട്. റഷീദ് മുണ്ടംപറമ്പ്

വിജ്ഞാനപ്രസരണത്തിന്റെ സോഷ്യൽ വിപ്ലവം ഉസ്താദിലൂടെ.. 2010ലാണ് ഈ ഗ്രൂപ്പിന് തുടക്കമാവുന്നത്.. പത്തുവർഷംകൊണ്ട് ഈ ഗ്രൂപ്പ് മുഖാന്തരം ജ്ഞാന മേഖലയിൽ തുല്യതയില്ലാത്ത ചരിത്രമാണ് ഉസ്താദിലൂടെ സൃഷ്ടിക്കപ്പെട്ടത്. അതിനു ഞാൻ ഒരു കാരണമായി എന്നതിൽ സന്തോഷിക്കുന്നു. ദർസിൽ പഠിക്കുന്ന കാലം. ഫോണ് ഉപയോഗത്തിന് നിയന്ത്രണമുണ്ട്. ഉസ്താദിന്റെ ശിഷ്യരിൽ ദർസിൽ കൂടെയുള്ളവരിൽ മുതിർന്നത് അന്ന് ഞാനായിരുന്നു. ഉസ്താദിൻറെ പ്രസംഗങ്ങൾ കൈമാറുക എന്ന ഉദ്ദേശത്തോടുകൂടിയാണ് SPEECH OF MUHAMMAD BAQAVI വാട്സ്ആപ്പ് ഗ്രൂപ്പ് രൂപപ്പെടുത്തുന്നത്. ഉസ്താദിന്റെ ശിഷ്യരായിരുന്നു ആദ്യ മെമ്പർമാർ. മുസ്തഫ യമാനി ( Mpm Yamani ) മുഖാന്തരം ഗ്രൂപ്പിൽ ഉസ്താദുമെത്തി. ശേഷം ഉസ്താദ് എന്നെ റൂമിലേക്ക് വിളിപ്പിച്ചു. കാര്യമറിഞ്ഞ ഞാൻ ഭയത്തോടെയാണ് ഉസ്താദിന്റെ റൂമിലെത്തിയത്. ദർസിലെ ഫോൺ ഉപയോഗം നിയന്ത്രണമുള്ളതിനാലുള്ള ഭയം. എന്നാലും ഉസ്താദിന്റെ അറിവോട് കൂടി തന്നെ നിയന്ത്രണങ്ങളോടെ ആയിരുന്നു എൻ്റെ ഉപയോഗം. അതിനിടക്കാണ് ഇങ്ങനെയൊരു വിഷയമുണ്ടാകുന്നത്. റൂമിലെത്തിയ എന്നെ അത്ഭുതപ്പെടുത്തിക്കൊണ്ട് അറിവുകൾ പ്രസരിപ്പിക്കാൻ പുതുവഴി കണ്ടെത്തിയതിന്റെ ആവേശമായിരുന്നു ഉസ്താദിൽ കണ്ടത്.. ആദ്യം ശിഷ്യരിലേക്ക്.. അവരിലൂടെ പണ്ഡിതരിലേക്ക്.. പിന്നെ പൊതു സമൂഹത്തിലേക്ക്.. എല്ലാ നിലക്കും ഉസ്താദിൽ നിന്നുള്ള വിജ്ഞാന മുത്തുകൾ പ്രസരിക്കുകയായിരുന്നു. പലരും ഗ്രൂപ്പിലെ വോയ്സുകൾ എഡിറ്റ് ചെയ്ത വീഡിയോയാക്കി സോഷ്യൽ മീഡിയയിലൂടെ ജനങ്ങളിലേക്ക് എത്തിച്ചു... من كلمات محمد الباقبي എന്ന പേരിലേക്ക് ഗ്രൂപ്പ് നാമകരണം ചെയ്യപ്പെട്ടു. ലോകത്തിൻറെ വിവിധ ദിക്കുകളിൽ നിന്ന് ഉസ്താദിനെ ആശ്രയിച്ച് ഗ്രൂപ്പിലേക്ക് പണ്ഡിതരും സാധാരണക്കാരും ഒഴുകിയെത്തി.. ഗ്രൂപ്പ് ജനകീയമായി.. അംഗങ്ങൾ ആയിരങ്ങളായി.. ഉസ്താദിൻറെ സഹോദരൻ അബ്ദുറഹ്മാൻ മാഷും ( PA Rahman ) മകൻ മുഹമ്മദ് മുഹ്സിൻ ഹുദവിയും ( Muhsin Panatal ) റാബിദ് മാഹരി കോടമ്പുഴയും അഡ്മിൻമാരായി ഗ്രൂപ്പ് ക്രോഡീകരിക്കപ്പെട്ടു... പിന്നീട് من دروس محمد الباقوي എന്നതിലേക്ക് പുണർനാമകരണം ചെയ്തു. ഉസ്താദിന്റെ വഫാത്ത് വരെ വിജ്ഞാനപ്രസരണത്തിൽ സാന്നിധ്യമായി. ഓൺലൈനിലൂടെയുള്ള തുടക്കം ഇവിടെവെച്ചായിരുന്നു. ഇന്ന് ഏതു മസ്അല സോഷ്യൽ മീഡിയയിൽ തപ്പിയാലും ഏറ്റവും പെട്ടെന്ന് കിട്ടുന്ന മറുനാഥമായി ഉസ്താദിൻറെ വോയിസുകൾ മാറി. അവയിലധികവും ഇവിടത്തിൽ ചർച്ച ചെയ്യപ്പെട്ടതായിരുന്നു. ആ പ്രകാശം പലരിലേക്കും വെളിച്ചമേകി.. നാഥൻ സ്വീകരിക്കട്ടെ.. ആമീൻ.. ✍ അബൂ ആയിഷ Swadaka Kpm https://www.facebook.com/share/GTz25bxTKmRenDPT/?mibextid=oFDknk

തളർന്നു പോകുമ്പോൾ തണലായി ആശ്രയിക്കാനാളില്ലാതെയായി.. ഉസ്താദ് എനിക്ക് ഉപ്പ ആയിരുന്നു എല്ലാ തരത്തിലും.. എപ്പോഴും പിതാവിന്റെ ശാസനയും കാർക്കശ്യവും നിയന്ത്രണവും സ്വാധീനവും അങ്ങ് മാത്രമായിരുന്നു.. അന്ന് അവസാനമായി എൻ്റെ ആയിഷ മോളെ കാണാനായി വിളിപ്പിച്ചപ്പോഴും സ്വന്തം മകനോടൊന്ന നിലയിൽ തന്നെ അന്ന് ഉപദേശിച്ചപ്പോഴും മോളെ നോക്കി സന്തോഷിക്കുകയും കൊഞ്ചിക്കുകയും മധുരം നൽകിയപ്പോഴും പ്രാർത്ഥിച്ചപ്പോഴും എപ്പോഴും യാത്രയാകുന്നതുപോലെ അല്ല അന്നത്തെ മടക്കമെന്നത് ആലോചിച്ചിട്ടില്ലായിരുന്നു.. ആ വ്യത്യസ്തത മനസ്സിലാക്കാനുള്ള ചിന്തയുണ്ടായിരുന്നില്ല. വീണ്ടും പ്രവാസത്തിലേക്കുള്ള ആ യാത്ര ഉസ്താദിനെ ഇനി കാണാൻ സാധിക്കില്ല എന്ന് അങ്ങ് മനസ്സിലാക്കിയിട്ടുണ്ടായിരുന്നു എന്നതുപോലും തിരിച്ചറിയാൻ എനിക്ക് സാധിച്ചില്ല.. ___________________________________________ 2009 ലാണ് ഉസ്താദിലേക്ക് വിദ്യാർത്ഥിയായി എത്തുന്നത്. കൽപ്പറ്റ ദർസിലേക്ക് ആയിരുന്നു ആ യാത്ര. മുണ്ടംപറമ്പ് ഉസ്താദിന്റെ വീട്ടിൽ നിന്ന് തുടങ്ങിയ ആ ദീർഘ യാത്ര 2017 വരെ തുടർന്നു. കൽപ്പറ്റ പള്ളിയിലെത്തിയ ആദ്യ ആഴ്ച: എളാപ്പയുടെ മകളുടെ കല്യാണമാണ്. സമ്മതം വാങ്ങി നാട്ടിൽ പോയി തിരിച്ചു വന്നു. അധിക കാലമായിട്ടില്ല ആദ്യം പഠിച്ച കോഴിക്കോട് നിന്നും ഏറെ അകലെയാണ് കൽപ്പറ്റ. പലതുകൊണ്ടും ശീലങ്ങൾ ഏറെ മാറ്റമുണ്ട് അവിടം. അതിനാൽ തന്നെ ഇനി നാട്ടിലേക്കുള്ള യാത്ര ഒരുപാട് നീണ്ടതാണെന്ന് തിരിച്ചറിയാൻ രണ്ടോ മൂന്നോ ആഴ്ചയെ വേണ്ടി വന്നുള്ളൂ. രണ്ടാഴ്ച ആയപ്പോഴേക്കും ഉസ്താദിനോട് സമ്മതം ചോദിച്ചു. പെട്ടെന്ന് വീണ്ടും പോവാൻ ആയിട്ടില്ല എന്നായിരുന്നു മറുപടി. അതും പറഞ്ഞു ഉസ്താദ് ഉളു ചെയ്യാൻ പോയി. വീണ്ടും ചോദിക്കാൻ ധൈര്യമില്ല. കോണിപ്പടിയുടെ മുകളിൽ നിന്ന് ഉസ്താദ് തിരിച്ചു വരുന്നതും കാത്തിരുന്നു. മുകളിലേക്ക് കയറുന്നത് കണ്ട ഉടനെ ചുമരിൽ തൂക്കിയ കലണ്ടറിൽ ദിവസങ്ങൾ എണ്ണുന്നതുപോലെ ഉസ്താദിനെ കണ്ടില്ലെന്ന് ഭാവത്തിൽ നോക്കി നിന്നു. ഉസ്താദ് കയറി റൂമിലേക്ക് പോയി. ശേഷം വിളിച്ചു. മോന് വിഷമമുണ്ടോ..? എന്നതായിരുന്നു ചോദ്യം. ശേഷം നാട്ടിലേക്ക് പോകാനുള്ള സമ്മതവും തന്നു.. ചില മാസങ്ങൾക്ക് ശേഷമാണെന്ന് തോന്നുന്നു. ഉസ്താദ് ഇക്കാര്യം ഓർമ്മപ്പെടുത്തി. ആ കുസൃതിയെ തമാശയായി തന്നെ ഉസ്താദ് കണ്ടു. എൻ്റെ ആ കുസൃതി ഉസ്താദ് തിരിച്ചറിഞ്ഞിരുന്നു എന്ന് ഞാനപ്പോഴാണ് അറിയുന്നത്. പിന്നീട് വർഷങ്ങളോളം ഉസ്താദിന്റെ അടുത്തായിരുന്നു ദർസ് ജീവിതം. ഉസ്താദിന് ഖാദിമായും മകനായും വീട്ടുകാരനായും രഹസ്യ സൂക്ഷിപ്പുകാരനായും പലപ്പോഴും പല രീതിയിലും ഉസ്താദുമായി ബന്ധപ്പെട്ടു. ഉസ്താദ് എന്നെ ചേർത്തുനിർത്തി എന്ന് പറയുന്നതാവും ശരി. ഉസ്താദിൻറെ വ്യക്തിപരമായ പല കാര്യങ്ങളും കുടുംബപരമായ പല വിഷയങ്ങളും എന്നോട് സംസാരിച്ചു. അഭിപ്രായങ്ങൾ പറയിപ്പിച്ചു. പല കാര്യങ്ങളും ഏൽപ്പിച്ചു. ചിലപ്പോഴൊക്കെ കൂട്ടുകാരന്റെ രൂപത്തിൽ ചിലപ്പോൾ പിതാവിന്റെ ഭാവത്തിൽ. അപ്പോഴൊക്കെ ഞാൻ ചിന്തിച്ചിട്ടുണ്ട്. ഇതൊക്കെ എന്തിനുവേണ്ടിയായിരുന്നു എന്ന്. അതൊരു രക്ഷിതാവിന്റെ സൂക്ഷ്മതയായിരുന്നു എന്ന് തിരിച്ചറിയാൻ സാധിച്ചിരുന്നില്ല.. എല്ലാം കാര്യങ്ങളിലും ഉസ്താദ് നിർദ്ദേശങ്ങളും ഉപദേശങ്ങളും നൽകി. അതിനനുസരിച്ച് ചെയ്തതെല്ലാം വിജയത്തിലുമെത്തി. പഴയ കുസൃതിക്കാരൻ ഉള്ളിലുണ്ടായതുകൊണ്ട് പലപ്പോഴും ഉസ്താദിനെ മറച്ചുവച്ച് പലതും ചെയ്തു. അവയൊക്കെയും പരാജയത്തിലും ബുദ്ധിമുട്ടിലുമായിരുന്നു കലാശിച്ചത്.. ഉസ്താദും കുടുംബവുമൊത്തുള്ള യാത്രകളും സിയാറത്തുകളും ഏറെ അടുപ്പിച്ചു.ഉസ്താദ് രോഗിയായതിനുശേഷമായിരുന്നു എൻ്റെ വിവാഹം. മേൽപ്പറഞ്ഞ കുസൃതി കാരണമുണ്ടായ അനന്തരഫലത്തിന്റെ പ്രയാസത്തിലായിരുന്നു പുതിയാപ്ലയായി ഇറങ്ങാനിരുന്നത്. എല്ലാംകൊണ്ടും താളം തെറ്റും എന്ന് തോന്നിയ നിമിഷം. ഉസ്താദുമായി അടുത്ത് ബന്ധമുള്ളവരെല്ലാം ഉസ്താദ് വരാൻ സാധ്യതയില്ല എന്നറിയിച്ചിരുന്നു. കാര്യമായിട്ട് ക്ഷണിക്കാൻ പോലും നിന്നിട്ടില്ല. ആഗസ്റ്റ് 26ന് വെള്ളിയാഴ്ച നിക്കാഹിന് ഇറങ്ങുന്നതിനു മുമ്പ് ക്ഷണിച്ചവർ കൂടുന്നതിന് മുമ്പ് ആളും ബഹളവും ആവുന്നതിനു മുമ്പ് ഉസ്താദ് കുടുംബവുമൊത്തു വന്നു. അനുഗ്രഹിച്ചു. പ്രാർത്ഥിച്ചു. മകനെ നിക്കാഹ് സദസ്സിലേക്ക് പറഞ്ഞയക്കുകയും ചെയ്തു. അതിനിടയ്ക്ക് പ്രയാസങ്ങളെല്ലാം മനസ്സിൽ നിന്ന് മാറ്റാനായിരുന്നു ആ വരവ് എന്നതും തിരിച്ചറിയാൻ സാധിച്ചിരുന്നില്ല. പൊട്ടിക്കരയാൻ നിന്ന ഞാൻ സന്തോഷത്തോടെ പുതിയാപ്ലയായി മണവാട്ടിയെ സ്വീകരിച്ചത് എങ്ങനെയായിരുന്നു എന്നത് പിന്നീട് ആലോചിച്ചപ്പോഴാണ് തിരിച്ചറിവ് വന്നത്. കല്യാണം കഴിഞ്ഞു സൽക്കരിക്കാൻ വിളിച്ചു. ഉസ്താദിൻറെ അവസ്ഥ അറിയുന്നതുകൊണ്ട് തന്നെ തിരസ്കരിച്ചു പ്രിയതമയുമായി പിറ്റേന്ന് തന്നെ ഉസ്താദിനെ കാണാൻ ചെന്നു.. പിന്നെയും പ്രവാസിയായപ്പോഴും പ്രയാസങ്ങൾ വന്നപ്പോഴും പ്രിയതമ ഗർഭിണിയായപ്പോഴും നാഥന്റെ അനുഗ്രഹങ്ങളും പരീക്ഷണങ്ങളും വന്നപ്പോഴുമൊക്കെ അവിടുത്തെ പ്രാർത്ഥനകൾ കൊണ്ടും വാക്കുകൾ കൊണ്ടും അനുഗ്രഹിച്ചു.. ഒരർത്ഥത്തിൽ എന്നെ തളരാതെ ജീവിപ്പിച്ചു എന്ന് തന്നെ പറയാം. ശൈഖുനാ ദൗത്യം പൂർത്തിയാക്കി യാത്രയായിരിക്കുന്നു. തളർന്നു പോകുമ്പോൾ തണലായി ആശ്രയിക്കാനാളില്ലാതെയായി. ഉസ്താദ് പറഞ്ഞേൽപ്പിച്ചതും എന്നിൽ കാണാൻ ആഗ്രഹിച്ചതും പൂർത്തിയാക്കാനുണ്ട്. നാഥന്റെ തൗഫീഖുണ്ടാവട്ടെ.. ആമീൻ.. ജന്നാത്തുൽ ഫിർദൗസിൽ അങ്ങയുടെ ശിഷ്യരായി തന്നെ ഒത്തുകൂടാനുള്ള സൗഭാഗ്യമുണ്ടാവട്ടെ.. ആമീൻ.. ✍ അബൂ ആയിഷ Swadaka Kpm https://www.facebook.com/share/p/YEttmn2sHSTJ7djy/?mibextid=oFDknk

കോണോംപാറ മഹല്ലിൽ മുണ്ടംപറമ്പ് മുഹമ്മദ് ബാഖവി ഉസ്താദ് സേവനം ചെയ്ത കാലത്ത്. തൊട്ടടുത്ത മഹല്ലിൽ ഈ വിനീതൻ മുദരിസായിരുന്നു. പലപ്പോഴും പല പരിപാടികളിലും ഒരുമിച്ച് സംബന്ധിക്കാറുണ്ട്. ചുങ്കം മഹല്ലിൽ ഒരു വലിയ പരിപാടിയിൽ ഒരുപാട് വലിയ വലിയ ഉസ്താദുമാർ സംഗമിച്ച സദസ്സിൽ ഒരിക്കൽ അദ്ദേഹം എന്നോട് ദുആ ചെയ്യാൻ പറഞ്ഞു. ഒരുപാട് തവണ നിരസിച്ചുവെങ്കിലും ‘നിങ്ങളാണ് ഇവിടുത്തെ മുദരിസ് നിങ്ങൾ തന്നെ ദുആ ചെയ്യണം’ എന്ന് അദ്ദേഹം വാശി പിടിച്ചു. ഒടുവിൽ വഴങ്ങേണ്ടി വന്നു. അടുത്ത മഹല്ല് ആയതുകൊണ്ട് നികാഹിന് പലപ്പോഴും അദ്ദേഹം എന്റെ പള്ളിയിൽ വരാറുണ്ട്. റൂമിൽ കയറിയാൽ എന്നെ അല്ല അദ്ദേഹം ശ്രദ്ധിക്കാറ്. മറിച്ച് അലമാരയിൽ അടക്കിവെച്ചിരിക്കുന്ന പുസ്തകങ്ങളിലും കിതാബുകളിലൂടെയും കണ്ണുകൾ പായിക്കും. പൊൻമളയുടെ ഫത്‌വ മുതൽ നജീബ് മൗലവിയുടെ പുസ്തകങ്ങൾ വരെ എന്റെ ശേഖരത്തിൽ ഉണ്ടാകും ‘ഇതാരുടെ, ഇതോ.?’ എന്നിങ്ങനെ ചോദിച്ചും പറഞ്ഞും കൊണ്ടിരിക്കും. കൂടുതൽ സമയം ഇരിക്കില്ല, പെട്ടെന്നിറങ്ങും. അഥവാ സർവ്വ സമയവും ജ്ഞാന കുതുകിയായി മാത്രമേ ഞാൻ അദ്ദേഹത്തെ കണ്ടിട്ടുള്ളൂ.. വാട്സ്ആപ്പ് ഉപയോഗിക്കുന്ന കാലം മുതൽ അദ്ദേഹത്തിൻറെ തീർപ്പ് വോയിസുകൾ കേൾക്കാത്ത ദിവസങ്ങൾ ചുരുക്കമാണ് എന്ന് തന്നെ പറയാം. كن عالما او متعلما എന്ന ഗ്രൂപ്പിൽ ഏതാനും ദിവസങ്ങൾ മുമ്പ് വരെ അദ്ദേഹം ലൈവായിരുന്നു. ഒരു വലിയ മുദരിസും പ്രഭാഷകനുമായ വ്യക്തിക്ക് എത്ര ഒഴിവുസമയം ഉണ്ടാകും!? ആ പരിമിതമായ സമയം മുഴുവൻ അദ്ദേഹം ഇത്തരം ഗ്രൂപ്പുകളിൽ കർമ്മശാസ്ത്രം ചർച്ച ചെയ്യാൻ വേണ്ടിയാണ് വിനിയോഗിച്ചിരുന്നത്. രണ്ട് മഹല്ലിനെയും ബാധിക്കുന്ന ചില കർമ്മ ശാസ്ത്ര വിഷയങ്ങളിൽ ഞങ്ങൾ പരസ്പരം ഫോണിലൂടെ സംസാരിച്ചിട്ടുണ്ട്. വെരി ഫാസ്റ്റ് ആയിരിക്കും മറുപടി. അതും കൃത്യമായി കിതാബിന്റെ വോളിയവും പേജ് നമ്പറും സഹിതം. വലിയ പണ്ഡിതന്മാർ പോലും അദ്ദേഹവുമായി മസ്അലകൾ ചർച്ച ചെയ്യാറുണ്ട്. ഫർള് നിസ്കാരങ്ങൾ ഖളാ ഉള്ളവർ റമദാൻ മാസത്തിലെ തറാവീഹ് നിസ്കാരം നിർവഹിക്കരുത് അത് ഹറാമാണ് എന്ന ഒരിക്കൽ ഗ്രൂപ്പിൽ ആരോ ഒരു പണ്ഡിതൻ വിധി പറഞ്ഞപ്പോൾ അദ്ദേഹം അതിനെ തിരുത്തി. ഇത് കേട്ട് ഞാൻ അദ്ദേഹത്തിന് പേഴ്സണൽ മെസ്സേജ് അയച്ചു. നിങ്ങൾ പറഞ്ഞത് പ്രകാരം ഏതെങ്കിലും കിത്താബിൽ ഉണ്ടോ എന്നായിരുന്നു എന്റെ ചോദ്യം.? മറുപടി ഉടനെ വന്നു: കരിങ്കപ്പാറ ഉസ്താദ് ഫത്ഹുൽ മുഈനിന്റെ തഖ്രീറിൽ ആ മസ്അല ഉദ്ധരിക്കുന്നുണ്ട്. നോക്കിക്കോ .. എന്നാണ് അദ്ദേഹം പറഞ്ഞത്. അന്ന് ഒരുപാട് തിരഞ്ഞു, കിട്ടിയില്ല. പക്ഷേ, ഈ കഴിഞ്ഞ റമദാനിലാണ് ഞാനത് കണ്ടത്. പ്രസ്തുത വിഷയത്തിൽ ഞാനൊരു വീഡിയോ യൂട്യൂബിൽ ചെയ്തിട്ടുണ്ട്. ഈ ഇബാറത്ത് കിട്ടി ഉറപ്പിച്ചതിനുശേഷം ആയിരുന്നു അത്. പൊതുജനങ്ങൾക്ക് ഏറെ ആശ്വാസം നൽകുന്ന ഒരു മസ്അലയാണ് അത്. ഓർത്തെടുത്താൽ ഇങ്ങനെ പലതും.. പക്ഷേ ഒരിക്കൽ ഞെട്ടലോടെയാണ് ആ വാർത്ത കേട്ടത്.!! അദ്ദേഹം അർബുദ രോഗിയാണെന്ന വാർത്ത.!! രോഗശയ്യയിൽ ആയിരിക്കെ തന്നെ അദ്ദേഹം നിരന്തരം വിജ്ഞാനത്തിലും അനുബന്ധ ചർച്ചകളിലും മുഴുകിക്കൊണ്ടിരുന്നു. ഒരിക്കൽ സുപ്രഭാതം ഓൺലൈൻ മീഡിയയിൽ നിന്ന് എന്നെ വിളിച്ചു. സക്കാത്ത് വിഷയം സംസാരിക്കാൻ പറ്റിയ ഏതെങ്കിലും പണ്ഡിതന്മാർ അവിടെ അടുത്തുണ്ടെങ്കിൽ നിങ്ങൾ പോയി അവരുമായി ഒരു ഇൻറർവ്യൂ ചെയ്തു വിട്ടു തരണം എന്നായിരുന്നു ആവശ്യം. അന്ന് എനിക്ക് അസൗകര്യമുണ്ടെന്നും നിങ്ങൾക്ക് ഏറ്റവും നല്ലത് മുണ്ടംപറമ്പ് ബാഖവിയെ കൊണ്ട് ചെയ്യിക്കൽ ആകുമെന്നും ഞാൻ അവരോട് പറഞ്ഞു. രണ്ടു കാരണങ്ങൾ ആണ് ഞാൻ അതിന് അവരോട് പറഞ്ഞത്. ഒന്ന്: അദ്ദേഹം പറ്റില്ല എന്ന് ഒരിക്കലും പറയില്ല. രണ്ട്: പറയുന്ന വിഷയങ്ങൾ കിറുകൃത്യമായിരിക്കും. രണ്ട് ദിവസങ്ങൾക്കകം അദ്ദേഹത്തിൻറെ വീഡിയോ സുപ്രഭാതത്തിൽ വന്നു.(ലിങ്ക് കമന്റ് ബോക്സിൽ) ഈ വീഡിയോ അദ്ദേഹം ചെയ്യുന്നത് രോഗാതുരനായി വീട്ടിൽ കഴിയുന്ന വേളയിൽ ആയിരുന്നു. മരണത്തോടു മല്ലിടുന്ന അവസാന സമയങ്ങളിലും അദ്ദേഹം വിശുദ്ധ ഖുർആൻ പാരായണത്തിലും ദിക്റ് ദുആകളിലും ആയിരുന്നു എന്ന് അദ്ദേഹത്തിൻറെ സഹോദരൻറെ വോയിസ് കേൾക്കാൻ സാധിച്ചു. സർവ്വസമയവും അല്ലാഹുവിൻറെ വിജ്ഞാനം ഭൂമിയിൽ പ്രസരിപ്പിക്കുവാൻ വേണ്ടി ജീവിതം ചിലവഴിച്ച ഒരു മനുഷ്യൻറെ പ്രയാണം സ്വർഗ്ഗത്തിലേക്കല്ലെങ്കിൽ പിന്നെ എങ്ങോട്ട്..!? അല്ലാഹു അദ്ദേഹത്തോടൊപ്പം നമ്മെയും സ്വർഗ്ഗത്തിൽ ഒരുമിച്ചു കൂട്ടി അനുഗ്രഹിക്കട്ടെ. ആമീൻ ✍️അബൂ ത്വാഹിർ ഫൈസി മാനന്തവാടി