Islamonweb

അല്ലാഹുവിന്റെ തിരുനാമത്തില്‍, അവനാണ് സര്‍വ്വസ്തുതിയും, പ്രവാചകരുടെയും കുടുംബത്തിന്റെയും മേല്‍ അല്ലാഹുവിന്റെ അനുഗ്രഹങ്ങള്‍ വര്‍ഷിച്ചുകൊണ്ടിരിക്കട്ടെ. എല്ലാ നിസ്കാരത്തിന്റെയും മുമ്പുള്ള സുന്നത് നിസ്കാരത്തിന്റെ സമയം ആ നിസ്കാരത്തിന്റെ സമയമായത് മുതല്‍ സമയം അവസാനിക്കുന്നത് വരെയാണ്. ഫര്‍ദ് നിസ്കരിച്ചതിനു ശേഷവും മുമ്പുള്ള സുന്നത് നിസ്കരിക്കാം. അത് അദാഅ് തന്നെയാണ്. സുബ്ഹിന് ശേഷം നിസ്കാരം ശക്തമായ കറാഹത് (തഹരീമിന്‍റെ കറാഹത്) ആണ്. എന്നാല്‍ ആ സമയത്ത് പാടില്ലാത്തത് പ്രത്യേക കാരണമില്ലാത്ത നിസ്കാരങ്ങളും (നിരുപാധിക സുന്നത് നിസ്കാരം, തസ്ബീഹ് നിസ്കാരം പോലെ) പിന്തിയ കാരണങ്ങളുള്ള നിസ്കാരങ്ങളും (ഇഹ്റാമിന്‍റെയും ഇസ്തിഖാറതിന്‍റെയും നിസ്കാരങ്ങള്‍ പോലെ) മാത്രമാണ്. മുന്തിയ കാരണമുള്ള നിസ്കാരങ്ങള്‍ നഷ്ടപ്പെട്ട ഫര്‍ദോ സുന്നതോ ആയ നിസ്കാരങ്ങള്‍ ഇവ ഈ സമയത്ത് നിര്‍വ്വഹിക്കല്‍ കറാഹതല്ല. മുന്തിയ കാരണമുള്ള നിസ്കാരങ്ങളെന്നാല്‍ വുദൂഇന്റെ രണ്ട് റക്അത് പോലെയാണ്. ആദ്യം വുദൂ എടുത്ത് പിന്നെ രണ്ട് റകഅത് നിസ്കാരം. പിന്തിയ കാരണമുള്ളത് എന്നാല്‍ ഇഹ്റാമിന്റെ രണ്ട് റക്അത് പോലോത്തതാണ്. ഇഹ്റാമിന്റെ മുമ്പാണ് ഈ രണ്ട് റകഅത് നിസ്കരിക്കേണ്ടത്. ആയതിനാല്‍ സുബ്ഹിന് ശേഷവും അതിന്റെ രണ്ട് റക്അത് റവാതിബ് നിസ്കാരം നിര‍്‍വ്വഹിക്കാം. നിസ്കാരം കറാഹതായ സമയങ്ങളറിയാന്‍ ഇവിടെ ക്ലിക്കു ചെയ്യുക. കൂടുതല്‍ അറിയാനും അത് അനുസരിച്ച് പ്രവര്‍ത്തിക്കാനും നാഥന്‍ തുണക്കട്ടെ.