ദേശീയ പാതയിൽ തന്നെ പ്രതിഷേധം തുടരുമെന്ന് ശാഹീൻബാഗിലെ സമരക്കാർ
ന്യൂഡല്‍ഹി: പൗരത്വ ഭേദഗതി നിയമത്തിനെതിരെ ശാഹീൻബാഗിൽ സ്ത്രീകളും കുട്ടികളും അടക്കം അണിനിരക്കുന്ന സമരം ഒരു മാസം പിന്നിടുന്നതിനിടെ ദേശീയ പാതയിൽ നിന്ന് മാറണമെന്ന കോടതിവിധി അനുസരിക്കില്ലെന്ന് സമരക്കാർ വ്യക്തമാക്കി.
സമരം നോയിഡ കാളിന്ദി കുഞ്ച് ദേശീത പാതയില്‍ തന്നെ തുടരുമെന്നും മറ്റൊരിടത്തേക്കും മാറില്ലെന്നും സമരക്കാർ പറഞ്ഞു. ഭരണഘടന സംരക്ഷിക്കലാണ് മറ്റെന്തിനെക്കാളും വലുതെന്നും സമരക്കാര്‍ പറഞ്ഞു. ഗതാഗതം തടസ്സപ്പെടുത്തി ഒരു മാസമായി നടക്കുന്ന സമരത്തിനെതിരെ ഡല്‍ഹി ഹൈകോടതിയില്‍ പൊതുതാല്‍പര്യ ഹരജി ഫയല്‍ ചെയ്തിരുന്നു.
ഇതില്‍ വാദം കേള്‍ക്കവെ പൊലീസിനോട് പൊതുജനങ്ങളുടെ ബുദ്ധിമുട്ടുകള്‍ കണക്കിലെടുത്ത് ഇക്കാര്യത്തില്‍ എന്തെങ്കിലും ചെയ്യാനാകുമോ എന്ന് പരിശോധിക്കാന്‍ കോടതി ആവശ്യപ്പെട്ടു. ഇതിന്‍റെ പശ്ചാത്തലത്തിലായിരുന്നു സമരക്കാരുടെ പ്രതികരണം.
അതേസമയം, സമരക്കാരെ ഒഴിപ്പിക്കാന്‍ സാധ്യതയുണ്ടെന്ന വാര്‍ത്ത വന്നതോടെ കഴിഞ്ഞ ദിവസങ്ങളില്‍ ആയിരക്കണക്കിന് ആളുകളാണ് ദിനേന ശഹീന്‍ബാഗില്‍ എത്തുന്നത്.
ജാമിഅ അതിക്രമത്തിന് ഒരുമാസം പിന്നിട്ട ബുധനാഴ്ച ഐക്യദാര്‍ഢ്യവുമായി കാമ്പസിലെത്തിയവര്‍ ശഹീന്‍ബാഗിലെ സമരപ്പന്തലിലും എത്തി.
Leave A Comment