കോവിഡ് വ്യാപനം: ശാഹീന്‍ബാഗിലെ സമരപന്തലുകൾ പൊളിച്ച്‌ നീക്കി
ന്യൂഡല്‍ഹി: കോവിഡ് 19 വ്യാപനം തടയുന്നതിനായി രാജ്യ തലസ്ഥാനമായ ഡൽഹിയിൽ ലോക്ക്ഡൗണ്‍ ഏര്‍പ്പെടുത്തിയതിന്റെ മറ പിടിച്ച് പൗരത്വഭേദഗതി നിയമത്തിനെതിരെയുള്ള സമരങ്ങളുടെ മുഖമായി മാറിയ ശാഹീന്‍ബാഗിലെ സമരപന്തലുകള്‍ പൊലീസ് പൊളിച്ച്‌ നീക്കി.
സമരപന്തലില്‍ നിന്നും മാറാന്‍ വിസമ്മതിച്ച പ്രതിഷേധക്കാരെ പൊലീസ് കസ്റ്റഡിയിലെടുത്തു.
കനത്ത പൊലീസ് സുരക്ഷയില്‍ ചൊവ്വാഴ്ച രാവിലെയാണ് പൊളിച്ചു മാറ്റല്‍ നടപടികള്‍ ആരംഭിച്ചത്. ശാഹീന്‍ബാഗ് ഏരിയയിലുള്ള എല്ലാ സമരപന്തലുകളും പൊളിച്ച്‌ മാറ്റിയിട്ടുണ്ട്. അടച്ചുപൂട്ടല്‍ നിര്‍ദേശം ലംഘിക്കുന്നവര്‍ക്കെതിരെ കര്‍ശന നടപടിയെടുക്കണമെന്ന് കേന്ദ്രസര്‍ക്കാര്‍ കഴിഞ്ഞ ദിവസം ഉത്തരവിട്ടിരുന്നു.
നേരത്തെ സമരം അവസാനിപ്പിക്കുവാൻ ഡൽഹി മുഖ്യമന്ത്രി അരവിന്ദ് കെജ്രിവാൾ നടത്തിയ അഭ്യർഥന സമരക്കാർ തള്ളിക്കളയുകയായിരുന്നു.
പൗരത്വ ഭേദഗതി നിയമം പിന്‍വലിച്ചാല്‍ മാത്രമേ സമരം അവസാനിപ്പിക്കൂ എന്നായിരുന്നു സമരക്കാരുടെ നിലപാട്.
സമരപന്തലില്‍ ഒരു സമയം അഞ്ച് പേര്‍ മാത്രമാക്കിയും 70 വയസിന് മുകളിലും പത്ത് വയസിന് താഴെയും പ്രായമുള്ളവരെ ഒഴിവാക്കിയും സമരക്കാര്‍ക്കായി ബഞ്ചുകളും സാനിറ്റൈസറുകളും സമരപന്തലില്‍ ഒരുക്കിയും നിശ്ചിത ഇടവേളകളില്‍ വേദി അണുവിമുക്തമാക്കുകയും ചെയ്തതടക്കമുള്ള വൈറസ് പ്രതിരോധ പ്രവർത്തനങ്ങൾ വേദിയിൽ നടത്തിയിരുന്നെങ്കിലും ഇതൊന്നും ഗൗനിക്കാതെയാണ് പോലീസ് സമരക്കാരെ ഒഴിപ്പിച്ചത്.
Leave A Comment