Islamonweb

അല്ലാഹുവിന്റെ തിരുനാമത്തില്‍, അവനാണ് സര്‍വ്വസ്തുതിയും. അന്ത്യപ്രവാചകരുടെയും കുടുംബത്തിന്റെയും മേല്‍ അല്ലാഹുവിന്റെ സ്വലാതും സലാമും വര്‍ഷിക്കുമാറാവട്ടെ. സിനിമ എന്നത് ചലചിത്രങ്ങളുടെ നിര്‍മ്മാണ വ്യവസായത്തെയോ ചലചിത്രങ്ങളെ മൊത്തമായോ സൂചിപ്പിക്കുന്ന പദമാണ്. ചലിച്ചു കൊണ്ടിരിക്കുന്ന ചിത്രങ്ങളുടെ ഒരു ശ്രേണിയാണല്ലോ ചലചിത്രം, ഫിലിം അല്ലെങ്കില്‍ മൂവീ എന്നെല്ലാം അറിയപ്പെടുന്നത്. ഇത് ഒരു മാധ്യമം മാത്രമാണ്. മറ്റേതൊരു മാധ്യമത്തെയും പോലെ ഇവ എന്തിന് ഉപയോഗിക്കുന്നു, എങ്ങനെ ഉപയോഗിക്കുന്നു എന്നതിനെ അടിസ്ഥാനപ്പെടുത്തിയാണ് അവ ഹറാമാണോ ഹലാലാണോ എന്ന് തീരുമാനിക്കേണ്ടത്. മഹിതമായ ഒരാശയം പ്രേക്ഷകരില്‍ എത്തിക്കുക എന്ന ലക്ഷ്യത്തോടെ അവയുടെ നിര്‍മ്മാണത്തിലും ആവിഷ്കാരത്തിലും നിഷിദ്ധമായ പ്രവൃത്തിയോ പ്രകടനങ്ങളോ ഇല്ലാതെ തെറ്റായ സ്വഭാവങ്ങളോടോ പ്രവൃത്തികളോടോ പ്രേക്ഷകരില്‍ പ്രേരണ ചെലുത്താത്ത ചലച്ചിത്രങ്ങള്‍ നിര്‍മ്മിക്കുന്നതും അതില്‍‍ അഭിനയിക്കുന്നതും അതു വീക്ഷിക്കുന്നതും ഹറാമാകുകയില്ല. അവ ഉദാഹരണങ്ങളിലൂടെ കാര്യങ്ങള്‍ മനസ്സിലാക്കികൊടുക്കുന്ന ഗണത്തിലാണു പെടുക. പരസ്പരം കാണലും സംസാരിക്കലും തന്നെ വിലക്കപ്പെട്ട സ്ത്രീകളുടെ നഗ്നതാ പ്രദര്‍ശനവും നിഷിദ്ധമായ സംഗീതവും സംഗീത ഉപകരണങ്ങളും പണ്ഡിതലോകം ഐകകണ്‍ഠ്യേന നിഷിദ്ധമെന്ന് പ്രഖ്യാപിച്ച നൃത്തവും മദ്യപാനത്തെയും വ്യഭിചാരത്തെയും പ്രോത്സാഹിപ്പിക്കുന്ന സീനുകളും അടങ്ങിയ ആധുനിക സിനിമകള്‍ നിസ്സംശയം ഹറാം തന്നെയാണ്. കൂടുതല്‍ അറിയാനും അതനുസരിച്ച് പ്രവര്‍ത്തിക്കാനും നാഥന്‍ തുണക്കട്ടെ