വിഷയം: മനിയ്യും നജസും
ഇന്ദ്രിയം (മനിയ്യ്) നജസിന്റെ ഗണത്തില് പെടുമോ ? മനിയ്യ് ആയ വസ്ത്രം ഉടുത്ത് നിസ്കാരം നിര്വഹിച്ചാല് നിസ്കാരം സഹീഹകുമോ?
ചോദ്യകർത്താവ്
മുഹമ്മദ് ഹാരിസ്
Aug 25, 2016
CODE :
അല്ലാഹുവിന്റെ തിരുനാമത്തില്, അവനാണ് സര്വ്വസ്തുതിയും, പ്രവാചകരുടെയും കുടുംബത്തിന്റെയും മേല് അല്ലാഹുവിന്റെ അനുഗ്രഹങ്ങള് വര്ഷിച്ചുകൊണ്ടിരിക്കട്ടെ. മനുഷ്യന്റെ ഇന്ദ്രിയം നജസ് അല്ലെന്നാണ്ശാഫീ മദ്ഹബിലെ പണ്ഡിതരുടെ പക്ഷം. മനിയ്യ് ആയ വസ്ത്രം ഉടുത്ത് നിസ്കരിക്കാവുന്നതാണ്. പ്രവാചകര് (സ)യുടെ വസ്ത്രത്തില് പറ്റിപ്പിടിച്ചിരുന്ന ഇന്ദ്രിയം താന് ചുരണ്ടിക്കൊടുക്കാറുണ്ടായിരുന്നെന്നും പ്രവാചകര് അത് ഉടുത്ത് നിസ്കരിക്കാറുണ്ടായിരുന്നുവെന്നും ആഇശ (റ) നിവേദനം ചെയ്യുന്ന ഹദീസില് കാണാവുന്നതാണ്. മറ്റുചില നിവേദനങ്ങളില്, ഉണങ്ങിയതാണെങ്കില് ചുരണ്ടുകയും ഉണങ്ങിയിട്ടില്ലെങ്കില് കഴുകുകയും ചെയ്യാറുണ്ടായിരുന്നു എന്നും കാണാവുന്നതാണ്. മേല്പറഞ്ഞതും സമാനവുമായ ഹദീസുകളുടെ വെളിച്ചത്തില്, ശാഫീ മദ്ഹബിലെയും ഹമ്പലീ മദ്ഹബിലെയും പണ്ഡിതര് മനിയ്യ് നജസ് അല്ലെന്നാണ് അഭിപ്രായപ്പെടുന്നത്. എന്നാല് ഹനഫീ മദ്ഹബിന്റെയും മാലികീ മദ്ഹബിന്റെയും അഭിപ്രായം മനിയ്യ് നജസാണെന്നാണ്. പക്ഷെ, ഉണങ്ങിയതാണെങ്കില് അത് കഴുകേണ്ടതില്ലെന്നും ചുരണ്ടിക്കളഞ്ഞാല് മതിയെന്നുമാണ് ഹനഫീ മദ്ഹബിന്റെ അഭിപ്രായം. കൂടുതലറിയാനും അതനുസരിച്ച് പ്രവര്ത്തിക്കാനും നാഥന് തൌഫീഖ് നല്കട്ടെ.
