Islamonweb

മലപ്പുറം: മലയാളത്തിൽ ഏറ്റവും വായനക്കാരുള്ള ഇസ്‍ലാമിക് വെബ്സൈറ്റ്, ഇസ്‌ലാം ഓൺ വെബ് കൂടുതൽ ഭാഷകളിലേക്ക് വ്യാപിക്കുന്നു. ഉര്‍ദു, കന്നഡ, ബംഗ്ല, തെലുഗു എന്നീ നാല് ഇന്ത്യന്‍ ഭാഷകളിലും കൂടിയാണ് വെബ്സൈറ്റ് ഇനി ലഭ്യമാവുക. ദാറുൽ ഹുദാ ഇസ്‌ലാമിക് യൂണിവേഴ്സിറ്റിയുടെ ഉറുദു ബിരുദധാരികളുടെ കൂട്ടായ്മയായ ഉര്‍ദു ഹാദിയയും ദാറുല്‍ ഹുദായുടെ കര്‍ണ്ണാടക, വെസ്റ്റ് ബംഗാള്‍, ആന്ധ്ര പ്രദേശ് കാമ്പസുകളിലെ വിദ്യാര്‍ത്ഥികളുമാണ് ഇതിന് മുന്‍കൈയ്യെടുക്കുന്നത്. ഈ ഭാഷകൾക്കു പുറമേ വെബ്സൈറ്റിന്റെ ഇംഗ്ലീഷ് വെര്‍ഷനും പണിപ്പുരയിലാണ്

പുതിയ വേർഷനുകളുടെ ലോഞ്ചിംഗ് കർമ്മം ഇന്ന് (15-08-20') രാത്രി 7.30 ന് (മക്ക സമയം: 10.00 pm)ന് നടക്കും. മിഷൻ സോഫ്റ്റ് ചെയർമാനായ സയ്യിദ് റശീദലി ശിഹാബ് തങ്ങളുടെ അദ്ധ്യക്ഷതയിലാണ് ലോഞ്ചിംഗ് നിർവഹിക്കുന്നത്. മംഗലാപുരം ഖാസി ത്വാഖ അഹ്മദ് മൗലവി, പ്രമുഖ തെലുങ്ക് ചരിത്രകാരൻ സയ്യിദ് നസീർ അഹ്മദ് സാഹിബ്, ബംഗാളിലെ പ്രശസ്ത ശാസ്ത്രകാരൻ മുൻകിർ ഹുസൈൻ സാഹിബ്, മുംബൈ കേന്ദ്രമായി പ്രവർത്തിക്കുന്ന സുന്നി ദഅവതെ ഇസ്‌ലാമി പ്രബോധകനും വിദ്യാഭ്യാസ വിചക്ഷണനുമായ ഖാരിഅ റിസ് വിൻ ഖാൻ എന്നിവർ പരിപാടിയിൽ പങ്കെടുക്കും.

2012 ജൂലൈ 27ന് തുടക്കം കുറിച്ച ഇസ്‌ലാം ഓൺ വെബ് പോര്‍ട്ടലിൽ നിലവിൽ മലയാളത്തിൽ മാത്രമാണ് ലഭ്യമാകുന്നത്. ഖുർആൻ ഓൺ വെബ്, ഫിഖ്ഹ് ഓൺവെബ്, സീറാ ഓൺവെബ്, മുസ്‌ലിംസ് ഓൺവെബ്, ലൈഫ് ഓൺ വെബ്, ഫത് വാ ഓൺവെബ്, റമദാൻ ഓൺവെബ്, ഹജ്ജ് ഓൺവെബ് എന്നിങ്ങനെ 8 സബ്പോര്‍ട്ടലുകളുമായി, ഏറ്റവും കൂടുതല്‍ ആളുകള്‍ അവലംബിക്കുന്ന, മലയാളത്തിലെ ഇസ്‍ലാമിക് വെബ്സൈറ്റായി വളര്‍ന്നിരിക്കുകയാണ് ഇസ്‌ലാം ഓൺവെബ്. ഉര്‍ദു, കന്നഡ, ബംഗ്ല, തെലുഗു എന്നീ ഭാഷകളിൽ കൂടി വെബ്സൈറ്റ് ലഭ്യമാകുന്നതോടെ ഇന്ത്യയിലെ ബഹുഭൂരിപക്ഷം മുസ്‌ലിം വായനക്കാരിലേക്കും എത്തിച്ചേരാമെന്നാണ് വെബ്സൈറ്റ് ശില്പികൾ ലക്ഷ്യമിടുന്നത്.