Islamonweb

അല്ലാഹുവിന്റെ തിരുനാമത്തില്‍, അവനാണ് സര്‍വ്വസ്തുതിയും, പ്രവാചകരുടെയും കുടുംബത്തിന്റെയും മേല്‍ അല്ലാഹുവിന്റെ അനുഗ്രങ്ങള്‍ വര്‍ഷിച്ചുകൊണ്ടിരിക്കട്ടെ. അല്ലാഹ് എന്ന ജലാലത്തിന്‍റെ ഇസ്മില്‍ അഞ്ചു അക്ഷരങ്ങളുണ്ട്. ആദ്യത്തേത് അലിഫ് ആണ്. അതിന്‍റെ ഉച്ചാരണം വ്യക്തമാണല്ലോ. ഇത് മുന്നെയുള്ള വാക്കുമായി കൂട്ടി വായിക്കുമ്പോള്‍ ഉച്ചരിക്കുകയില്ല. രണ്ടാമത്തെയും മൂന്നാമത്തെയും അക്ഷരങ്ങള്‍ ലാം ആകുന്നു. ആദ്യത്തെ ലാം രണ്ടാമത്തേതില്‍ ലയിപ്പിച്ച് രണ്ടാമത്തേത് ശദ്ദോടു കൂടിയാണ് ഉച്ചരിക്കുക. നാലാമത്തേത് ലാമിനെ നീട്ടാനുപയോഗിക്കുന്ന അലിഫും അഞ്ചാമത്തേത് ഹാഉം ആകുന്നു. ഇവിടെ ചോദ്യമുന്നയിച്ചിരിക്കുക മധ്യത്തിലുള്ള ശദ്ദുള്ള ലാമിന്‍റെ ഉച്ചാരണത്തെ കുറിച്ചായിരിക്കും. അത് ലാമിന്‍റെ മഖ്റജില്‍ നിന്നു തന്നെ ഉച്ചരിക്കണം. അഥവാ നാവിന്‍റെ തെല്ലും അതിനോടടുത്ത് നാവിന്‍റെ പാര്‍ശ്വങ്ങളില്‍ നിന്ന് അല്പവും മേലേ മുമ്പല്ലുകളുടെ മുരടോട് ചേര്‍ന്ന് ഉച്ചരിക്കണം. ജഹ്റ്, ബൈനിയ്യ, ഇസ്തിഫാല്‍, ഇന്ഫിതാഹ്, ദലാഖ എന്നീ സ്വിഫതുകള്‍ ലാമിനുണ്ട്. ജലാലത്തിന്‍റെ ഇസ്മിലെ ലാമിനു രണ്ടു അവസ്ഥകളുണ്ട്. തഫ്ഖീം, തര്‍ഖീഖ്. വായ നിറയെ ഉച്ചരിക്കുന്നതിനാണ് തഫ്ഖീം എന്നു പറയുന്നത്. ലാമിനെ തഫ്ഖീം ആക്കുമ്പോള്‍ ض നോട് സമാനമായ ശബ്ദമാണ് പുറപ്പെടുക. അഥവാ ലാമിന്‍റെ മഖ്റജില്‍ ഉച്ചരിക്കുകയും ض ന്‍റേതു പോലെയുള്ള ശബ്ദം വരികയും വേണം. ഇതു അല്ലാഹ് എന്ന പദത്തിനു മുമ്പുള്ള അക്ഷരത്തിനു ഫത്ഹോ ളമ്മോ ഉണ്ടാവുമ്പോഴാണ്. തര്‍ഖീഖാക്കുമ്പോള്‍ സാധാരണ ല ആയിട്ടു തന്നെ ഉച്ചരിക്കണം. ഇത് അല്ലാഹ് എന്ന പദത്തിനു മുമ്പുള്ള അക്ഷരത്തിനു കസ്റ് ആകുമ്പോഴാണ് ചെയ്യേണ്ടത്. കൂടുതല്‍ അറിയാനും അത് അനുസരിച്ച് പ്രവര്‍ത്തിക്കാനും നാഥന്‍ തുണക്കട്ടെ.