ബോളിവുഡ് നടി സനാഖാൻ സിനിമ ഉപേക്ഷിച്ചു, ആത്മീയതയിലേക്ക് തിരിയുന്നവെന്ന് താരം
മുംബൈ: ദംഗല്‍ താരം സൈറാ വസീമിന് പിന്നാലെ മറ്റൊരു മുസ്‌ലിം നടിയും സിനിമ വിട്ട് ആത്മീയതയുടെ പാത സ്വീകരിക്കുന്നു. പ്രമുഖ ടെലിവിഷന്‍ താരവും ബോളിവുഡ് നടിയുമായ സനാഖാനാണ് സിനിമയുടെ വെള്ളിവെളിച്ചത്തോടും ഗ്ലാമറിനോടും വിടപറഞ്ഞ് മതവിശ്വാസത്തിലേക്ക് തിരിയുന്നതായി പ്രഖ്യാപിച്ചത്. താന്‍ വിനോദ വ്യവസായത്തിന്റെ പടിയിറങ്ങുകയാണെന്നും ഷോ ബിസ് ജീവിതരീതിയോടും വിടപറയുകയാണെന്നു താരം തന്റെ ഇന്‍സ്റ്റാഗ്രാം അക്കൗണ്ടില്‍ കുറിച്ചു.
ചുവട്മാറ്റത്തിന്റെ ഭാഗമായി ഇന്‍സ്റ്റാഗ്രാം പേജില്‍ നിന്നും തന്റെ ഫോട്ടോകളും നൃത്ത വീഡിയോകളും താരം എടുത്തുമാറ്റിയിട്ടുണ്ട്. സിനിമാ ജീവിതം പ്രശസ്തിയും ബഹുമാനവും സമ്പത്തും നല്‍കി. എന്നാല്‍ ധനവും പ്രശസ്തിയും മാത്രമല്ല ലക്ഷ്യമെന്ന് ഇപ്പോള്‍ മനസ്സിലാക്കിയെന്നും താരം കുറിച്ചു.
ഇനി സൃഷ്ടാവിനെ അനുസരിച്ച്‌ മനുഷ്യരെ സേവിക്കുമെന്നും അതിന് കരുത്തു നല്‍കാന്‍ ദൈവത്തോട് തനിക്ക് വേണ്ടി എല്ലാവരും പ്രാര്‍ത്ഥിക്കണമെന്നും താരത്തിന്റെ കുറിപ്പില്‍ പറയുന്നു. സിനിമാ, ടെലിവിഷന്‍ മേഖലയിലെ അനേകം സഹപ്രവര്‍ത്തകരാണ് താരത്തിന് പിന്തുണ ആശംസിച്ച്‌ രംഗത്ത് വന്നത്. അഞ്ചു ഭാഷകളിലായി 14 സിനിമകള്‍ ചെയ്തിട്ടുള്ള താരം 50 പരസ്യ ചിത്രങ്ങളിലും അഭിനയിച്ചിട്ടുണ്ട്.
Leave A Comment