ഡോ. സഫറുല്‍ ഇസ്ലാം ഖാന് ജൂണ്‍ 22 വരെ ഇടക്കാല സംരക്ഷണം നല്‍കി ഡൽഹി ഹൈക്കോടതി
.jpeg)
ന്യൂഡല്‍ഹി:
ഇന്ത്യയിലെ ഇസ്ലാമോഫോബിയയെ അപലപിച്ച് രംഗത്തെത്തിയതിന് കുവൈത്തിന് നന്ദി പറഞ്ഞ് ട്വീറ്റ് ചെയ്തതിന്‍റ പേരില്‍ ഡല്‍ഹി പൊലീസ് രാജ്യദ്രോഹ കേസ് രജിസ്റ്റര്‍ ചെയ്ത ഡൽഹി ന്യൂനപക്ഷ കമീഷന്‍ ചെയര്‍മാന്‍ ഡോ. സഫറുല്‍ ഇസ്ലാം ഖാന് താൽക്കാലിക ആശ്വാസം.
രാജ്യദ്രോഹക്കേസിലെ നടപടികളില്‍ നിന്ന് ഡല്‍ഹി ഹൈകോടതി അദ്ദേഹത്തിന് ജൂണ്‍ 22 വരെ ഇടക്കാല സംരക്ഷണം നല്‍കി. ഖാനെതിരെ ഡല്‍ഹി പൊലീസിന്‍റ ഭാഗത്തുനിന്ന് നടപടി ഉണ്ടാകരുതെന്ന് ആവശ്യപ്പെട്ട ജസ്റ്റിസ് മനോജ് കുമാര്‍ ഓഹ്രിയുടെ ഹൈകോടതി സിംഗിള്‍ ബെഞ്ച് ജൂണ്‍ 22ന് കേസ് വീണ്ടും പരിഗണിക്കുന്നതിന് മുമ്പായി തല്‍സ്ഥിതി റിപ്പോര്‍ട്ട് സമര്‍പ്പിക്കാനും നിര്‍ദേശം നല്‍കി.
അതേസമയം ന്യൂനപക്ഷ കമീഷന്‍ അധ്യക്ഷ സ്ഥാനത്ത് നിന്ന് ഖാനെ പുറത്താക്കണമെന്ന് ആവശ്യപ്പെട്ട് സമര്‍പ്പിച്ച മറ്റൊരു ഹരജിയില്‍ ഹൈകോടതി ഡിവിഷന്‍ ബെഞ്ച് തീരുമാനം ഡല്‍ഹി സര്‍ക്കാറിന് വിട്ടു. സഫറുല്‍ ഇസ്ലാം ഖാന് വേണ്ടി അഡ്വ. വൃന്ദ ഗ്രോവര്‍ ഹാജരായി. യുക്തിസഹമായ സമയപരിധിക്കുള്ളില്‍ ഇക്കാര്യത്തില്‍ തീരുമാനമെടുക്കാന്‍ ഡല്‍ഹി സര്‍ക്കാറിന് നിര്‍ദേശം നല്‍കി ഹരജി തീര്‍പ്പാക്കുകയാണെന്ന് ജസ്റ്റിസുമാരായ രാജീവ് സഹായ് എന്‍ഡ്ലോ, സംഗീത ധിംഗ്ര എന്നിവരടങ്ങുന്ന ഡിവിഷന്‍ ബെഞ്ച് വ്യക്തമാക്കി.
Leave A Comment