ജാമിഅ അശ്റഫിയ്യ: ഇന്ത്യയുടെ അല്അസ്ഹര്
ഉത്തരേന്ത്യൻ മുസ്ലിം സമൂഹത്തിന്റെ വിദ്യാഭ്യാസ നവോത്ഥാന ചരിത്രത്തിൽ സ്വർണ്ണാക്ഷരങ്ങളിൽ രേഖപ്പെടുത്തപ്പെടേണ്ട മഹത്തായ സ്ഥാപനമാണ് ഉത്തർപ്രദേശിലെ അസംഗഡ് ജില്ലയിലെ മുബാറക്പൂരിലുള്ള ജാമിഅ അശ്റഫിയ്യ. ‘അസ്ഹറെ ഹിന്ദ്’ (ഇന്ത്യയുടെ അല്അസ്ഹര്) എന്ന് വിശേഷിപ്പിക്കപ്പെടുന്ന ഈ വിജ്ഞാനകേന്ദ്രം, ഒരു സാധാരണ ഗ്രാമീണ മദ്റസയായി ആരംഭിച്ച് ആഗോള തലത്തിൽ അംഗീകരിക്കപ്പെട്ട ഇസ്ലാമിക അക്കാദമിയായി വളർന്നത് ഏറെ കൗതുകകരമായ ചരിത്രമാണ്. ഇത് കേവലം ഒരു സ്ഥാപനത്തിന്റെ വളർച്ചയല്ല; മറിച്ച് പ്രതിസന്ധികളിലൂടെ കരുത്താർജ്ജിച്ച ഒരു സമുദായത്തിന്റെ ആത്മവിശ്വാസത്തിന്റെയും ബൗദ്ധിക ഉണർവിന്റെയും പ്രതീകം കൂടിയാണ്.
മിസ്ബാഹുൽ ഉലൂമിൽ നിന്ന് അശ്റഫിയ്യയിലേക്ക്
ബ്രിട്ടീഷ് ഇന്ത്യയുടെ അധീനതയിൽ മുസ്ലിം സമുദായം വിദ്യാഭ്യാസപരമായും സാംസ്കാരികമായും പിന്നാക്കം നിന്നിരുന്ന കാലഘട്ടത്തിലാണ് 1898-ൽ “മിസ്ബാഹുൽ ഉലൂം” എന്ന പേരിൽ ഈ മദ്റസയുടെ തുടക്കം. പ്രാഥമികമായി ഖുർആൻ പാരായണവും അടിസ്ഥാന ദീനി വിജ്ഞാനവും പകർന്നുനൽകുകയെന്ന ലക്ഷ്യത്തോടെ ആരംഭിച്ച ഈ സംരംഭം, ജനങ്ങളുടെ ആത്മാർത്ഥമായ പിന്തുണയിലാണ് നിലനിന്നത്. പിന്നീട് സ്ഥാപനത്തിന്റെ ദൗത്യവും ദിശയും വികസിച്ചപ്പോൾ, മഹാനായ സയ്യിദ് ഷാ അലി ഹുസൈൻ അശ്റഫി കിച്ചൗഛവിയോടുള്ള ആദരസൂചകമായി “അശ്റഫിയ്യ” എന്ന പേര് സ്വീകരിക്കപ്പെട്ടു. ആത്മീയതയും വിജ്ഞാനവും ഏകീകരിക്കുന്ന ഒരു വിദ്യാഭ്യാസ ദർശനത്തിന്റെ പ്രഖ്യാപനമായിരുന്നു ഈ നാമകരണം.
ഹാഫിസെ മില്ലത്ത്: നവോത്ഥാനത്തിന്റെ ശിൽപി
ജാമിഅ അശ്റഫിയ്യയുടെ യഥാർത്ഥ പരിവർത്തനഘട്ടം ആരംഭിക്കുന്നത് ഹാഫിസെ മില്ലത്ത് അല്ലാമാ അബ്ദുൽഅസീസ് മുറാദാബാദി 1934-ൽ പ്രിൻസിപ്പലായി ചുമതലയേറ്റതോടെയാണ്. ചെറിയ സാമ്പത്തിക ശേഷിയിലും പരിമിതമായ സൗകര്യങ്ങളിലും ഒതുങ്ങിനിന്ന സ്ഥാപനത്തെ അദ്ദേഹം തന്റെ ദീർഘവീക്ഷണവും സംഘടനാപാടവവും കൊണ്ട് ദേശീയതലത്തില് തന്നെ ശ്രദ്ധേയമായ വിദ്യാകേന്ദ്രമാക്കി ഉയർത്തി.
“ഐക്യം ജീവിതമാണ്, ഭിന്നത മരണമാണ്” എന്ന അദ്ദേഹത്തിന്റെ ദർശനം വിദ്യാഭ്യാസരംഗത്തും പ്രതിഫലിച്ചു. ദർസെ നിസാമി സിലബസിനെ കൂടുതൽ ശാസ്ത്രീയവും പ്രായോഗികവുമായ രീതിയിൽ പുനഃസംഘടിപ്പിക്കുകയും ഹദീസ്, ഫിഖ്ഹ്, മന്തിഖ് തുടങ്ങിയ വിഷയങ്ങളിൽ ആഴമുള്ള പഠനം ഉറപ്പാക്കുകയും ചെയ്തു. 1935-ൽ ബാഗെ ഫിർദൗസ് കെട്ടിടത്തിന്റെ ശിലാസ്ഥാപനം, ഈ നവോത്ഥാനത്തിന്റെ ദൃശ്യരൂപമായിരുന്നു. 1976-ൽ അദ്ദേഹം അന്തരിക്കുന്നതുവരെ, അശ്റഫിയ്യയെ അന്തർദേശീയ നിലവാരത്തിലേക്ക് ഉയർത്തിയ മഹത്തായ സേവനമാണ് അദ്ദേഹം നിർവഹിച്ചത്.
ആധുനിക കാമ്പസിലേക്കുള്ള വികസനം
സ്ഥലപരിമിതികൾ വളർച്ചയ്ക്ക് തടസ്സമായപ്പോൾ, 1972-ൽ നഗരത്തിന് പുറത്തായി വിശാലമായ കാമ്പസ് നിർമ്മിക്കാൻ തീരുമാനിച്ചു. പ്രമുഖ പണ്ഡിതന്മാരുടെ സാന്നിധ്യത്തിൽ ആരംഭിച്ച ഈ പദ്ധതി, ഇന്ന് 55 ഏക്കറിലധികം വ്യാപിച്ചുനിൽക്കുന്ന സമഗ്ര വിദ്യാഭ്യാസ നഗരമായി മാറിയിരിക്കുന്നു. പാരമ്പര്യ മദ്റസ സംവിധാനത്തെ ഒരു സമകാലീന സർവ്വകലാശാലാ മാതൃകയിലേക്ക് ഉയർത്തിയ ഈ കാമ്പസ്, ഉത്തരേന്ത്യയിലെ മുസ്ലിം വിദ്യാഭ്യാസ മുന്നേറ്റത്തിന്റെ സജീവ സാക്ഷ്യമാണ്.
വിദ്യാഭ്യാസക്രമം: പാരമ്പര്യവും ആധുനികതയും കൈകോർക്കുമ്പോൾ
ജാമിഅ അശ്റഫിയ്യയുടെ വിദ്യാഭ്യാസരീതി ദർസെ നിസാമിയ്യയുടെ ആഴവും ആധുനിക വിജ്ഞാനശാഖകളുടെ വ്യാപ്തിയും സംയോജിപ്പിച്ചതാണ്. 15 വർഷം ദൈർഘ്യമുള്ള പഠനക്രമത്തിൽ പ്രാഥമിക വിദ്യാഭ്യാസം മുതൽ ഉന്നത ഗവേഷണതലത്തിലെ തഖസ്സുസ് വരെയുള്ള ഘട്ടങ്ങൾ ഉൾക്കൊള്ളുന്നു.
അറബി, ഉർദു, പേർഷ്യൻ ഭാഷകളോടൊപ്പം ഇംഗ്ലീഷ്, ഹിന്ദി, സാമൂഹ്യശാസ്ത്ര വിഷയങ്ങൾ എന്നിവയും പഠിപ്പിക്കുന്നതിലൂടെ വിദ്യാർത്ഥികളെ സമകാലിക ലോകവുമായി സംവദിക്കാൻ പ്രാപ്തരാക്കുന്നു. ‘ഹാഫിസെ മില്ലത്ത് ഇൻസ്റ്റിറ്റ്യൂട്ട് ഓഫ് ഇൻഫർമേഷൻ ടെക്നോളജി’ വഴി സാങ്കേതിക വിദ്യാഭ്യാസവും നൽകപ്പെടുന്നു എന്നത്, മതവിദ്യാഭ്യാസവും ആധുനിക വിജ്ഞാനവും തമ്മിലുള്ള സമന്വയത്തിന്റെ മികച്ച ഉദാഹരണമാണ്.
ആഗോള അംഗീകാരവും അക്കാദമിക് ബന്ധങ്ങളും
‘അസ്ഹറെ ഹിന്ദ്’ എന്ന വിശേഷണം യാദൃശ്ചികമല്ല. ഈജിപ്തിലെ പ്രശസ്തമായ അൽ അസ്ഹർ സർവ്വകലാശാല അശ്റഫിയ്യയുടെ ബിരുദങ്ങൾക്ക് അംഗീകാരം നൽകുന്നു എന്നത് കൂടി ഈ വിശേഷണത്തിന്റെ നിദാനമാണ്. ഇതിലൂടെ വിദ്യാർത്ഥികൾക്ക് അന്താരാഷ്ട്ര തലത്തിൽ ഉന്നതപഠനത്തിനുള്ള വഴികൾ തുറക്കപ്പെടുന്നു.
അതോടൊപ്പം, അലിഗഡ് മുസ്ലിം സർവ്വകലാശാല, ജവഹർലാൽ നെഹ്റു സർവ്വകലാശാല, ജാമിഅ മില്ലിയ ഇസ്ലാമിയ, മൗലാനാ ആസാദ് നാഷണൽ ഉർദു സർവ്വകലാശാല എന്നിവിടങ്ങളിലും അശ്റഫിയ്യ ബിരുദധാരികൾക്ക് പ്രവേശനം ലഭിക്കുന്നു. മതവിദ്യാഭ്യാസവും സിവിൽ സർവീസ് പോലുള്ള മേഖലകളും തമ്മിലുള്ള ബന്ധം ശക്തിപ്പെടുത്തുന്നതിലും ജാമിഅ അശ്റഫിയ്യ സാന്നിധ്യമറിയിച്ചിട്ടുണ്ട്.
ദാറുൽ ഇഫ്തയും മജ്ലിസെ ശർഇയും: കാലാനുസൃത ഫിഖ്ഹ് ചിന്തകൾ
സമകാലിക പ്രശ്നങ്ങൾക്ക് ഇസ്ലാമിക കർമ്മശാസ്ത്ര പരിഹാരങ്ങൾ കണ്ടെത്തുന്നതിൽ അശ്റഫിയ്യയുടെ ദാറുൽ ഇഫ്താ സുപ്രധാനമാണ്. പ്രതിവർഷം നൂറുകണക്കിന് ചോദ്യങ്ങൾക്ക് മറുപടി നൽകുന്ന ഈ വിഭാഗം, വിശ്വാസം, ഇബാദത്ത്, സാമൂഹിക ഇടപെടലുകൾ എന്നിവയുമായി ബന്ധപ്പെട്ട വിഷയങ്ങൾ കൈകാര്യം ചെയ്യുന്നു.
1992-ൽ രൂപീകരിച്ച മജ്ലിസെ ശർഇ, ഇൻഷൂറൻസ്, ബാങ്കിംഗ്, അവയവമാറ്റ ശസ്ത്രക്രിയ, രക്തദാനം തുടങ്ങിയ ആധുനിക വിഷയങ്ങളിൽ ഗവേഷണപരമായ സമീപനമാണ് കൈക്കൊള്ളുന്നത്. “ദറൂറത്” (അനിവാര്യത) എന്ന ഫിഖ്ഹ് തത്വം ഉപയോഗിച്ച് കാലാനുസൃത പരിഹാരങ്ങൾ നിർദ്ദേശിക്കുന്നതിൽ ഈ സമിതിയുടെ സംഭാവന ശ്രദ്ധേയമാണ്.
വാസ്തുവിദ്യയും കാമ്പസ് സവിശേഷതകളും
അശ്റഫിയ്യയുടെ കാമ്പസ് വിജ്ഞാനത്തിന്റെ ദൃശ്യാവിഷ്കാരമാണ്. അസീസുൽ മസാജിദ് പോലുള്ള വിപുലമായ പള്ളി, സെൻട്രൽ അക്കാദമിക് ബ്ലോക്ക്, ബാഗെ ഫിർദൗസ് കെട്ടിടം, ഇമാം അഹമ്മദ് റസാ ലൈബ്രറി എന്നിവ വിദ്യാർത്ഥികളുടെ സമഗ്ര വളർച്ചയ്ക്ക് അനുയോജ്യമായ അന്തരീക്ഷം സൃഷ്ടിക്കുന്നു. ആയിരക്കണക്കിന് വിദ്യാർത്ഥികൾക്ക് താമസസൗകര്യമൊരുക്കുന്ന ഹോസ്റ്റലുകൾ, ഈ സ്ഥാപനത്തിന്റെ വ്യാപ്തിയും പ്രാധാന്യവും വ്യക്തമാക്കുന്നു.
ഇന്ത്യന് മുസ്ലിംകള്ക്ക് അറിവ് പകര്ന്ന് സാമൂഹ്യശാക്തീകരണം സാധ്യമാക്കുന്നതില് ഇത്തരം സ്ഥാപനങ്ങളുടെ പങ്ക് വളരെ വലുതാണ്. ഈ മഹദ് സംരംഭങ്ങള് ദീര്ഘകാലം നിലനില്ക്കട്ടെ എന്നും ഉത്തരോത്തരം പുരോഗതി പ്രാപിക്കട്ടെ എന്നും നമുക്ക് പ്രാര്ത്ഥിക്കാം.
Leave A Comment