കുളിപ്പിക്കാത്ത മയ്യിത്തിന് വേണ്ടി നിസ്കരിക്കാമോ? കോറോണ-നിപാ പോലെയുള്ള അസുഖങ്ങള്‍ ബാധിച്ച് മരണപ്പെട്ടവരെ കുളിപ്പിക്കാന്‍ കഴിയാതെ വന്നാല്‍ എന്തു ചെയ്യണം? കുളിപ്പിക്കുന്നില്ലെങ്കിൽ അവരുടെ മേൽ മയ്യിത്ത് നിസ്കാരമുണ്ടോ? ഇങ്ങനെയുള്ള സാഹചര്യത്തിൽ വല്ല ഇളവുകളും ഉണ്ടോ? വ്യക്തമായ മറുപടി തന്നാലും.

ചോദ്യകർത്താവ്

Saleem

Apr 1, 2020

CODE :Fiq9671

അല്ലാഹുവിന്‍റെ തിരുനാമത്തില്‍, അവനാണ് സര്‍വ്വസ്തുതിയും, മുഹമ്മദ് നബി (സ്വ)യിലും കുടുംബത്തിലും അനുചരന്മാരിലും അല്ലാഹുവിന്‍റെ സ്വലാത്തും സലാമും സദാ വര്‍ഷിക്കട്ടേ.

മയ്യിത്തിന് വേണ്ടി നിസ്കരിക്കണമെങ്കില്‍ മയ്യിത്തിനെ കുളിപ്പിച്ചുകഴിയണമെന്നത് നിബന്ധനയാണ്. ആയതിനാല്‍ കുളിപ്പിക്കാത്ത മയ്യിത്തിന്‍റെമേല്‍ നിസ്കരിക്കാന്‍ പാടില്ല.

മയ്യിത്തിന്‍റെ സാഹചര്യം കുളിപ്പിക്കാനോ തയമ്മും ചെയ്യാനോ സൌകര്യപ്പെടാത്തതാണെങ്കിലും നിസ്കരിക്കേണ്ടതില്ല എന്നതാണ് പ്രബലമായ അഭിപ്രായം. നിസ്കാരത്തിന് മുമ്പ് മയ്യിത്ത് കുളിപ്പിക്കപ്പെടുക/തയമ്മും ചെയ്യപ്പെടുക എന്ന നിബന്ധന ഇവിടെ പാലിക്കാന്‍ കഴിയാത്തത് കൊണ്ടാണ് നിസ്കരിക്കേണ്ടതില്ലെന്ന് പറയാന്‍ കാരണം (തുഹ്ഫ 4-176).

കുളിപ്പിക്കാന്‍ പറ്റാത്തതിന്‍റെ പേരില്‍ മയ്യിത്തിന്‍റെ മേല്‍ നിസ്കരിക്കാന്‍ കഴിഞ്ഞില്ലല്ലോ എന്നത് മയ്യിത്തിന് ഒരു കുറവായി നാം കരുതേണ്ടതില്ല. മഹാന്മാരായ ശുഹദാക്കളെ കുളിപ്പിക്കാതെയാണ് മറവു ചെയ്യേണ്ടത് എന്നതിനാല്‍ അവരുടെ പേരില്‍ മയ്യിത്ത് നിസ്കാരവുമില്ലല്ലോ. അത് ശുഹദാക്കളുടെ കുറവായി നാം കരുതാറുമില്ല.

എന്നാല്‍ ശര്‍ത്വ് പരിഗണിക്കാന്‍ കഴിയുമ്പോള്‍ മാത്രമേ അത് പരിഗണിക്കേണ്ടതുള്ളൂ എന്നും കുളിപ്പിക്കാന്‍ കഴിയാത്ത സാഹചര്യത്തില്‍ കുളിപ്പിച്ചില്ലെങ്കിലും മയ്യിത്ത് നിസ്കാരം നിര്‍വഹിക്കണമെന്നും അഭിപ്രായപ്പെട്ട പണ്ഡിതന്മാരുണ്ട്. മയ്യിത്തിന്‍റെ കുടുംബങ്ങളുടെ മനോനില പരിഗണിച്ചും മയ്യിത്തിനെ ആദരിക്കുന്നതിന്‍റെ ഭാഗമായും ഈ അഭിപ്രായം അനുകരിക്കലാവും ഉചിതമെന്ന് (ശര്‌വാനി 4-176) കാണാം.

കൂടുതല്‍ അറിയാനും അത് അനുസരിച്ച് പ്രവര്‍ത്തിക്കാനും അല്ലാഹു തൌഫീഖ് പ്രദാനം ചെയ്യട്ടേ.

ASK YOUR QUESTION

Voting Poll

Get Newsletter