Islamonweb

അല്ലാഹുവിന്റെ തിരുനാമത്തില്‍, അവനാണ് സര്‍വ്വസ്തുതിയും, പ്രവാചകരുടെയും കുടുംബത്തിന്റെയും മേല്‍ അല്ലാഹുവിന്റെ അനുഗ്രങ്ങള്‍ വര്‍ഷിച്ചുകൊണ്ടിരിക്കട്ടെ. വുദു ചെയ്യുമ്പോള്‍ നിര്‍ബന്ധമായ മുഴുവന്‍ അവയവങ്ങളും പൂര്‍ണ്ണമായി കഴുകി എന്ന് ഉറപ്പ് വരുത്തേണ്ടത് നിര്‍ബന്ധമാണ്. അതിന് വേണ്ടി എത്ര വെള്ളവും ഉപയോഗിക്കാവുന്നതാണ്. എന്നാല്‍ വെള്ളം പരമാവധി കുറച്ച് ഉപയോഗിച്ചുകൊണ്ട് വുദു ചെയ്യാനാണ് ശീലിക്കേണ്ടത്. അമിതമായ ഉപയോഗം ഒരു കാര്യത്തിലും ഇസ്ലാം അനുവദിക്കുന്നില്ല. ഒരു മുദ്ദ് വെള്ളം (ഏകദേശം 800 മി.ലിറ്റര്‍) കൊണ്ടാണ് പ്രവാചകര്‍ വുദു ചെയ്യാറുണ്ടായിരുന്നതെന്നും ഒരു സ്വാഅ് (ഏകദേശം 3.2 ലിറ്റര്‍) കൊണ്ടാണ് കുളിക്കാറുണ്ടായിരുന്നതെന്നും ഇമാം മുസ്ലിമും മറ്റു പണ്ഡിതരും നിവേദനം ചെയ്ത പല ഹദീസുകളിലും ഗ്രന്ഥങ്ങളിലും കാണാം. ജാബിര്‍(റ)വിനോട് ഒരിക്കല്‍ നിര്‍ബന്ധ കുളിയുടെ വെള്ളത്തെകുറിച്ച് ചോദിക്കപ്പട്ടപ്പോള്‍ ഒരു സ്വാഅ് മതി എന്ന് പറയുകയും അന്നേരം എനിക്ക് അത് തികയുന്നില്ലെന്ന് പറഞ്ഞ ഒരുത്തനോട് അദ്ദേഹം ദേഷ്യപ്പെട്ട്, നിന്നേക്കാള്‍ പൂര്‍ണ്ണനും കൂടുതല്‍ മുടിയുള്ളവരുമായിരുന്ന പ്രവാചകര്‍ (സ)ക്ക് അത് മതിയായിരുന്നുവെന്ന് പറഞ്ഞതും ഗ്രന്ഥങ്ങളില്‍ കാണാം. കടലില്‍ നിന്ന് വുദു ചെയ്യുകയാണെങ്കില്‍ പോലും മൂന്നില്‍ കൂടുതല്‍ പ്രാവശ്യം അവയവങ്ങള്‍ കഴുകല്‍ കറാഹതാണ് എന്ന കര്‍മ്മശാസ്ത്രനിയമവും ഇതിലേക്ക് തന്നെയാണ് വിരല്‍ ചൂണ്ടുന്നത്. കൂടുതല്‍ അറിയാനും അത് അനുസരിച്ച് പ്രവര്‍ത്തിക്കാനും നാഥന്‍ തുണക്കട്ടെ.