പൗരത്വ ഭേദഗതി ബിൽ പുന:പരിശോധിക്കണമെന്ന് ഐക്യരാഷ്ട്രസഭ
ജനീവ : മുസ്‌ലിം മതവിശ്വാസികളെ മാറ്റി നിർത്തി മറ്റു 6 മത വിശ്വാസികൾക്ക് പൗരത്വം നൽകാൻ അനുമതി നൽകുന്ന പൗരത്വ ഭേദഗതി ബില്ലിൽ പ്രതികരണവുമായി ഐക്യരാഷ്ട്രസഭ. പൗരത്വം നല്‍കുന്നതില്‍ നിന്ന് മുസ്‌ലിംകളെ ഒഴിവാക്കിയത് പുന:പരിശോധിക്കണമെന്നും യുഎന്‍ ആവശ്യപ്പെട്ടു.
യുഎന്നിന്‍റെ മനുഷ്യാവകാശ വിഭാഗമാണ് നിയമത്തിനെതിരെ രംഗത്തെത്തിയത്. ഇതുമായി ബന്ധപ്പെട്ട മനുഷ്യാവകാശ പ്രശ്‌നങ്ങളെക്കുറിച്ചും ബന്ധപ്പെട്ടവര്‍ ആശങ്ക അറിയിച്ചിട്ടുണ്ടെന്നും യു.എന്‍ സെക്രട്ടറി ജനറല്‍ അന്റോണിയോ ഗുട്ടറസിന്റെ ഡെപ്യൂട്ടി വക്താവ് ഫറാ ഹഖ് വ്യക്തമാക്കി.
പൗരത്വ ഭേദഗതി ബില്ലിന്റെ പ്രത്യാഘാതങ്ങളെ കുറിച്ച്‌ പരിശോധിച്ച്‌ വരികയാണെന്നും ബില്ലിനെ കുറിച്ച്‌ പൊതുസമൂഹം ഉയര്‍ത്തുന്ന ആശങ്ക യു.എന്നിനുമുണ്ടെന്നും സെക്രട്ടറി ജനറല്‍ അന്റോണിയോ ഗുട്ടറസ് പറഞ്ഞു.
വിവേചനപരമായ പൗരത്വ നിയമ ഭേദഗതി സുപ്രീം കോടതി തിരുത്തുമെന്നാണ് പ്രതീക്ഷയെന്നും അന്താരാഷ്ട്ര മനുഷ്യാവാകാശ നയങ്ങള്‍ക്കനുസരിച്ച്‌ ഇന്ത്യ പ്രവര്‍ത്തിക്കുമെന്നാണ് പ്രതീക്ഷിക്കുന്നതെന്നും അദ്ദേഹം പറഞ്ഞു.
Leave A Comment