Islamonweb

സത്യനിഷേധികള്‍ പരലോകത്ത് നേരിടുന്ന ശിക്ഷയെക്കുറിച്ചാണല്ലോ കഴിഞ്ഞ പേജില്‍ അവസാനമായി പറഞ്ഞിരുന്നത്. ഇനി സത്യവിശ്വാസം സ്വീകരിക്കുകയും സല്‍ക്കര്‍മങ്ങള്‍ ചെയ്യുകയും ചെയ്ത സജ്ജനങ്ങള്‍ക്ക് അല്ലാഹു പരലോകത്ത് നല്‍കുന്ന ചില അനുഗ്രഹങ്ങളെക്കുറിച്ചാണ് പറയുന്നത്.

 

وَبَشِّرِ الَّذِينَ آمَنُوا وَعَمِلُوا الصَّالِحَاتِ أَنَّ لَهُمْ جَنَّاتٍ تَجْرِي مِنْ تَحْتِهَا الْأَنْهَارُ كُلَّمَا رُزِقُوا مِنْهَا مِنْ ثَمَرَةٍ رِزْقًا قَالُوا هَذَا الَّذِي رُزِقْنَا مِنْ قَبْلُ وَأُتُوا بِهِ مُتَشَابِهًا وَلَهُمْ فِيهَا أَزْوَاجٌ مُطَهَّرَةٌ وَهُمْ فِيهَا خَالِدُونَ (25)

സത്യവിശ്വാസം കൈക്കൊള്ളുകയും സല്‍കര്‍മങ്ങളനുഷ്ഠിക്കുകയും ചെയ്തവര്‍ക്ക് താങ്കള്‍ സന്തോഷവാര്‍ത്ത അറിയിക്കുക: നിശ്ചയം അവര്‍ക്ക് ചില സ്വര്‍ഗങ്ങളുണ്ട്. അവയുടെ താഴ്ഭാഗങ്ങളില്‍ കൂടി നദികള്‍ ഒഴുകിക്കൊണ്ടിരിക്കുന്നുണ്ട്. അതില്‍ അവര്‍ക്ക് കഴിക്കാനായി ഓരോ കനി നല്‍കപ്പെടുമ്പോഴും 'ഇത് ഞങ്ങള്‍ക്ക് നേരത്തെ തന്നിരുന്നുവല്ലോ എന്നവര്‍ പ്രതികരിക്കും. സത്യത്തില്‍ രൂപസാദൃശ്യമുള്ളതായി അത് നല്‍കപ്പെടുകയാണ്. അവര്‍ക്കവിടെ പരിശുദ്ധരായ ഇണകളുമുണ്ടാകും. അതിലവര്‍ നിത്യവാസികളായിരിക്കുന്നതാണ്.

 

നരകത്തെപ്പോലെത്തന്നെ സ്വര്‍ഗവും അദൃശ്യലോകത്തില്‍ പെട്ട കാര്യമാണല്ലോ. അതുകൊണ്ടുതന്നെ അത് സംബന്ധിച്ച് അല്ലാഹുവും റസൂലും എന്ത് പറഞ്ഞുവോ അതങ്ങനെത്തന്നെ വിശ്വസിക്കുകയാണ് നമ്മള്‍ ചെയ്യേണ്ടത്. യുക്തിക്കോ അനുമാനങ്ങള്‍ക്കോ അവിടെ  സ്ഥാനമേയില്ല.

 

സ്വര്‍ഗം സംബന്ധിച്ച് ഖുര്‍ആനിലും ഹദീസിലും പല വിരണങ്ങളുമുണ്ട്. സ്വര്‍ഗത്തിലെ അനുഗ്രഹങ്ങളും ആനന്ദാനുഭൂതികളുമെല്ലാം ഈ ലോകത്തുള്ളവയേക്കാള്‍ എത്രയോ ഉന്നതവും ഉല്‍കൃഷ്ടവുമാണ്. നമ്മുടെ ബുദ്ധിക്കും ചിന്തക്കും അറിവിനുമെല്ലാം അതീതമാണ് അവിടത്തെ സുഖാനുഭൂതികളും മറ്റുമെല്ലാം.

 

ഇബ്‌നു അബ്ബാസ് (رضي الله عنهما) പറഞ്ഞിട്ടുണ്ടല്ലോ: ليس في الدنيا من الجنة شيء إلا الأسماء – ابن جرير وغيره (സ്വര്‍ഗത്തിലുള്ള വസ്തുക്കളൊന്നും ഇവിടെ ഇല്ല; പേരുകളല്ലാതെ).

 

അതായത് മാതളം, കട്ടില്‍, മാംസം, മദ്യം, അരുവി, പുഴ ഇങ്ങനെ പേരുകളില്‍ മാത്രമല്ലാതെ വേറെയൊന്നിലും യാതൊരു സാദൃശ്യവുമില്ല. സ്വര്‍ഗത്തിലെ വസ്തുക്കളെയും അവസ്ഥകളെയും കുറിച്ച് പറയുമ്പോള്‍ ഈയൊരു കാര്യം എപ്പോഴും ഓര്‍മ വേണം. നരകത്തിന്‍റെ കാര്യവും ഇങ്ങനെതന്നെ. ഈ ലോകത്തെ വസ്തുക്കളുമായി അതിനെയൊന്നും താരതമ്യം ചെയ്യരുത്.

 

നിരവധി ക്വുര്‍ആന്‍ വചനങ്ങളിലും ഹദീസുകളിലും ഇതുസംബന്ധമായ പരാമര്‍ശമുണ്ട്.

 

عَنْ أَبِي هُرَيْرَةَ رَضِيَ اللَّهُ عَنْهُ عَنْ النَّبِيِّ صَلَّى اللَّهُ عَلَيْهِ وَسَلَّمَ : ( يَقُولُ اللَّهُ تَعَالَى : أَعْدَدْتُ لِعِبَادِي الصَّالِحِينَ مَا لَا عَيْنٌ رَأَتْ وَلَا أُذُنٌ سَمِعَتْ وَلَا خَطَرَ عَلَى قَلْبِ بَشَرٍ ذُخْرًا بَلْهَ مَا أُطْلِعْتُمْ عَلَيْهِ ) ، ثُمَّ قَرَأَ ( فَلَا تَعْلَمُ نَفْسٌ مَا أُخْفِيَ لَهُمْ مِنْ قُرَّةِ أَعْيُنٍ جَزَاءً بِمَا كَانُوا يَعْمَلُونَ ) .رواه البخاري ( 3072 ) ومسلم ( 2824 ) وعنده : ( بَلْهَ مَا أَطْلَعَكُمْ اللَّهُ عَلَيْهِ ) .

സ്വര്‍ഗം – ഒരു കണ്ണും കാണാത്തത്, ഒരു കാതും കേള്‍ക്കാത്തത്, മനുഷ്യന് സങ്കല്‍പിക്കാന്‍ പോലും കഴിയാത്തത്...

 

സ്വര്‍ഗത്തില്‍ തന്നെ എല്ലാവരും ഒരേ ലെവലില്ല. നൂറ് ദറജകളുണ്ടല്ലോ. ഓരോരുത്തരും അവരവരുടെ അമലുകളനുസരിച്ച് വേറെ വേറെ ലെവലുകളിലായിരിക്കും.

 

ഇവിടത്തന്നെ അങ്ങനെയല്ലേ, വ്യത്യസ്ത ശമ്പള സ്കെയലുകള്‍, ഗ്രേഡുകള്‍.

 

പലപ്പോഴും കുറച്ചുകൂടി ഉയര്‍ന്നു പഠിച്ചാല്‍ മതിയായിരുന്നു എന്നൊക്കെ തോന്നാറുണ്ടല്ലോ. അതുപോലെ സ്വര്‍ഗത്തിലെത്തിയാലും തോന്നും, കുറച്ചുകൂടെ സല്‍കര്‍മങ്ങള്‍ ചെയ്യാമായിരുന്നു, ഖുര്‍ആന്‍ ഓതാമായിരുന്നു, പഠിക്കാമായിരുന്നു...

 

ദുന്‍യാവിലാണെങ്കില്‍ ഉയര്‍ന്നുപഠിക്കാനും ഗ്രേഡ് കൂട്ടാനും പ്രമോഷന്‍ നേടാനുമൊക്കെ കഴിഞ്ഞേക്കാം. പക്ഷേ, സ്വര്‍ഗത്തില്‍ അത് പറ്റില്ല. ഇവിടെ നിന്നേ റെഡിയാകണം. സ്വര്‍ഗം കര്‍മങ്ങള്‍ ചെയ്യാനുള്ള സ്ഥലമല്ലല്ലോ. ചെയ്തതിന് പ്രതിഫലം വാങ്ങാനുള്ള സ്ഥലമല്ലേ.

 

സൂറത്തു യാസീനിലും വാഖിഅയിലും മറ്റുപലയിടത്തും സ്വര്‍ഗത്തെയും സുഖാനുഭൂതികളെയും കുറിച്ച് അതിമനോഹരമായി അല്ലാഹു പറഞ്ഞുതരുന്നുണ്ട്

 

كُلَّمَا رُزِقُوا مِنْهَا مِنْ ثَمَرَةٍ رِزْقًا قَالُوا هَذَا الَّذِي رُزِقْنَا مِنْ قَبْلُ وَأُتُوا بِهِ مُتَشَابِهًا

വ്യത്യാസം തിരിച്ചറിയാന്‍ കഴിയാത്തവിധം പരസ്പരം സാദൃശ്യമുള്ളതായത് കൊണ്ടാണിങ്ങനെ പറഞ്ഞത്. അതായത്, രൂപത്തിലും വര്‍ണത്തിലുമൊക്കെ ആ കനികള്‍ ഒരു പോലെയിരിക്കും. രുചിയിലും സ്വാദിലുമാകട്ടെ, വ്യത്യസ്തങ്ങളുമായിരിക്കും. ദൃഷ്ടിയില്‍ പെടുന്നത് ആകൃതിയും വര്‍ണവുമായിരിക്കുമല്ലോ.

 

വിവിധ തരം പഴങ്ങള്‍, വ്യത്യസ്ത രുചികള്‍

 

സ്വര്‍ഗത്തിലെ വൃക്ഷങ്ങള്‍, ഫലങ്ങള്‍ എന്നിവയെക്കുറിച്ച് ഖുര്‍ആനിലും ഹദീസിലും ധാരാളം വിവരണങ്ങളുണ്ട്.

 

كُلَّمَا رُزِقُوا مِنْهَا مِنْ ثَمَرَةٍ رِزْقًا قَالُوا هَذَا الَّذِي رُزِقْنَا مِنْ قَبْلُ وَأُتُوا بِهِ مُتَشَابِهًا

 

വിവിധ തരത്തിലും ടേസ്റ്റിലുമുള്ള പഴങ്ങള്‍. സ്വര്‍ഗത്തില്‍ വിശന്നിട്ടല്ല, രസത്തിനു വേണ്ടി മാത്രം.

 

വേണമെന്ന് തോന്നുമ്പോ കിട്ടും. തോന്നുമ്പോള്‍ കിട്ടേണ്ടേ, അതല്ലേ രസം. അല്ലാത്തപ്പോ കിട്ടിയിട്ടെന്തു കാര്യം. അല്ലെങ്കില്‍ ഉണ്ടാക്കാന്‍ കുറേ സമയമെടുക്കും. കാത്തിരുന്നിട്ട് ഉദ്ദേശിച്ച സമയത്ത് കിട്ടൂലാ.. ഇതൊന്നും സ്വര്‍ഗത്തിലില്ല.

 

അല്ലെങ്കില്‍ തിന്നണമെന്ന് തോന്നും, പക്ഷേ, ആ കാലത്ത് കിട്ടുകയില്ല. സ്വര്‍ഗത്തിലങ്ങനെ ഇല്ലേയില്ല. എല്ലാ കാലവും സമൃദ്ധമായി ലഭിച്ചുകൊണ്ടിരിക്കും. സീസണൊന്നുമില്ല.

വേണ്ടത് വേണ്ടപ്പോള്‍ റെഡിയാണ്. സൂറത്തുല്‍ വാഖിഅയിലും സൂറത്തുര്‍റഹ്‍മാനിലും മറ്റുമെല്ലാം ഈ വിഷയം പറഞ്ഞിട്ടുണ്ട്.

 

ഇവിടെയുള്ള എല്ലാ പഴങ്ങളും അല്ലാത്തതും കിട്ടും. പക്ഷേ, വേറെ രൂപം, രുചികള്‍. കണ്ടാല്‍ ഒരേ പോലെയൊന്ന് തോന്നും..

 

ഒരു പാട് പഴങ്ങള്‍, എണ്ണിത്തിട്ടപ്പെടുത്താന്‍ കഴിയില്ല, പോയി പറിച്ചുതിന്നണ്ട, വേണമെന്നു തോന്നുമ്പോഴേക്ക് അടുത്തുവരും. ഏതവസ്ഥയിലാണോ നമ്മള്‍ അങ്ങനെ അടുത്തുവരും, കിടക്കുകയോ ഇരിക്കുകയോ നില്‍ക്കുകയോ എങ്ങനെയോ ആകട്ടെ, പഴങ്ങള്‍ അടുത്തുവരും.

ഇങ്ങനെ എല്ലാംകൂടി തിന്നതുകൊണ്ട് വല്ല അസുഖവും വരുമെന്ന് പേടിക്കാനുണ്ടോ, തിന്നുതിന്ന് മടുക്കുമോ? ഏയ്, ഇല്ല. സ്വര്‍ഗമല്ലേ...

 

തീര്‍ന്നുപോകുമോ, കിട്ടാതാകുമോ, ഏതെങ്കിലും കഴിക്കാന്‍ പറ്റാതാകുമോ - ഇങ്ങനെ ഒരു പേടിയും വേണ്ട.

 

ഇങ്ങനെയൊക്കെയാണ് സ്വര്‍ഗം. ദുന്യാവിലെ സ്വഭാവങ്ങളൊന്നുമുണ്ടാകില്ല.

 

وَلَهُمْ فِيهَا أَزْوَاجٌ مُطَهَّرَةٌ

 

زَوْجْ എന്നതിന്‍റെ ബഹുവചനമാണ് أَزْوَاج. ഇണകള്‍ എന്നാണ് വാക്കര്‍ത്ഥം. എല്ലാതരം ഇണകള്‍ക്കും ജോഡികള്‍ക്കും അത് ഉപയോഗിക്കും. ഇവിടെ ഉദ്ദേശ്യം ഭാര്യമാരാണ്.

 

പരിശുദ്ധകളായ ഇണകള്‍ എന്ന് പറഞ്ഞാല്‍, ആത്മികമായ, ശാരീരികമായ, പ്രകൃതിപരമായ, സ്വഭാവപരമായ, സൗന്ദര്യപരമായ എല്ലാതരം വൈകല്യങ്ങളില്‍ നിന്നും മാലിന്യങ്ങളില്‍ നിന്നും ശുദ്ധരായവര്‍ എന്ന് മൊത്തത്തില്‍ മനസ്സിലാക്കാം. 

 

സ്വര്‍ഗീയ സ്ത്രീകളുടെ അതുല്യ സൗന്ദര്യം വര്‍ണിക്കുന്ന, അവരുടെ നിഷ്‌കളങ്ക സ്വഭാവഗുണങ്ങള്‍ വിവരിക്കുന്ന, അവിടത്തെ മനോഹരമായ ദാമ്പത്യ ജീവിതം വര്‍ണിക്കുന്ന പല ഖുര്‍ആന്‍ വാക്യങ്ങളും ഹദീസുകളുമുണ്ട്.  

 

ചിപ്പികളില്‍ പാത്തുവെച്ച മുത്തു പോലെ, വിശാലാക്ഷികളായ വെളുത്ത സുന്ദരികള്‍, ഭര്‍ത്താക്കളെ സ്നേഹിക്കുന്ന, നിത്യകന്യകകളായ, തുല്യപ്രായക്കാരായ പരിശുദ്ധ വനിതകള്‍. സ്വര്‍ഗത്തിലെ ആണുങ്ങളും പെണ്ണുങ്ങളമൊക്കെ അതിസൌന്ദര്യമുള്ളവരാണ്. സൌന്ദര്യം വര്‍ധിച്ചുകൊണ്ടേയിരിക്കും.

ഇതൊക്കെ ആണുങ്ങള്‍ക്കു മാത്രമേയുള്ളൂ, പെണ്ണുങ്ങള്‍ക്കൊന്നുമില്ലേ? ഉണ്ട്, നല്ല സുന്ദരന്മാരും ക്ഷമതയുമുള്ള പുതിയാപ്പിളമാരെ അവര്‍ക്കും കിട്ടും.

ഇവിടെ അത് പറഞ്ഞില്ലെന്നെയുള്ളൂ. പറയാത്തതിന് പല കാരണങ്ങളുമുണ്ട്. താല്പര്യമാണ് മുഖ്യകാരണം. സൃഷ്ടിപ്പിനനുസരിച്ച് ആണുങ്ങള്‍ക്ക് പെണ്ണുങ്ങളോടാണല്ലോ താല്‍പര്യം, അതുവെച്ച് ആഗ്രഹിപ്പിക്കുകയാണ്.  

ഇണകളായി ദുന്‍യാവിലുണ്ടായിരുന്ന ഭാര്യമാരെയും കിട്ടും, ഹൂറുല്‍ഈങ്ങളെയും കിട്ടും. ഇവിടെയുള്ളവരെയും കിട്ടുമെന്ന് കേള്‍ക്കുമ്പോള്‍ ബേജാറാകേണ്ടതില്ല, ദുന്‍യാവിലെ ഒരു ദുസ്സ്വഭാവും ഇല്ലാതെ സ്ഫുടം ചെയ്തെടുക്കപ്പെട്ടവരായിരിക്കുമവര്‍. എന്നുമാത്രമല്ല, ഹൂറുല്‍ ഈങ്ങളേക്കാള്‍ ഇവിടത്തെ പെണ്ണുങ്ങള്‍ക്കായിരിക്കുമത്രെ സൌന്ദര്യം കൂടുതല്‍. കൂടുതല്‍ ചൊറുക്കെന്ന് മാത്രമല്ല, ഹുറുല്‍ ഈങ്ങളുടെ രാഞ്ജിയായിരിക്കും ഇവിടത്തെ സ്ത്രീകള്‍.

 

ഈ ഇണകള്‍ വെറും ആനന്ദത്തിനാണ്. സന്താനോല്‍പാദനത്തിനോ മറ്റോ അല്ല. സ്വര്‍ഗത്തില്‍ സന്താനോല്പാദനമുണ്ടാകില്ലല്ലോ. കുട്ടി ഉണ്ടാകാനോ ദുന്‍യാവിലേക്കൊന്ന് തിരിച്ചുപോകാനോ ആരും ആഗ്രഹിക്കില്ല.

وقَالَ الإمام إِسْحَقُ اِبْنُ رَاهْوَيْهِ َرحمه الله فِي حَدِيثِ النَّبِيِّ صَلَّى اللَّهُ عَلَيْهِ وَسَلَّمَ : ( إِذَا اشْتَهَى الْمُؤْمِنُ الْوَلَدَ فِي الْجَنَّةِ كَانَ فِي سَاعَةٍ وَاحِدَةٍ كَمَا يَشْتَهِي ) قال : وَلَكِنْ لَا يَشْتَهِي .

 

وَهُمْ فِيهَا خَالِدُونَ

 

ശാശ്വതരാണ് സ്വര്‍ഗത്തില്‍. നിരന്തരം, എല്ലായ്പ്പോഴും വിവിധ തരം സുഖാഢംബരങ്ങള്‍ ആസ്വദിക്കുന്നവരാണ്. സ്വര്‍ഗത്തില്‍ പ്രവേശിക്കുന്നവര്‍ ഒരിക്കലും പുറത്തുപോരേണ്ടിവരില്ല.

 

അല്ലാഹു പറയുന്നു: 'അവര്‍ അതില്‍ നിന്ന് പുറത്താക്കപ്പെടുകയില്ല' (അല്‍ഹിജ്ര്‍ 48).

لَا يَمَسُّهُمْ فِيهَا نَصَبٌ وَمَا هُم مِّنْهَا بِمُخْرَجِينَ (48)

 

'അതില്‍ നിന്ന് മാറിപ്പോകാന്‍ അവരാഗ്രഹിക്കയുമില്ല' (അല്‍കഹ്ഫ് 108).

خَالِدِينَ فِيهَا لَا يَبْغُونَ عَنْهَا حِوَلًا (108) 

 

തിരുനബി (صَلَّى اللَّهُ عَلَيْهِ وَسَلَّمَ) പറയുന്നു: ‘സ്വര്‍ഗക്കാര്‍ സ്വര്‍ഗത്തിലും നരകക്കാര്‍ നരകത്തിലും പ്രവേശിക്കും. പിന്നീട് ഒരാള്‍ ഉച്ചത്തില്‍ പ്രഖ്യാപിക്കും: നരകക്കാരേ, മരണമില്ല; സ്വര്‍ഗക്കാരേ, മരണമില്ല, എല്ലാവരും അതതില്‍ നിത്യവാസികളായിരിക്കും.’(ബുഖാരി, മുസ്‌ലിംرحمة الله عليهما )

 

സ്വര്‍ഗത്തിലെ ഏറ്റവും വലിയ സുഖമെന്താണെന്നറിയാമോ? സാക്ഷാല്‍ റബ്ബിനെ കാണല്‍തന്നെ. പൂര്‍ണ ചന്ദ്രനെ കാണുന്നതുപോലെ കാണാം. തിക്കോ തിരക്കോ കൂട്ടണ്ടതില്ല. വല്ലാത്ത ആനന്ദാനുഭൂതിയായിരിക്കും ആ ലിഖാഇന്. മറ്റെല്ലാ എല്ലാ സുഖങ്ങളും മറക്കും.

 

നിര്‍വചിക്കാനാകാത്ത ആത്മ സായൂജ്യത്തിന്‍റെ ആകാശപ്പരപ്പില്‍ അല്ലാഹുവിനെ നേരില്‍ കാണുന്ന ആ മുഹൂര്‍ത്തം ഓര്‍ത്താല്‍ ഒരു നിമിഷം പോലും റബ്ബിനെ മറന്നിരിക്കാന്‍ നമുക്കാവില്ല. അത് വല്ലാത്തൊരു പ്രതീക്ഷയാണ്. ആ പ്രതീക്ഷ നമ്മുടെ ചിന്തകളില്‍ മാറ്റം  വരുത്തട്ടെ. അല്ലാഹുവേ, നിന്നെ കണ്ടു നില്‍ക്കുന്ന ഭാഗ്യവാന്മാരില്‍ ഞങ്ങളെയും ചേര്‍ത്തുതരേണമേ-ആമീന്‍.

 

സ്വര്‍ഗത്തില്‍ ഭൂരിഭാഗവും നമ്മള്‍ ഈ ഉമ്മത്തുതന്നെയാണ്. സ്വര്‍ഗാവകാശികള്‍ 120 നിരകളാണെന്നും, അതില്‍ 80 നിരകളും ഈ ഉമ്മത്തില്‍ പെട്ടവരും ബാക്കി 40 നിരകള്‍ മറ്റു സമുദായങ്ങളില്‍ പെട്ടവരുമാണെന്ന് തിരുനബി  صلى الله عليه وسلمപറഞ്ഞിട്ടുണ്ട്. നമ്മളെ അവിടെ വേറെത്തന്നെ തിരിച്ചറിയുകയും ചെയ്യുമെന്നും ഹദീസിലുണ്ട്.

 

നമുക്കെന്തായാലും ആ കൂട്ടത്തില്‍ പെടണം. അതിനായി നമ്മള്‍ പരിശ്രമിക്കണം. തിരുനബി صلى الله عليه وسلم  സ്വഹാബത്തിനെ നന്നായി പ്രോത്സാഹിപ്പിച്ചിരുന്നു, സ്വര്‍ഗം കണ്ണില്‍ കാണുന്ന പോലെ വിവരിച്ചുകൊടുക്കുമായിരുന്നു.

ഉമൈര്‍(رضي الله عنه) കൈയിലുള്ള കാരക്ക വലിച്ചെറിഞ്ഞ് വേഗം ഓടിപ്പോയി ബദ്റില്‍ ശഹീദായി... തിന്നാന്‍ സമയമെടുക്കൂലേ, അത്രയും നേരത്തെ സ്വര്‍ഗത്തിലെത്താമല്ലോ.

 

നമ്മളൊക്കെ സ്വര്‍ഗത്തെക്കുറിച്ച് പറയുമ്പോഴും കേള്‍ക്കുമ്പോഴും ഓര്‍മയുണ്ടാകും, ഉത്സാഹമുണ്ടാകും, പിന്നയങ്ങോട്ട് മറന്നുപോകും. നന്നായി മെനക്കെട്ട് സ്വര്‍ഗത്തില്‍ വെച്ചുള്ള അല്ലാഹുവിന്‍റെ ലിഖാഇനുവേണ്ടി പണിയെടുക്കുക. നരകത്തിനു വേണ്ടി പണിയെടുക്കരുത്.

 

അല്ലാഹുവിനെക്കുറിച്ച് നല്ല പ്രതീക്ഷ വെച്ചുപുലര്‍ത്തുക. നരകം അവിശ്വാസികള്‍ക്കുവേണ്ടി പടക്കപ്പെട്ടതല്ലേ, നമ്മള്‍ സത്യവിശ്വാസികളാണല്ലോ.

 

സ്വര്‍ഗത്തിന്‍റെ അവകാശികളുടെ കൂട്ടത്തില്‍ എങ്ങനെ ഉള്‍പ്പെടാം എന്നും വിശുദ്ധ ഖുര്‍ആനും തിരുസുന്നത്തും പറഞ്ഞുതന്നിട്ടുണ്ട്. കുറച്ച് അധ്വാനിക്കേണ്ടിവരും. സ്വര്‍ഗമല്ലേ, വെറുതെ കിട്ടുകയില്ലല്ലോ.

رواه الترمذي بإسنادٍ حسن عن النبي -ص - أنه قال: (...... إلا إن سلعة الله غالية، ألا إن سلعة الله الجنة(

 

നല്ല വില കൊടുത്താലേ കിട്ടൂ. എന്താ വില, നമ്മുടെ ശരീരവും ധനവും അധ്വാനവും തന്നെ.

 إِنَّ اللَّهَ اشْتَرَىٰ مِنَ الْمُؤْمِنِينَ أَنفُسَهُمْ وَأَمْوَالَهُم بِأَنَّ لَهُمُ الْجَنَّةَ ۚ(التوبة 111)

അല്ലാഹു റെഡിയാണ് വാങ്ങാനും  പകരും തരാനും. നമ്മള്‍ വിട്ടുകൊടുക്കാന്‍ റെഡിയായാല്‍ മതി.

 

സ്വര്‍ഗ്ഗത്തിന് ആഘോഷമുണ്ട്..! എല്ലാ സൗന്ദര്യത്തോടെയും സ്വര്‍ഗം നന്നായി ചമഞ്ഞ് ഒരുങ്ങും. വിശുദ്ധ റമളാനിനെ സ്വീകരിക്കാനും തിരുനബിയുടെ صلى الله عليه وسلم തൃക്കല്ല്യാണത്തിനും.

 

സ്വര്‍ഗ്ഗ കാവല്‍ക്കാരനായ രിള്വാനോട് عليه السلام പറയപ്പെടുമത്രേ:’ഹേ! രിള്വാന്‍, സ്വര്‍ഗ്ഗ കവാടങ്ങള്‍ തുറക്കുക! എന്‍റെ ഹബീബിന്റെ ഉമ്മത്തിന്‍റെ റമളാന്‍ ഇതാ വന്നെത്തിയിരിക്കുന്നു….’

നാഥന്‍റെ ശബ്ദം കേട്ട് സ്വര്‍ഗ്ഗ ലോകം കോരിത്തരിക്കും. നോമ്പുകാരനെ സ്വീകരിക്കാന്‍ നാളെ സ്വര്‍ഗം അണിഞ്ഞൊരുങ്ങി കാത്തിരിക്കും.

 

അടുത്ത ആയത്ത് 26

 

നേരത്തെ നമ്മള്‍ പറഞ്ഞപോലെ, കാര്യങ്ങള്‍ മനസ്സിലാക്കിത്തരുന്നതില്‍ ഉദാഹരണങ്ങള്‍ക്ക് സുപ്രധാന സ്ഥാനമുണ്ടല്ലോ. അതുകൊണ്ടുതന്നെ അല്‍പബുദ്ധിയായ മനുഷ്യന് കാര്യങ്ങള്‍ മനസ്സിലാക്കിക്കൊടുക്കാന്‍ വേണ്ടി അല്ലാഹു ഖുര്‍ആനില്‍ ഇടക്കിടക്ക് ഉദാഹരണങ്ങള്‍ പറയും.

 

ഈ അധ്യായത്തില്‍ തന്നെ കപടവിശ്വാസികളുടെ ഉദാഹരണം പതിനേഴാം സൂക്തത്തിലും (അവരുടെ ഉപമ തീ കത്തിച്ചവനെപ്പോലെയാണ്...) പതൊത്തമ്പതാം സൂക്തത്തിലും (അല്ലെങ്കില്‍ ആകാശത്തുനിന്ന് വര്‍ഷിക്കുന്ന മഴ പോലെയാണ്...) എന്ന് അല്ലാഹു വെളിപ്പെടുത്തിയപ്പോള്‍ മുനാഫിഖുകള്‍ നിരര്‍ഥകമായ ചില വാദങ്ങള്‍ ഉന്നയിച്ചു.

 

അല്ലാഹുവിങ്കല്‍നിന്നുള്ള ഒരു ഗ്രന്ഥത്തിന്‍റെ അന്തസ്സിന് ചേരാത്തതാണ് ഈ ഉദാഹരണങ്ങളെല്ലാമെന്ന് അവര്‍ കപടവിശ്വാസികള്‍ ആരോപിച്ചു.

 

ഉദാഹരണങ്ങളിലെ തത്വങ്ങളും സാദൃശ്യവും മനസ്സിലാക്കി കാര്യങ്ങള്‍ ഗ്രഹിക്കലാണല്ലോ ആവശ്യം. ഉപമയായി പറഞ്ഞ വസ്തുവിന്‍റെ വലിപ്പ-ചെറുപ്പത്തിനോ സ്റ്റാറ്റസിനോ ഒന്നും അതില്‍ പ്രസക്തിയില്ല. ഒരു കൊതുകിനെപ്പോലെ നിസ്സാരമായ വല്ല വസ്തുവിനെയോ മറ്റോ ഉപമയായി എടുക്കുന്നതില്‍ അല്ലാഹുവിന് ലജ്ജയൊന്നുമില്ല.

 

ഇത്തരം ഉദാഹരണങ്ങള്‍ കേള്‍ക്കുമ്പോള്‍ സത്യവിശ്വാസികളെന്താണ് ചെയ്യുക - ഉദാഹരണമായി പറഞ്ഞ ആ വസ്തുവിനെപ്പറ്റി അന്വേഷിക്കാതെ, അതിന്‍റെ ചെറുപ്പ-വലിപ്പം നോക്കാതെ, അതിലടങ്ങിയ വിഷയങ്ങള്‍ മനസ്സിലാക്കാന്‍ ശ്രമിക്കും.

 

നേരെമറിച്ച് അവിശ്വാസികള്‍ അങ്ങനെയല്ല. ആ ഉപമയുടെ വലിപ്പ ചെറുപ്പമാണ് അവര്‍ നോക്കുക. പരിഹസിക്കാനുള്ള വഴികളല്ലേ അവരെപ്പോഴും നോക്കുക. നിസ്സാര വസ്തുക്കളെ വെച്ചുള്ള ഉദാഹരണങ്ങള്‍ അവഗണിക്കും, ആക്ഷേപിക്കും. ‘ഇതെന്തൊരു ഉപമയാണ്, ഇതുകൊണ്ടെന്താണുദ്ദേശ്യം’ എന്നൊക്കെ പുച്ഛിച്ച് പരിഹസിച്ച് തള്ളുകയും ചെയ്യും.

 

إِنَّ اللَّهَ لَا يَسْتَحْيِي أَنْ يَضْرِبَ مَثَلًا مَا بَعُوضَةً فَمَا فَوْقَهَا فَأَمَّا الَّذِينَ آمَنُوا فَيَعْلَمُونَ أَنَّهُ الْحَقُّ مِنْ رَبِّهِمْ وَأَمَّا الَّذِينَ كَفَرُوا فَيَقُولُونَ مَاذَا أَرَادَ اللَّهُ بِهَذَا مَثَلًا يُضِلُّ بِهِ كَثِيرًا وَيَهْدِي بِهِ كَثِيرًا وَمَا يُضِلُّ بِهِ إِلَّا الْفَاسِقِينَ (26)

ഏതൊരു വസ്തുവിനെയും – അതൊരു കൊതുകോ അതിലും നിസ്സാരമോ ആകട്ടെ- ഒരു ഉപമയായി കാണിക്കുന്നതില്‍ അല്ലാഹു ലജ്ജിക്കുന്നില്ല. വിശ്വസിച്ചവര്‍ അത് തങ്ങളുടെ രക്ഷിതാവിങ്കല്‍ നിന്നുള്ള സത്യമാണെന്ന് ഗ്രഹിക്കുന്നു. അവിശ്വസിച്ചവരാകട്ടെ, ഈ ഉപമ കൊണ്ട് അല്ലാഹു ഉദ്ദേശിച്ചതെന്താണ് എന്ന് ചോദിച്ച് അവഹേളിക്കുകയാണ്. ഇങ്ങനെ അതുവഴി പലരെയും അല്ലാഹു ദുര്‍മാര്‍ഗത്തിലാക്കുകയും പലരെയും സന്മാര്‍ഗത്തിലാക്കുകയും ചെയ്യുന്നു. എന്നാല്‍ (അനുസരണയില്ലാത്ത) അധര്‍മകാരികളെയല്ലാതെ അതുമൂലം ആരെയും അവന്‍ ദുര്‍മാര്‍ഗത്തിലാക്കുന്നില്ലതാനും.

 

ഇമാം ഹസനും ഖതാദ(رحمة الله عليهما)യും പറയുന്നു: അല്ലാഹു ഖുര്‍ആനില്‍ ഈച്ചയെയും എട്ടുകാലിയെയും പരാമര്‍ശിക്കുകയും (അല്‍ഹജ്ജ് 73 ലും അല്‍അന്‍കബൂത്ത് 41 ലും ബഹുദൈവ വിശ്വാസികളെക്കുറിച്ച വിവരണത്തില്‍ ഇത് രണ്ടും കാണാം.) മുശ്‌രിക്കുകളുടെ ഉദാഹരണമായി ഇവ കാണിക്കുകയും ചെയ്തപ്പോള്‍, ജൂതന്മാര്‍ പരിഹസിച്ചത്രെ. അല്ലാഹുവിന്‍റെ 'കലാം' ഇങ്ങനെയാവില്ലല്ലോ എന്നവര്‍ പ്രതികരിക്കുകയും ചെയ്തു. അതിന് മറുപടിയായാണ് ഈ സൂക്തം അവതരിച്ചത് (റാസി, വാല്യം 2, പേജ് 242).

 

يُضِلُّ بِهِ كَثِيرًا وَيَهْدِي بِهِ كَثِيرًا وَمَا يُضِلُّ بِهِ إِلَّا الْفَاسِقِينَ

 

ഇത്തരക്കാരോടുള്ള പ്രതിഷേധവും താക്കീതുമാണിത്. അതായത്, ഉദാഹരണങ്ങളിലടങ്ങിയ തത്ത്വം മനസ്സിലാക്കാന്‍ ശ്രമിക്കാതെ, അതിനെ അപലപിക്കാന്‍ മുതിരുന്നത്  അതിക്രമമാണ്. അത്തരം അതിക്രമകാരികളെയല്ലാതെ അല്ലാഹു അവ മൂലം വഴിതെറ്റിക്കില്ല.

 

ഒന്നുകൂടി വ്യക്തമാക്കിപ്പറയുകയാം: ഇത്തരം ഉദാഹരണങ്ങള്‍ കപടവിശ്വാസികള്‍ക്കും സത്യനിഷേധികള്‍ക്കും അവരുടെ ദുര്‍മാര്‍ഗവും നിഷേധവും വര്‍ദ്ധിക്കാനാണ് കാരണമാകുന്നത്. അതേ സമയം, സത്യവിശ്വാസികളുടെ സന്മാര്‍ഗവും വിശ്വാസവും വര്‍ദ്ധിക്കുകയും ചെയ്യും. ഈ രണ്ടില്‍ ഏതു വിഭാഗങ്ങളിലാണ് ഉള്‍പ്പെടേണ്ടതെന്ന് അവര്‍ ചിന്തിക്കട്ടെ.  

 

ഇവിടെ പ്രത്യേകം ശ്രദ്ധിക്കണം. ഒരു മാനദണ്ഡവും കൂടാതെ കുറേ ആളുകളെ അല്ലാഹു നേര്‍മാര്‍ഗത്തിലും കുറേ പേരെ ദുര്‍മാര്‍ഗത്തിലും ആക്കുമെന്നല്ല ഇപ്പറഞ്ഞതിന്‍റെ താല്‍പര്യം. രണ്ടിനും അവന്‍ മാനദണ്ഡം നിശ്ചയിച്ചിട്ടുണ്ടെന്ന് തൊട്ടടുത്തുതന്നെ പറയുന്നുണ്ടല്ലോ. അതെ, وَمَا يُضِلُّ بِهِ إِلَّا الْفَاسِقِينَ (തോന്നിവാസികളെയല്ലാതെ അതുമൂലം അവന്‍ ദുര്‍മാര്‍ഗത്തിലാക്കുകയില്ല). അപ്പോപ്പിന്നെ നേര്‍വഴിയിലാക്കുന്നത് ആരെയാണെന്ന് വ്യക്തമാണല്ലോ.

 

‘തോന്നിവാസം, തെമ്മാടിത്തം, ദുര്‍നടപ്പ്, കല്‍പനകള്‍ ധിക്കരിക്കുക ഇങ്ങനെയൊക്കെയാണ് ഫിസ്ഖ് فِسْقْ എന്നതിന്‍റെ ഭാഷാര്‍ത്ഥം. ഭാഷാര്‍ത്ഥ പ്രകാരം എല്ലാ വിഭാഗങ്ങളിലും ഫാസിഖുകള്‍ ഉണ്ടാകാം. വിശ്വാസികളിലും അവിശ്വാസികളിലും കപടവിശ്വാസികളിലുമെല്ലാം. എല്ലാവരെക്കുറിച്ചും ഖുര്‍ആനില്‍ അത് പ്രയോഗിച്ചിട്ടുമുണ്ട്.

 

പൊതുവെ ഇങ്ങനെ മനസ്സിലാക്കാം – മതത്തിന്‍റെ ശാസനകള്‍ ലംഘിച്ച് അച്ചടക്കം പാലിക്കാത്തവരെക്കുറിച്ചാണ് പൊതുവില്‍ ഇത് ഉപയോഗിക്കുക.

നമ്മള്‍ നന്നായി ശ്രദ്ധിക്കണമെന്ന്ചുരുക്കം.

 

إِنَّ اللَّهَ لَا يَسْتَحْيِي أَنْ يَضْرِبَ مَثَلًا مَا بَعُوضَةً فَمَا فَوْقَهَا

മനുഷ്യനെ സംബന്ധിച്ചിടത്തോളം ഏറ്റവും ഉപദ്രവകാരിയാണ് കൊതുക്. അതില്‍ത്തന്നെ രോഗം പരത്തുന്ന പെണ്‍കൊതുകുകള്‍. ഖുര്‍ആന്‍ 'ബഊളത്ത്' എന്ന പദമാണിവിടെ ഉപയോഗിച്ചിരിക്കുന്നത്. പെണ്‍കൊതുകിനും കൊതുകുവര്‍ഗത്തിന് പൊതുവെയും ഈ വാക്കുപയോഗിക്കാറുണ്ട്.

മഹദ്ഗ്രന്ഥമായ ഖുര്‍ആനില്‍ വളരെ ചെറിയ ഈ പ്രാണി പരാമൃഷ്ടമായതില്‍ ചിന്തിക്കാനുണ്ട്. അതിസങ്കീര്‍ണമായ സൃഷ്ടിപ്പാണ് ഇവയുടേത്. ലോകത്ത് രണ്ടായിരത്തിലധികം കൊതുകിന്‍റെ ഇനങ്ങള്‍ വ്യാപിച്ചുകിടക്കുന്നുണ്ടത്രെ.

 

വളരെ തൂക്കം കുറഞ്ഞ കൊതുകില്‍ ഒരുപാടാളുകളെ രോഗബാധിതരാക്കാനുള്ള രോഗാണുക്കള്‍ ഉണ്ടത്രെ. കൊതുക് മനുഷ്യനെ കടിക്കുന്നതിനുമുമ്പ് അതിന്‍റെ ഉമിനീര്‍ ശരീരത്തില്‍ പുട്ടും. രക്തം വേഗം വലിച്ചെടുക്കാനാണീ പരിപാടി. ഈ ലേപനത്തോടൊപ്പമാണ് മനുഷ്യശരീരത്തിലേക്ക് രോഗാണു പ്രവേശിക്കുന്നത്.

 

അനോഫിലിസ് പെണ്‍കൊതുകുകള്‍ അതിമാരകമായ രോഗാണുക്കളെയാണ് കടത്തിവിടുന്നത്. മലേറിയ പരത്തുന്ന കൊതുകുകളാണിത്. വര്‍ഷംപ്രതി ഒരുലക്ഷം മനുഷ്യര്‍ മലേറിയ മൂലം ലോകത്തിന്‍റെ പല ഭാഗങ്ങളിലും മരിച്ചുവീഴുന്നുണ്ടെന്നാണ് കണക്ക്.

ശരീരത്തില്‍നിന്ന് വളരെവേഗം രക്തം വലിച്ചെടുക്കാനുള്ള രണ്ട് കുഴലുകളുണ്ട്. രക്തത്തിലെ ഹീമോഗ്ലോബിനിലുള്ള പ്രോട്ടീനുകളുപയോഗിച്ചാണ് പെണ്‍കൊതുകുകള്‍ അണ്ഡങ്ങള്‍ പോഷിപ്പിക്കുന്നത്.

ഗന്ധമറിയാനുള്ള ഇവയുടെ കഴിവ് അപാരമാണ്. മണം കിട്ടിയ ദിശയിലേക്ക് വളരെ വേഗം കുതിച്ചെത്തി കൃത്യം നിര്‍വഹിച്ച് മടങ്ങാനുള്ള കഴിവും അപാരമാണ്. വിശദമായ പഠനം നടത്തിയാല്‍ ഇനിയുമൊരുപാട് അത്ഭുതങ്ങള്‍ ഈ ചെറിയ ജീവിയുടെ സൃഷ്ടിപ്പിലുണ്ടെന്ന് മനസ്സിലാക്കാന്‍ കഴിയും.

അടുത്ത ആയത്ത് 27

 

الَّذِينَ يَنْقُضُونَ عَهْدَ اللَّهِ مِنْ بَعْدِ مِيثَاقِهِ وَيَقْطَعُونَ مَا أَمَرَ اللَّهُ بِهِ أَنْ يُوصَلَ وَيُفْسِدُونَ فِي الْأَرْضِ أُولَئِكَ هُمُ الْخَاسِرُونَ (27)

അല്ലാഹുവിനോടുള്ള പ്രതിജ്ഞ ഉറപ്പിച്ച ശേഷം അത് ലംഘിക്കുകയും അവന്‍ ചേര്‍ക്കാന്‍ കല്‍പിച്ചതിനെ വിച്ഛേദിക്കുകയും നാട്ടില്‍ കുഴപ്പമുണ്ടാക്കുകയും ചെയ്യുന്ന (ആ അതിക്രമികളെയല്ലാതെ മറ്റാരെയും അല്ലാഹു അതുമൂലം ദുര്‍മാര്‍ഗത്തിലാക്കുന്നില്ല.) അവര്‍ തന്നെയാണ് പരാജിതര്‍.

 

തോന്നിവാസികളുടെ മൂന്ന് ദുസ്സ്വഭാവങ്ങളാണിവിടെ പറഞ്ഞത്:

(1) അല്ലാഹുവിന്‍റെ ഉത്തരവ് ലംഘിക്കുക.
(2) ചേര്‍ക്കാന്‍ കല്‍പിക്കപ്പെട്ട ബന്ധങ്ങള്‍ വിച്ഛേദിക്കുക
(3) ഭൂമിയില്‍ കുഴപ്പമുണ്ടാക്കുക.

 

الَّذِينَ يَنْقُضُونَ عَهْدَ اللَّهِ

 

ഉടമ്പടി, കരാര്‍ എന്നൊക്കെയാണ് عَهْدُ എന്നതിന്‍റെ അര്‍ത്ഥം. ആജ്ഞ, കല്‍പന, പ്രതിജ്ഞ, പരിചയം, ഉത്തരവാദം, കാലം’ എന്നെല്ലാം സന്ദര്‍ഭോചിതം അര്‍ത്ഥം വരാവുന്നതാണ്.

അല്ലാഹു കല്‍പിച്ച, നിറവേറ്റാന്‍ മനുഷ്യന്‍ കടപ്പെട്ട കാര്യം എന്നാണിവിടെ ഉദ്ദേശ്യം. പല വ്യാഖ്യാതാക്കളും പറഞ്ഞ പോലെ, അല്ലാഹുവിന്‍റെ ഉത്തരവ് عَهْدُ الَّله രണ്ടു പ്രകാരത്തിലുണ്ട്:

• മനുഷ്യന് അല്ലാഹു നല്‍കിയ വിശേഷബുദ്ധിയും പ്രകൃതിദൃഷ്ടാന്തങ്ങളും മുഖേനയുള്ള കരാര്‍. നിര്‍മലമായ പ്രകൃതിയോടു കൂടിയാണ് അല്ലാഹു നമ്മളെ പടച്ചത്. അതുകൊണ്ടുതന്നെ നമ്മളിലൊക്കെ സഹജമായിത്തന്നെ അല്ലാഹുവിനെക്കുറിച്ച് ബോധമുണ്ട്. പ്രകൃതിദത്തമായ ഒരു ബോധം.

അല്ലാഹുവിന്‍റെ അസ്തിത്വം, ഏകത്വം, ആരാധനക്കുള്ള അര്‍ഹത ഇതെല്ലാം മനസ്സിലാക്കാനും അംഗീകരിക്കാനും മനുഷ്യന്‍ ഇതു മുഖേന സ്വയം ബാദ്ധ്യസ്ഥനാണ്.  ഈ ബാദ്ധ്യത നിറവേറ്റിയില്ലെങ്കില്‍, മനുഷ്യന്‍ അല്ലാഹുവിന്‍റെ ഉത്തരവ് ലംഘിച്ചവനായി, അവനോടുള്ള കടമ ലംഘിച്ചവനുമായി. എല്ലാ വിഭാഗം അവിശ്വാസികളും ഈ അര്‍ത്ഥത്തില്‍ ഉത്തരവ് ലംഘിച്ചവര്‍ തന്നെയാണ്.

(2) പ്രവാചകന്‍മാര്‍, വേദഗ്രന്ഥങ്ങള്‍, അസാധാരണ ദൃഷ്ടാന്തങ്ങള്‍ എന്നിവ മുഖേനയുള്ള ഉത്തരവ് (കരാര്‍). വേദക്കാരിലുള്ള അവിശ്വാസികളും കപടവിശ്വാസികളും ഈ അര്‍ത്ഥത്തിലുള്ള ഉത്തരവ് ലംഘിച്ചവരാണ്. കപടവിശ്വാസികള്‍ ചെയ്യുന്നതെന്താണ് - ആദ്യം ശഹാദത്ത് ഏറ്റുപറയുന്നു, അതോടുകൂടി തൗഹീദും, പ്രവാചകത്വവും സ്വീകരിച്ചുവെന്ന് പ്രതിജ്ഞ ചെയ്യുന്നു. പിന്നീടത് ലംഘിക്കുന്നു.

ഇവിടെ عَهْدُ ا للهِ (അല്ലാഹുവിനോടുള്ള പ്രതിജ്ഞ) കൊണ്ടുള്ള ഉദ്ദേശ്യം സംബന്ധിച്ച് വേറെയും അഭിപ്രായങ്ങളുണ്ട്.

ചില ഉദാഹരണങ്ങള്‍:

• ആദം നബി(അ)യെ സൃഷ്ടിച്ചശേഷം, മഹാനവര്‍കളുടെ സന്തതികള്‍ അല്ലാഹുവാണ് തങ്ങളുടെ റബ്ബ് എന്ന് (ആത്മീയലോകത്ത് വെച്ച്) സമ്മതിച്ചു സാക്ഷ്യപ്പെടുത്തിയിട്ടുണ്ടെന്ന് സൂഃ അഅ്‌റാഫ്:172 ലുണ്ട്. ആത്മികലോകത്തുവെച്ച് അല്ലാഹു മനുഷ്യരോട് 'ഞാനല്ലയോ നിങ്ങളുടെ നാഥന്‍' എന്ന് ചോദിക്കുകയും അതെ എന്നവര്‍ ഉത്തരം പറയുകയും ചെയ്തിട്ടുണ്ട്. അതാണിവിടെ ഉദ്ദേശ്യം.

 

• ആദം (അ) സ്വര്‍ഗത്തില്‍നിന്ന് ഭൂമിയിലേക്ക് വരുമ്പോള്‍ അല്ലാഹുവിങ്കല്‍ നിന്നുള്ള വല്ല മാര്‍ഗദര്‍ശനവും നിങ്ങള്‍ക്ക് വന്നാല്‍ നിങ്ങളത് പിന്‍പറ്റണമെന്ന് അല്ലാഹു ഉല്‍ബോധിപ്പിച്ചിട്ടുണ്ട്. ഇത് അല്‍ബഖറഃ: 38 ലും, ത്വാഹാ 123ലും പറയുന്നുണ്ട്. അതാണുദ്ദേശ്യം.

 

ഈ 2 അഭിപ്രായങ്ങളും, നേരത്തെ നമ്മള്‍ പറഞ്ഞ രണ്ടു തരം ഉത്തരവുകളില്‍ ഉള്‍പ്പെട്ടിട്ടുണ്ട്താനും.

الَّذِينَ يَنْقُضُونَ عَهْدَ اللَّهِ مِنْ بَعْدِ مِيثَاقِهِ

 

കരാര്‍ ഉറപ്പിച്ചു എന്ന് പറഞ്ഞതിന്‍റെ ഉദ്ദേശ്യം, മുകളില്‍ പറഞ്ഞ ചോദ്യോത്തരം, പിന്നീട് അല്ലാഹു പ്രവാചകന്മാരെ അയച്ച്, അവര്‍ മഖേന സന്ദേശങ്ങളും ദൃഷ്ടാന്തങ്ങളും നല്‍കി നമ്മളെ ഓര്‍മിപ്പിച്ചതും സഹജബോധം തട്ടിഉണര്‍ത്തുകയും ചെയ്തതാണ്.

 

الَّذِينَ يَنْقُضُونَ عَهْدَ اللَّهِ  

പ്രവാചകന്മാരെ അവഗണിക്കുക, സഹജബോധത്തെ ദുഷിപ്പിക്കുക, അങ്ങനെ അല്ലാഹുവിനെ മറന്നുകളയുക - ഇത് പ്രതിജ്ഞാലംഘനമാണ്. അത്തരക്കാര്‍ അതിക്രമികള്‍ തന്നെയാണല്ലോ.

وَيَقْطَعُونَ مَا أَمَرَ اللَّهُ بِهِ أَنْ يُوصَلَ

 

മനുഷ്യന്‍ ഒരു സാമൂഹിക ജീവിയാണ്. അതുകൊണ്ടുതന്നെ ഒരുപാട് ബന്ധങ്ങള്‍ കീപ്പ് ചെയ്യേണ്ട ആളുമാണ്. എല്ലാം ഒറ്റക്ക് എന്ന നിലപാട് ശരിയല്ല. ഈ  ബന്ധങ്ങള്‍ ചേര്‍ക്കാനും കീപ്പ് ചെയ്യാനും അല്ലാഹുവും റസൂലും പറഞ്ഞതുമാണ്.

 

ഈ ബന്ധങ്ങളില്‍ രക്തബന്ധം, കുടുംബ ബന്ധം, സ്‌നേഹബന്ധം, അയല്‍പക്കബന്ധം, മതപരമായ ബന്ധം, സാമൂഹികമായ ബന്ധം തുടങ്ങി എല്ലാ നല്ല ബന്ധങ്ങളും ഉള്‍പ്പെടുന്നു. നബി (صَلَّى اللَّهُ عَلَيْهِ وَسَلَّمَ) യുടെ കാലത്തുണ്ടായിരുന്ന അവിശ്വാസികള്‍ ഇത്തരം ബന്ധങ്ങളെല്ലാം അവഗണിച്ച് ചെയ്തുകൂട്ടിയ അക്രമങ്ങള്‍ക്ക് കയ്യും കണക്കുമില്ലല്ലോ. ഇതും അതിക്രമം തന്നെയാണ്.

 

ഇക്കാലത്തും ഏകദേശം അങ്ങനെയൊക്കെത്തന്നെയാണല്ലേ. നമ്മുടെ ഖൌമടക്കം ബന്ധങ്ങള്‍ക്ക് വില കല്‍പിക്കാതെ പിണങ്ങി നടക്കുന്നവര്‍, മിണ്ടാത്തവര്‍, കൂടെപ്പിറപ്പിനോട് പോലും സലാം പറയാത്തവര്‍, ഉറ്റ സുഹൃത്തുക്കളെതന്നെ ചതിക്കുന്നവര്‍, അയല്‍വാസികളെ ദ്രോഹിക്കുന്നവര്‍... ഇങ്ങനെ ലിസ്റ്റ് നീണ്ടുപോകും.  

 

എല്ലാ ബന്ധങ്ങളും പവിത്രമാണ്. ചേര്‍ത്തുകൊണ്ടുനടന്ന് കാത്തുസൂക്ഷിക്കണം. ഉമ്മ-ബാപ്പ, കുടുംബങ്ങ‍ള്‍, സുഹൃത്തുക്കള്‍, എല്ലാം...

 

وَيُفْسِدُونَ فِي الْأَرْضِ

നാട്ടില്‍ ഇവര്‍ ഉണ്ടാക്കിവെച്ച നാശങ്ങള്‍ക്കും കുഴപ്പങ്ങള്‍ക്കും കണക്കില്ല. മുനാഫിഖുകളും, മുശ്രിക്കുകളും, യഹൂദികളുമെല്ലാം ഈ വിഷയത്തില്‍ ഒരുപോലെയാണ്.

 

സത്യവിശ്വാസികളെ തടയുക, മറ്റുള്ളവരെ നിന്ദിക്കുക, പരിഹസിക്കുക, ജനങ്ങളെ ഭിന്നിപ്പിക്കുക, രാജ്യനന്മക്കുവേണ്ടിയുള്ള നിയമങ്ങള്‍ ലംഘിക്കാന്‍ ജനങ്ങളെ പ്രേരിപ്പിക്കുക - ഇതൊക്കെ അവരുണ്ടാക്കിയ കുഴപ്പങ്ങളാണ്.

 

أُولَئِكَ هُمُ الْخَاسِرُونَ

ഏതായാലും ഓരോ കൂട്ടരുടെയും പങ്കിനനുസരിച്ച് രണ്ട് ലോകത്തും അവര്‍ക്ക് നഷ്ടം ബാധിക്കുകയാണുണ്ടാവുക. ഇത്തരക്കാര്‍ക്ക് താല്‍ക്കാലികമായ ചില ഭൗതിക നേട്ടങ്ങളുണ്ടായാലും പാരത്രിക സുഖം നഷ്ടപ്പെട്ടവരാണ്. അതാണ് 'അവര്‍ തന്നെയാണ് നഷ്ടപ്പെട്ടവര്‍' എന്ന് പ്രത്യേകം പറഞ്ഞത്.

 

നേരെ മറിച്ച് തിരുനബി (صَلَّى اللَّهُ عَلَيْهِ وَسَلَّمَ) ക്കും കൂടെയുള്ള സത്യവിശ്വാസികള്‍ക്കും, ഇഹത്തിലും പരത്തിലും വിജയമേ ഉണ്ടാകൂ.

 

അക്കാലത്തുള്ളവരെ സംബന്ധിച്ചാണ് ഈ ആയത്തുകളില്‍ പറഞ്ഞതെന്നുകരുതി, ശേഷം വന്നവര്‍ക്കും ഇക്കാലത്തുള്ളവര്‍ക്കും ഇതൊന്നും ബാധകമല്ലെന്ന് കരുതരുത്. എക്കാലത്തുമുള്ള അവിശ്വാസികളുടെയും കപടവിശ്വാസികളുടെയും അവസ്ഥ ഇതുതന്നെയാണ്. ചരിത്രം അതിന് സാക്ഷിയുമാണ്.

 

പുത്തന്‍വാദങ്ങളുമായി രംഗത്തിറങ്ങി സമുദായത്തെ ഭിന്നിപ്പിലേക്കും ശത്രുതയിലേക്കും തള്ളിവിട്ട്, അങ്ങനെ ഭൗതിക ലാഭങ്ങള്‍ കൊയ്യുന്ന ആളുകളും ഇക്കാര്യം ചിന്തിക്കേണ്ടതാണ്.

 

അടുത്ത ആയത്ത് 28

 

 كَيْفَ تَكْفُرُونَ بِاللَّهِ وَكُنْتُمْ أَمْوَاتًا فَأَحْيَاكُمْ ثُمَّ يُمِيتُكُمْ ثُمَّ يُحْيِيكُمْ ثُمَّ إِلَيْهِ تُرْجَعُونَ (28)

 

നിങ്ങളെങ്ങനെ അല്ലാഹുവിനെ നിഷേധിക്കും? നിങ്ങള്‍ നിര്‍ജീവാവസ്ഥയിലായിരുന്നു. എന്നിട്ട് നിങ്ങളെ അവന്‍ ജീവിപ്പിച്ചു. ഇനിയും നിങ്ങളെ മരിപ്പിക്കുകയും പിന്നീട് വീണ്ടും ജീവിപ്പിക്കുകയും ചെയ്യും. ശേഷം അവനിലേക്കുതന്നെ നിങ്ങള്‍ മടക്കപ്പെടുകയും ചെയ്യും.

 

 

അല്ലാഹുവിന്‍റെ അസ്തിത്വം, ഏകത്വം, കഴിവ്, മനുഷ്യരുടെ പുനര്‍ജന്മം -ഇതിനെല്ലാം മനുഷ്യന്‍ തന്നെ തെളിവാണെന്നാണിനി പറയുന്നത്.

മനുഷ്യന്‍ തന്നെക്കുറിച്ചുതന്നെ മുന്‍വിധികളില്ലാതെ, നിഷ്പക്ഷമായി ചിന്തിച്ചാല്‍ അല്ലാഹുവില്‍ വിശ്വസിക്കാന്‍ നിര്‍ബന്ധിതനായിത്തീരും.

 

ഇങ്ങനെ ഒരു മനുഷ്യനായി ജനിക്കുന്നതിനു മുമ്പ് അവന്‍ എന്തായിരുന്നു? എവിടെയായിരുന്നു? അറ്റമില്ലാത്ത ആ ഭൂതകാലത്തിലേക്ക് ഒന്നു തിരിഞ്ഞുനോക്കുക! ബീജം, ഇന്ദ്രിയം, ഭ്രൂണം – ഇത്തരം ചില ആദ്യദശകളെക്കുറിച്ച് ചിലതെല്ലാം പറയാന്‍ അവന് കഴിഞ്ഞേക്കും. അതിന് മുമ്പുള്ള അവസ്ഥയോ?

 

അതാണ് സൂറത്തുല്‍ ഇന്‍സാനില്‍ അല്ലാഹു ചോദിക്കുന്നത്:

هَلْ أَتَىٰ عَلَى الْإِنسَانِ حِينٌ مِّنَ الدَّهْرِ لَمْ يَكُن شَيْئًا مَّذْكُورًا (1)الإنسان

(പറയത്തക്ക ഒരു വസ്തുവും ആയിരുന്നില്ലാത്ത ഒരു കാലഘട്ടം മനുഷ്യന് വന്നിട്ടില്ലെയോ?! അതെ, ഏത് അര്‍ത്ഥത്തിലും എത്രയോ കാലം അവനൊരു അജ്ഞാതനായിക്കഴിഞ്ഞിട്ടുണ്ട്.

 

ഇന്ദ്രിയം, ചോരക്കട്ട, മാംസപിണ്ഡം ഇവയെല്ലാം തന്നെ നിര്‍ജീവ വസ്തുക്കളായിരുന്നു. എന്നിട്ട് അല്ലാഹു അവനെ ജീവനുള്ളവനാക്കി. ബാഹ്യമായും ആന്തരികമായും നിരവധി കഴിവുകളുള്ള ഒരുല്‍കൃഷ്ട ജീവി. അങ്ങനെ കുറേ കഴിയുമ്പോള്‍ അവന്‍ മരിക്കുന്നു. മരണം തടുക്കാന്‍ ആര്‍ക്കും കഴിയില്ലല്ലോ.

 

ഈ ജീവിതം നല്‍കിയത് ആരാണ്? അല്ലാഹു. ഈ മരണം നല്‍കിയത് ആരാണ്? അല്ലാഹു. ഇതൊന്നും നിഷേധിക്കാന്‍ കഴിയുകയില്ല. അപ്പോള്‍, ആ നീണ്ട നിര്‍ജ്ജീവാവസ്ഥക്കുശേഷം അവനെ ഒരു ജീവിയാക്കിത്തീര്‍ത്ത അല്ലാഹുവിന് അവന്‍റെ മരണശേഷം വീണ്ടും ഒരു ജീവിതം നല്‍കുവാന്‍ കഴിയില്ലെന്ന് പറയാന്‍ എന്ത് ന്യായമാണുള്ളത്?!

 

ശുദ്ധശൂന്യതയില്‍ നിന്ന് ജീവിതം നല്‍കിയവന് അര്‍ദ്ധശൂന്യതയില്‍ നിന്ന് പിന്നെയും ജീവിപ്പിക്കാനുണ്ടോ വല്ല പ്രയാസവും?! ഇതല്ലേ, ആദ്യത്തേതിനേക്കാള്‍ എളുപ്പം? (وَهُوَ أَهْوَن عُلَيْهِ – الروم ٢٨)

 

മരണത്തിനു ശേഷം വീണ്ടും പുനര്‍ജനിക്കും. എന്നാല്‍, ഈ രണ്ടാമത്തെ ജീവിതത്തോടുകൂടി എല്ലാം അവസാനിക്കുമോ? ഇല്ല. ജീവിതത്തില്‍ ചെയ്ത നന്മതിന്മകളുടെ കണക്കുനോക്കി ലാഭനഷ്ടങ്ങള്‍ വീതിച്ചുകൊടുക്കാന്‍, അസ്തിത്വത്തിന് തുടക്കം നല്‍കിയ അതേ സ്രഷ്ടാവായ അല്ലാഹുവിങ്കലേക്ക് മടങ്ങേണ്ടിവരികയും ചെയ്യും.

ഇതെല്ലാം സര്‍വജ്ഞനായ, സര്‍വശക്തനായ ഒരു റബ്ബുണ്ടെന്ന് വിശ്വസിക്കുവാന്‍ മനുഷ്യനെ നിര്‍ബന്ധിതനാക്കുന്നില്ലേ? എന്നിട്ടും മനുഷ്യന്‍ അല്ലാഹുവിനെ അവിശ്വസിക്കുന്നത് ആക്ഷേപാര്‍ഹം തന്നെയല്ലേ!?

 

ثُمَّ يُحْيِيكُمْ

 

പിന്നീട് വീണ്ടും നിങ്ങളെ ജീവിപ്പിക്കുകയും ചെയ്യും എന്നു പറഞ്ഞതില്‍, ഖബ്‌റില്‍ വെച്ച് ചോദ്യം ചെയ്യാനുള്ള ജീവിപ്പിക്കലും മഹ്ശറില്‍ ഒരുമിച്ചുകൂട്ടുവാനുള്ള ജീവിപ്പിക്കലും രണ്ടും ഉള്‍പ്പെടും.

 

പുനര്‍ജനിക്കുമോ? പലരുടെയും  സംശയമാണിത്... ഇന്നും പലരും ഇതുചോദിച്ചുകൊണ്ടേയിരിക്കുകയാണ്.

 

മരിച്ച് മണ്ണും അസ്ഥികളുമായിക്കഴിഞ്ഞിട്ടും എഴുന്നേല്‍പിക്കപ്പെടുമോ? ഒന്നുമില്ലായ്മയില്‍ നിന്ന് നിന്നെ ഉണ്ടാക്കിയ റബ്ബിന് പിന്നെ, കുറച്ചെന്തെങ്കിലും ഉള്ളതില്‍ നിന്ന് ഉണ്ടാക്കാനാണോ പ്രയാസം?

മരിച്ച് മണ്ണായിക്കഴിഞ്ഞാലും ഗുദാസ്ഥിയിലെ (Coccyx (عَجْبُ الذنَب- ചില കോശങ്ങള്‍ നശിക്കൂകയില്ല. അതില്‍ നിന്നാണ് പുനര്‍ജീവിക്കപ്പെടുന്നത്. ഒരു കുഞ്ഞിന്‍റെ സൃഷ്ടിപ്പ് തുടങ്ങുന്നതും അതില് നിന്നാണ്.

Primery Organizer (Primitive Streak) എന്ന പേരിലെല്ലാം അറിയപ്പെടുന്ന ഇത് ഗര്‍ഭത്തിന്റെ മൂന്നാം ആഴ്ചയുടെ തുടക്കം മുതല്‍ (15 ദിവസത്തിനു ശേഷം) പ്രത്യക്ഷപ്പെടും.

ശാസ്ത്രീയമായും തെളിയിക്കപ്പെട്ട ആയ ഈ വസ്തുത ഹദീസുകളിലുമുണ്ട്. മഴക്കു ശേഷം പുനര്‍ജന്മം. ചീര മുളക്കുന്നതുപോലെ മനുഷ്യര്‍ മുളച്ചുവരും.

قال رسول الله ص:" ثم ينزل من السماء ماء، فيَنبُتُون كما تنبُت البقل، وليس في الإنسان شيء إلا بَلِيَ إلا عظم واحد، وهو عَجْبَ الذَّنَب " أخرجه البخاري ومسلم، ومالك في الموطأ، وأبو داود والنسائي

كُلُّ ابْنِ آدَمَ يَأْكُلُهُ التُّرَابُ إِلَّا عَجْبَ الذَّنَبِ، مِنْهُ خُلِقَ وَفِيهِ يُرَكَّبُ أخرجه البخاري والنسائي وأبو داود وابن ماجه وأحمد ومالك

(മനുഷ്യനെ മുഴുവനും മണ്ണ് തിന്നും; ഗുദാസ്ഥിയൊഴികെ. അതില്‍ നിന്നാണവന്‍ സൃഷ്ടിക്കപ്പെട്ടത്, അതില്‍ തന്നെയാണവര്‍ രണ്ടാമത് കൂട്ടിച്ചേര്‍ക്കപ്പെടുന്നതും)

 

عن أبي هريرة رضي الله عنه أن رسول الله ص قال: :إِنَّ فِي الْإِنْسَانِ عَظْمًا لَا تَأْكُلُهُ الْأَرْضُ أَبَدًا فِيهِ يُرَكَّبُ يَوْمَ الْقِيَامَةِ، قَالُوا: أَيُّ عَظْمٍ هُوَ يَا رَسُولَ اللَّهِ؟، قَالَ: عَجْبُ الذَّنَبِ

 

ഈ ഗുദാസ്ഥി മുഴുവന്‍ എന്നല്ല അര്‍ത്ഥം. അതിലെ ചില കോശങ്ങളാണ് നശിക്കാതിരിക്കുക.

⁾.

Hans Spemann (German Scientist) ഇത് സംബന്ധമായി പഠനം നടത്തിയിട്ടുണ്ട്. 1935 ല്‍ നൊബേലും കിട്ടിയിട്ടുണ്ട്.

ഇയാള്‍ ആദ്യം ചെയ്തത് ഒരു തള്ളപ്പശുവിന്‍റെ ഭ്രൂണത്തില്‍ നിന്ന് ഈ ഗുദാസ്ഥി എടുത്തുമാറ്റി, മറ്റൊരു മൃഗത്തിന്‍റെ ഗര്‍ഭാശയത്തില്‍ സ്ഥാപിച്ചു. അപ്പോഴത് മറ്റൊരു കുട്ടിയായി വളരാന്‍ തുടങ്ങി.

ഈ പരീക്ഷണം വിജയിച്ചപ്പോള്‍, പിന്നെ അതെടുത്ത് നന്നായി പൊടിച്ചു, വേറെ ജീവിയില്‍ നിക്ഷേപിച്ചു, അപ്പോഴും ജീവനുണ്ട്. വളരുന്നുണ്ട്.

പിന്നെ തിളപ്പിച്ചു, എന്നിട്ട് ആ ലായനി നിക്ഷേപിച്ചുനോക്കി, ജീവനുണ്ട്. വളരുന്നുണ്ട്.

ഹിജ്റ 1424 റമളാനില്‍ യമനിലെ ഡോ. ഉസ്മാന്‍ ജീലാന്‍  5 ആടുകളുടെ ഗുദാസ്ഥി കരിച്ചു കളഞ്ഞു, പത്ത് മിനുറ്റോളം കത്തിച്ചു, ഗ്യാസുപയോഗിച്ച്. അപ്പോഴും അതിലെ സെല്ലുകള്‍ ജീവനോടെയിരിക്കുന്നു.

വേറെയും പല പരീക്ഷണങ്ങളും നടന്നിട്ടുണ്ട്. പൊട്ടിച്ചു നോക്കിയിട്ടുണ്ട്, കരിച്ചുനോക്കിയിട്ടുണ്ട്, കോശങ്ങള്‍ അപ്പോഴും ജീവനോടെയുണ്ടായിരുന്നു.

പല പ്രമുഖരും ഇത് സംബന്ധമായി പ്രഭാഷണങ്ങളവതരിപ്പിച്ചുണ്ട്. 

 

 

പുനര്‍ജന്മം തീര്‍ച്ചയാണ്, സംശയമേ വേണ്ട, റബ്ബിനതെല്ലാം എളുപ്പമാണ്.

 كن فيكون അതേ വേണ്ടൂ.. പറയുകയല്ല, ഉദ്ദേശിക്കുകയേ വേണ്ടൂ.

ഈ ഒരോര്‍മ ഉണ്ടായാല്‍ രക്ഷപ്പെട്ടു. അതിന് റെഡിയാണോ..

എപ്പോഴും മരിക്കാം, മരിച്ചാല്‍ തിരിച്ചു റബ്ബിന്‍റെ അടുത്ത് എത്തേണ്ടിയുംവരും.

 

എപ്പോഴും മരിക്കാമല്ലോ, മരണം ഉറപ്പാ, പക്ഷേ, ഇപ്പോഴൊന്നും മരിക്കുകയില്ല എന്നൊരു തോന്നല്‍ പലര്‍ക്കമുള്ളതുപോലെയാണ് നടപ്പ്.

 

ജനിക്കുക തന്നെ വേണ്ടല്ലോ മരിക്കാന്‍. ജനിക്കുന്നതിനു മുമ്പു തന്നെ മരണം സംഭവിക്കാറില്ലേ. ഗര്‍ഭസ്ഥശിശുക്കള്‍ മരിക്കുന്നതിലൂടെ അല്ലാഹു പഠിപ്പിക്കുന്നത് അതാണ്. റൂഹ് ഊതിക്കഴിഞ്ഞാല് പിന്നെ എപ്പോഴും ആവാം. ചിലര്‍ ഗര്‍ഭത്തില്‍ തന്നെ, ചിലര്‍ പുറത്തു വന്ന ഉടനെ, ചിലര്‍ രണ്ട് മാസം, രണ്ട് വര്‍ഷം, മുപ്പത്, അറുപത്... അങ്ങനെ പോകും.

 

മരണം തടുക്കാനുള്ള ചെപ്പടിവിദ്യകളൊക്കെ പലരും നടത്തിനോക്കിയിട്ടുണ്ട്.

നടക്കാതെ വന്നപ്പോഴാണ് ഡെഡ് ബോഡികള് സൂക്ഷിച്ചുവെക്കാന് തുടങ്ങിയത്,

 

എന്തിനാനെന്നറിയോ, എന്നെങ്കിലുമൊരിക്കല്‍ ജീവന്‍ തിരിച്ചുകൊടുക്കാന്‍ സാധിച്ചാല്‍ ഉപയോഗിക്കാലോ എന്ന് കരുതിയിട്ട്. സാധിക്കുമെന്നുതന്നെയാണ് അവര്‍ വിശ്വസിക്കുന്നത്.

 

ഈജിപ്തിലെ മമ്മിഫിക്കേഷനൊക്കെ അങ്ങനെ തുടങ്ങിയതാണെന്ന് പറയപ്പെടാറുണ്ട്.

 

ഇന്നും ലോകത്തിന്‍റെ വിവിധ ഭാഗങ്ങളില്‍ നിലവിലുണ്ട്, CRYO PRESERVATION. ബോഡി അതിശീതീകരിച്ച ഐസ് ട്യൂബിലിട്ടുവെക്കുക.

 

അതൊരു വ്യവസായമായി വളര്‍ന്നിട്ടുണ്ട്. ക്രയോനിക്സ് ഇന്ഡസ്ട്രി

1976 ലാണ് Cryonics Institute റോബര്‍ട്ട് എറ്റിംഗര്‍ സ്ഥാപിച്ചത്. ഇദ്ദേഹമാണ് Father of Cryonics എന്നറിയപ്പെടുന്നത്.

 

Life Extension Foundation, Cryonic Preservation Company,  Cryonic Institutes ഇങ്ങനെ പല കമ്പനികളുമുണ്ട്.

 

വലിയ ചെലവുള്ള ഏര്‍പ്പാടാണത്രെ ഇത്. Average $ 200,000 ആണ് ചെലവ്.

The body will cryonically frozen in a tank of liquid nitrogen  -196C.

 

The body is packed in ice and injected with various chemicals in an attempt to reduce blood clotting and damage to the brain. Figures reveal that around 150 people have had their whole body stored in liquid nitrogen in the United States, while around 80 have had just their heads or brains preserved. However, there are more than 1,000 living people who have instructed companies to preserve their bodies. (BBC)

അപ്പോ ഇങ്ങനെ ക്രയോണ്‍ ചെയ്താലും ഇതേ ഐസ്ക്യൂബില്‍ നിന്നു തന്നെ രണ്ടാമതും ജനിക്കും, പക്ഷേ, അത് ഇപ്പറഞ്ഞപോലെ ഇവിടെ ജീവിക്കാനായിരിക്കില്ല, ആഖിറത്തിലേക്കുള്ള പുനര്‍ജന്മമായിരിക്കും.

 

ഇത് ആര്‍ക്കും തടുക്കാന്‍ കഴിയില്ല. അസുഖം വരാതിരിക്കാന്‍ ഒരു ഇന്‍ഫക്ഷനുമില്ലാത്ത സ്ഥലത്ത് പാര്‍പ്പിച്ചാലോ, എന്നാലും.

 

أَيْنَمَا تَكُونُوا يُدْرِكْكُمُ الْمَوْتُ وَلَوْ كُنْتُمْ فِي بُرُوجٍ مُشَيَّدَةٍ ۗ– نساء 78 (നിങ്ങളെവിടൊയായിരുന്നാലും മരണം നിങ്ങളെ പിടികൂടുക തന്നെ ചെയ്യും, നിങ്ങള്‍ ശക്തമായ കോട്ടകള്‍ക്കുള്ളിലാണെങ്കില്‍ പോലും)

 

 

അപ്പോ നമ്മളതിന് റെഡിയാകാ.. എപ്പോഴും മരിക്കാം... ങ്ങനെ റബ്ബിന്‍റെ മുമ്പിലെത്താം. പ്രത്യേകിച്ച് യാത്രകളിലെല്ലാം.. എത്രയോ ആക്സിഡന്റ്, ചെറുതും വലുതും...

 

എപ്പോഴും യാത്ര ചെയ്യുന്നവരാണ് നമ്മളെല്ലാം. നിലം തൊടാത്ത യാത്ര നടത്തുന്നവര്‍.

 

ബൈക്കും വണ്ടിയുമെടുത്ത് തെറ്റ് ചെയ്യാന്‍, പലിശ വാങ്ങാന്‍, അടക്കാന്‍, ഗീബത്ത് പറയാന്‍ പോവുകയാണ്. വഴിയില് മരണം പതിയിരിക്കുന്നുണ്ടാകും.

 

ഉറങ്ങാന്‍ കിടക്കുമ്പോള്‍ ഒരുങ്ങികിടക്കുക. ഇസ്തിഗ്ഫാര്, ദിക്റ്, സ്വയം വിചാരണ.. വുളു എടുത്ത്... എല്ലാം ചെയ്യാറില്ലേ..

 

എഴുന്നേല്‍ക്കില്ല എന്ന് ഉറപ്പിച്ചാണുറങ്ങേണ്ടത്.

وكان محمد بن واسع إذا أراد أن ينام قال لأهله: أستودعكم الله، فلعلها أن تكون منيتي التي لا أقوم منها،

 

മുഹമ്മദുബ്നു വാസിഅ്  رحمة الله عليهഎന്നവര്‍ ഉറങ്ങാന്‍ കിടക്കുമ്പോള്‍, കുടുംബത്തോട് യാത്ര പറയുമായിരുന്നത്രേ – ഇങ്ങനെ കൂടി പറയും, ഇത് ചിലപ്പോ എഴുന്നേല്‍ക്കാത്ത ഉറക്കമായിരിക്കാം.

 

 

വസ്വിയ്യത്തുകളൊക്കെ എഴുതിവെക്കുകയോ പറയുകയോ ചെയ്യണം.

 

കടം കൊടുക്കാനുള്ളത്, കിട്ടാനുള്ളത്, പൊതുഫണ്ട് വിവരങ്ങള്‍. പ്രധാനപ്പെട്ട  പാസ്‍വേര്‍ഡുകള്‍, സകാത്ത് കണക്കുകള്‍...

 

അവസാനം ചെയ്ത അമലിനനുസരിച്ചാണല്ലോ ആഖിബത്ത് തീരുമാനിക്കപ്പെടുന്നത്.

അവസാനം കേട്ടത് വേണ്ടാത്ത പാട്ടാണ്, കണ്ടത് കോമഡി വീഡിയോ ആണ്, പറഞ്ഞത് ഗീബത്താണ്, വായിച്ചത് വേണ്ടാത്ത പോസ്റ്റാണ് – ഇങ്ങനെയൊക്കെയായാല് എന്തായിരിക്കും അവസ്ഥ.

 

ഇപ്പോ ഇങ്ങനെയൊക്കെ അല്ലേ, പണ്ടൊക്കെ കൈയില്‍ റിമോട്ട് പിടിച്ചിട്ടാ ഉറങ്ങുക, ഇപ്പോ മൊബൈലാണെന്നു മാത്രം.

 

ദിക്റിനും ഇബാദത്തിനുമൊക്കെ എവിടെ നേരം. ഒന്ന് ഫ്രീയാകുമ്പോഴേക്കും മൊബൈല്‍, നിസ്കാരത്തില്‍ വരെ മെസ്സേജുകള്‍ നോക്കുന്നവര്‍.

 

പ്രായമായവരും കുട്ടികളും ഒരുപോലെയാണിക്കാര്യത്തില്‍. അറിയില്ലെങ്കില്‍ പേരക്കുട്ടികള്‍ പഠിപ്പിച്ചുകൊടുക്കും... വഅള്‍ കേള്‍ക്കാനെന്നും പറഞ്ഞിട്ടാണ് തുടങ്ങുക.

 

തീരെ നോക്കണ്ട എന്നല്ല, അഡിക്റ്റാകണ്ട.കുറെ നല്ല കാര്യങ്ങളും ഇല്ലേ... ഉണ്ട്. പക്ഷേ, എത്ര ആളുകളുണ്ട് നല്ല കാര്യങ്ങള്‍ വായിക്കുന്നവര്‍, ജീവിതത്തില്‍ പകര്‍ത്തുന്നവര്‍.   പലതും ടച്ച് ചെയ്യുന്ന ആ വിരല്‍ ബന്ധം മാത്രമല്ലേ ഉള്ളൂ.

 

അതിനൊക്കെ സമയം നിശ്ചയിക്കുക. അര്‍ജന്‍റാണെങ്കില്‍ കോള്‍ ചെയ്യുമല്ലോ.

 

ദിക്റ്-ഇബാദത്തുകള്‍ക്ക് കൂടുതല്‍ സമയം നീക്കിവെക്കുക. അതിന് ഫുള്ടൈം Online ആയിരിക്കും. എല്ലാം offline ആകുന്ന ഒരു സമയം വരാനുണ്ടെന്ന ഓര്‍മ ഉണ്ടായിരിക്കട്ടെ.

 

ആഖിബത്ത് നന്നാകാന്‍ ദുആ ചെയ്തുകൊണ്ടേയിരിക്കുക, നല്ല അമല് ചെയ്തുകൊണ്ടിരിക്കുമ്പോള്‍ മരിപ്പിക്കണേ എന്ന് ദുആ ചെയ്യാം.

 

നമ്മളൊക്കെ എന്തൊരു കൂളാണ്... ഒരു പേടിയുമില്ല. വലിയ ആളുകളൊക്കെ പേടിച്ചുവിറച്ചാണ് ഇവിടന്ന് പോയത്. നിരവധി സംഭവങ്ങളുണ്ട്. എന്‍റെ ആത്മാവ് സ്വര്‍ഗത്തിലേക്കാണോ നരകത്തിലേക്കാണോ പോവുക എന്ന് എനിക്കറിയില്ലെന്നാണ് ഇമാമുനശ്ശാഫിഈ رحمة الله عليهപറഞ്ഞത്.

قال المزني: الإمام الشافعي بكى وقال: لا أدري أتصير روحي إلى الجنة فأُهنّيها، أم إلى النار فأُعزّيها؟

 

അടുത്ത ആയത്ത് 29

മനുഷ്യനെ നിര്‍ജീവാവസ്ഥയില്‍ നിന്ന് ജീവനുള്ള അവസ്ഥയിലേക്ക് കൊണ്ടുവന്നു എന്ന അനുഗ്രഹം ചെയ്ത അല്ലാഹു, അവന് ചെയ്തുകൊടുത്ത മറ്റൊരു വലിയ അനുഗ്രഹമാണ് ഇനി പറയുന്നത്.

 

മൂന്നു വാക്യങ്ങള്‍ ഉള്‍ക്കൊള്ളുന്ന ഈ വചനത്തില്‍ ഒന്നാമതായാണ് ആ മഹാ അനുഗ്രഹത്തെക്കുറിച്ച് പറയുന്നത്. രണ്ടാമത് പറയുന്നത് അവന്‍റെ അപാരമായ കഴിവിനെക്കുറിച്ചാണ്, മൂന്നാമതായി അവന്‍ സര്‍വജ്ഞനാണെന്നും സ്ഥാപിക്കുന്നു.

ജീവികളില്‍ വെച്ചേറ്റവും ഉത്തമനും ഉല്‍കൃഷ്ടനുമാണ് മനുഷ്യന്‍. അവന്‍റെ ശാരീരികവും ആത്മികവുമായ അഭിവൃദ്ധിക്കും വികാസത്തിനും വേണ്ടി ഉപയോഗപ്പെടുത്താനാണ് ഭൂമിയിലുള്ള എല്ലാ വസ്തുക്കളും അല്ലാഹു സൃഷ്ടിച്ചത്. ഇതാണ് ആ മഹാ അനുഗ്രഹം.

 

ഭൂമിയില്‍ നിലവിലുള്ള വസ്തുക്കളെല്ലാം മനുഷ്യനു വേണ്ടി – മനുഷ്യന്‍ ഭൂമിയില്‍ താമസം തുടങ്ങും മുമ്പുതന്നെ – അല്ലാഹു തയ്യാറാക്കിവെച്ചിരിക്കുകയാണ്. ഒരു വിധത്തിലല്ലെങ്കില്‍ മറ്റൊരു വിധത്തില്‍, ഒരിക്കലല്ലെങ്കില്‍ മറ്റൊരിക്കല്‍, ഒരു കൂട്ടര്‍ക്കല്ലെങ്കില്‍ മറ്റൊരു കൂട്ടര്‍ക്ക്, ഉപകാരപ്പെടാത്ത ഒരു വസ്തുവും ഈ ഭൂലോകത്തില്ല.

هُوَ الَّذِي خَلَقَ لَكُمْ مَا فِي الْأَرْضِ جَمِيعًا ثُمَّ اسْتَوَى إِلَى السَّمَاءِ فَسَوَّاهُنَّ سَبْعَ سَمَاوَاتٍ وَهُوَ بِكُلِّ شَيْءٍ عَلِيمٌ (29)

ഭൂമിയിലുള്ളതൊക്കെയും നിങ്ങള്‍ക്കായി സൃഷ്ടിച്ചത് അവനാണ്. ഏഴാകാശങ്ങളായി ഉപരിലോകത്തെ സംവിധാനിച്ചതും അവന്‍ തന്നെ. അവന്‍ എല്ലാ കാര്യങ്ങളും നന്നായി അറിയുന്നവനാണ്.

 

وَأَكْثَرُ مُفَسِّرِي السَّلَفِ: أَيِ ارْتَفَعَ إِلَى السَّمَاءِ، وَقَالَ ابْنُ كَيْسَانَ وَالْفَرَّاءُ وَجَمَاعَةٌ مِنَ النَّحْوِيِّينَ: أَيْ أَقْبَلَ عَلَى خَلْقِ السَّمَاءِ، وَقِيلَ: قَصَدَ لِأَنَّهُ خَلَقَ الْأَرْضَ أَوَّلًا ثُمَّ عَمَدَ إِلَى خَلْقِ السماء، 

هُوَ الَّذِي خَلَقَ لَكُمْ مَا فِي الْأَرْضِ جَمِيعًا
പ്രത്യക്ഷത്തില്‍ നമുക്കിതുവരെ ആവശ്യം വന്നിട്ടില്ലാത്ത – ചിലപ്പോള്‍ ഉപദ്രവകരം മാത്രമാണെന്ന് തോന്നിയ – എത്രയെത്ര വസ്തുക്കള്‍ മനുഷ്യന്യനി അത്യാവശ്യവസ്തുക്കളായി മാറിക്കൂടാ! കാരണം, മനുഷ്യന്‍റെ ആവശ്യങ്ങളും ഉപയോഗങ്ങളും കണ്ടുപിടിത്തങ്ങളും വര്‍ധിച്ചുകൊണ്ടേയിരിക്കുകയല്ലേ.

 

ഇങ്ങനെ  വിശാലമായി ചിന്തിക്കുമ്പോള്‍, ഭൂമിയിലുള്ളത് മുഴുവനും നിങ്ങള്‍ക്കുവേണ്ടി സൃഷ്ടിച്ചിരിക്കുന്നു (خَلَقَ لَكُم مَّا فِي الْأَرْضِ جَمِيعًا) എന്ന വാക്യം എത്ര അര്‍ത്ഥ ഗര്‍ഭമാണ്!

മനുഷ്യസൃഷ്ടിക്ക് അല്ലാഹു നല്‍കിയ മഹത്തായ സ്ഥാനവും ഈ വാക്യം സൂചിപ്പിക്കുന്നുണ്ട്. അതുസംബന്ധമായി അടുത്തവചനം മുതല്‍ പറയുന്നുമുണ്ട്.

ഭൂമിയിലുള്ളതെല്ലാം മനുഷ്യര്‍ക്ക്‌ വേണ്ടി സൃഷ്ടിച്ചിരിക്കുന്നുവെന്ന് പറഞ്ഞതിന്‍റെ താല്പര്യം ഏതു വസ്തുവും ആര്‍ക്കുവേണമെങ്കിലും അവരുടെ ഇഷ്ടംപോലെ കൈകാര്യം ചെയ്യാമെന്നല്ല. മനുഷ്യസമൂഹത്തിന്‍റെ പൊതുവെയുള്ള നന്‍മക്കുവേണ്ടിയാണ് അവ സൃഷ്ടിക്കപ്പെട്ടിരിക്കുന്നത് എന്നാണ്.

യാതൊരു വ്യവസ്ഥയും നിയന്ത്രണവുമില്ലാതെ എല്ലാം എല്ലാവര്‍ക്കും കൈകാര്യം ചെയ്യാമെന്നുവന്നാല്‍, അതുകൊണ്ടുണ്ടാകുന്ന ഭവിഷ്യത്തുകള്‍ ഊഹിക്കാമല്ലോ. അതുകൊണ്ടുതന്നെയാണ് ഭൂമിയിലെ വിഭവങ്ങളും മറ്റു വസ്തുക്കളും കൈകാര്യം ചെയ്യുന്നതിന് ചില ഉപാധികളും നിയമങ്ങളുമൊക്കെ സംവധിനാച്ചിട്ടുള്ളത്.

ഇത് പ്രത്യേകമായി പറയാന്‍ കാരണം, അങ്ങനെ വാദിച്ചവരുണ്ട്, ഇപ്പോഴും വാദിക്കുന്നവരുമുണ്ട് എന്നതുകൊണ്ടാണ്. ഈ ആയത്തില്‍ പറഞ്ഞത് പൊക്കിപ്പിടിച്ച്, ഭൂമിയിലുള്ള ഒരു സാധനത്തിനും ആര്‍ക്കും പ്രത്യേക അവകാശമില്ലെന്നും എല്ലാവരും തുല്യാവകാശികളാണെന്നും മുമ്പ് 'ഇബാഹികള്‍' വാദിച്ചിട്ടുണ്ട്. ഇപ്പോഴും അങ്ങനെ വാദിക്കുന്ന ചിലരുണ്ട്.

 

ഇത് തീരെ ശരിയല്ല. കാരണം, ഈ ആയത്തില്‍ 'എല്ലാ ഓരോരുത്തര്‍ക്കും' എന്ന് പറഞ്ഞിട്ടില്ല. ഭൂമിയിലുള്ള മുഴുവന്‍ വസ്തുക്കളും നിങ്ങള്‍ എല്ലാവര്‍ക്കുമായി സൃഷ്ടിച്ചു എന്നാണിവിടെ താല്‍പര്യം; അല്ലാതെ, എല്ലാ സാധാനവും എല്ലാ ഓരോരുത്തര്‍ക്കുമായി സൃഷ്ടിച്ചു എന്നല്ല (തഫ്‌സീര്‍ ബൈളാവി, പേജ് 23).

 

ثُمَّ اسْتَوَى إِلَى السَّمَاءِ فَسَوَّاهُنَّ سَبْعَ سَمَاوَاتٍ وَهُوَ بِكُلِّ شَيْءٍ عَلِيمٌ

ഏറ്റവും അത്ഭുതകരവും സുശക്തവുമായ നിലയില്‍ ആകാശ-ഭൂമികളെയും അവയിലുള്ള എല്ലാറ്റിനെയും സൃഷ്ടിച്ച് ക്രമീകരിച്ച അല്ലാഹു സര്‍വജ്ഞനും സര്‍വശക്തനുമാണ്. അതുകൊണ്ടുതന്നെ മനുഷ്യന്‍ മരണപ്പെട്ട് ശരീരമെല്ലാം നശിച്ച് നാമാവശേഷമായാലും അവനെ പുനര്‍ജീവിപ്പിച്ച് തന്‍റെ സന്നിധിയില്‍ ഹാജറാക്കാന്‍ അല്ലാഹുവിന് ഒട്ടും പ്രയാസമില്ല. അതുപോലെ, ഈ മഹാപ്രപഞ്ചം പടച്ചുണ്ടാക്കി വ്യവസ്ഥാപിതമായി നിയന്ത്രിച്ചുപോരുന്ന അല്ലാഹു എല്ലാ കാര്യങ്ങളെക്കുറിച്ചും, ഭൂത-വര്‍ത്തമാന-ഭാവികാല വ്യത്യാസമന്യെ, ചെറുപ്പ-വലിപ്പ വ്യത്യാസമന്യേ, നന്നായി അറിയുന്നവനാണ്.

 

سَبْعَ سَمَاوَاتٍ

ആകാശങ്ങള്‍ ഏഴെണ്ണമാണ് എന്ന് വിശുദ്ധ ഖുര്‍ആനില്‍ വിവിധ സ്ഥലങ്ങളില്‍ പറയപ്പെട്ടിട്ടുണ്ട്. ആധുനിക ഗോള ശാസ്ത്രം ഏഴ് ആകാശങ്ങള്‍ കണ്ടെത്തിയില്ല എന്നതുകൊണ്ട് അല്ലാഹു സ്പഷ്ടമായി ആവര്‍ത്തിച്ചു പറഞ്ഞ ഇക്കാര്യം നിഷേധിക്കുകയോ അതല്ലെങ്കില്‍ മറ്റേതെങ്കിലും നിലക്ക് വ്യാഖ്യാനിക്കുകയോ ചെയ്യരുത്.

ശാസ്ത്രം പിന്നീടത് കണ്ടുപിടിച്ചേക്കാം. ശാസ്ത്രം നിഗമനങ്ങളല്ലേ. മാറിമാറിക്കൊണ്ടിരിക്കും. നൂറു ശതമാനവും ശരിയെന്നു ഒരു കാലത്ത് പറഞ്ഞ ഒരു സിദ്ധാന്തം പിന്നൊരു കാലത്ത് നൂറുശതമാനം തെറ്റാണെന്നു അതേ ശാസ്ത്രജ്ഞന്മാര്‍തന്നെ പറയാറില്ലേ.

അതുപോലെ, ഏഴ് ആകാശങ്ങളില്‍ ഓരോന്നിന്‍റെയും സ്വഭാവം, പ്രത്യേകത, അതിര്‍ത്തി – ഇതൊക്കെ എങ്ങനെയാണെന്നോ എന്താണെന്നോ നമുക്ക് പറയാന്‍ കഴിയില്ല. അല്ലാഹു പറഞ്ഞത് അതേപോലെ വിശ്വസിക്കുക, അതിനപ്പുറമുള്ളതിനെക്കുറിച്ച് അവനറിയാമെന്നു പറഞ്ഞ് വിട്ടേക്കുക.

----------------------------------