അബ്ദുല്ല ഇബ്നു സലാം: തൗറാത്തിൽ നബിയെ കണ്ടെത്തിയ യഹൂദ പണ്ഡിതന്‍
യഹൂദരല്ലാത്തവർ പോലും അദ്ദേഹത്തെ പരക്കെ ബഹുമാനിക്കുകയും ആദരിക്കുകയും ചെയ്തിരുന്ന, മദീനയിലെ ഒരു ജൂത പണ്ഡിതനായിരുന്നു അൽ-ഹുസൈൻ ഇബ്നു സലാം (പിന്നീട് പേര് അബ്ദുല്ല എന്നാക്കി). ഭക്തിക്കും നന്മയ്ക്കും നിഷ്കളങ്കമായ പെരുമാറ്റത്തിനും സത്യസന്ധതയ്ക്കും പേരുകേട്ടവരായിരുന്നു അവര്‍. സമാധാനപരവും സൗമ്യവുമായ ജീവിതമാണ് അദ്ദേഹം നയിച്ചിരുന്നത്. എന്നാൽ തന്റെ സമയം ചെലവഴിക്കുന്നത് ഗൗരവതരവും ലക്ഷ്യബോധവുമുള്ള കാര്യങ്ങളില്‍ മാത്രമായിരുന്നു. ഓരോ ദിവസവും ഒരു നിശ്ചിത സമയം അദ്ദേഹം ക്ഷേത്രത്തിൽ ആരാധിക്കുകയും പഠിപ്പിക്കുകയും പ്രസംഗിക്കുകയും ചെയ്യും. പിന്നെ ഈന്തപ്പനകളെ പരിപാലിക്കുകയും ചുള്ളിക്കൊമ്പുകൾ വെട്ടിനീക്കി മരങ്ങളെ ഭംഗിയാക്കുകയും പരാഗണം നടത്തുകയും ചെയ്തുകൊണ്ട് അയാൾ തന്റെ തോട്ടത്തിൽ കുറച്ച് സമയം ചെലവഴിക്കും. അതിനുശേഷം, തന്റെ മതത്തെക്കുറിച്ചുള്ള ഗ്രാഹ്യവും അറിവും വർദ്ധിപ്പിക്കുന്നതിന്, അദ്ദേഹം തൗറാത്തിന്റെ പഠനത്തിനായി സ്വയം സമർപ്പിക്കും.
ഈ പഠനത്തിൽ, മുൻ പ്രവാചകന്മാരുടെ സന്ദേശം പൂർത്തീകരിക്കുന്ന ഒരു പ്രവാചകന്റെ ആഗമനത്തെക്കുറിച്ച് പ്രതിപാദിക്കുന്ന തൗറാത്തിലെ ചില വാക്യങ്ങൾ അദ്ദേഹത്തെ പ്രത്യേകം ആകർഷിച്ചിരുന്നു. അതിനാൽ മക്കയിൽ ഒരു പ്രവാചകൻ പ്രത്യക്ഷപ്പെട്ടുവെന്ന വാർത്തകൾ കേട്ടപ്പോൾ അൽ-ഹുസൈൻ ഉടനടി അദ്ദേഹത്തെ കാണാന്‍ താൽപര്യം പ്രകടിപ്പിച്ചു. അദ്ദേഹം പറയുന്നു: "ദൈവദൂതൻ (സ്വ) പ്രത്യക്ഷപ്പെട്ടതായി കേട്ടപ്പോൾ, ഞാൻ അദ്ദേഹത്തിന്റെ പേര്, വംശാവലി, സ്വഭാവസവിശേഷതകൾ, സമയം, സ്ഥലം എന്നിവയെക്കുറിച്ച് ഞങ്ങളുടെ വേദഗ്രന്ഥത്തിൽ അന്വേഷിക്കാൻ തുടങ്ങി. ഈ അന്വേഷണങ്ങളിൽ നിന്ന്, അദ്ദേഹത്തിന്റെ പ്രവാചകത്വത്തിന്റെ ആധികാരികതയെക്കുറിച്ച് എനിക്ക് ബോധ്യപ്പെടുകയും അദ്ദേഹത്തിന്റെ ദൗത്യത്തിന്റെ സത്യാവസ്ഥ ഞാൻ സ്ഥിരീകരിക്കുകയും ചെയ്തു. എന്നിരുന്നാലും, ഞാൻ എന്റെ നിഗമനങ്ങൾ ജൂതന്മാരിൽ നിന്ന് മറച്ചുവച്ചു. അങ്ങനെയിരിക്കെയാണ് മുഹമ്മദ് നബി(സ്വ) മക്ക വിട്ട് യസ്‌രിബിലേക്ക് വരുന്നുണ്ടെന്ന വിവരം കേട്ടത്. ഖുബായിൽ എത്തിയപ്പോൾ ഒരാൾ നഗരത്തിലേക്ക് വന്ന് ആളുകളെ വിളിച്ചു കൊണ്ട് നബി(സ്വ)യുടെ ആഗമനം അറിയിക്കുകയുണ്ടായി. ആ നിമിഷം, ഞാൻ ഒരു തെങ്ങിന്റെ മുകളിൽ എന്തോ ജോലി ചെയ്യുകയായിരുന്നു. എന്റെ അമ്മായി, ഖാലിദ ബിൻത് അൽ-ഹാരിസ് മരത്തിന്റെ ചുവട്ടിൽ ഇരിക്കുകയായിരുന്നു. വാർത്ത കേട്ടപ്പോൾ ഞാൻ അലറി: "അല്ലാഹു അക്ബർ! അല്ലാഹു അക്ബർ!”
എന്റെ തക്ബീർ കേട്ടപ്പോൾ അമ്മായി എന്നോട് പറഞ്ഞു: "ദൈവം നിങ്ങളെ നിരാശരാക്കട്ടെ. ദൈവത്തിൽ നിന്ന് മൂസ വരുന്നുവെന്ന് നിങ്ങൾ കേട്ടിരുന്നെങ്കിൽ കൂടുതൽ ഉത്സാഹം കാണിക്കുമായിരുന്നില്ല." "അമ്മായീ, അദ്ദേഹം ശരിക്കും ദൈവത്തിൽ നിന്നുള്ള മൂസയുടെ സഹോദരനാകുന്നു. അവന്റെ മതം പിന്തുടരുക. മൂസയുടെ അതേ ദൗത്യവുമായി അയക്കപ്പെട്ടവരാണ് അവരും." അവർ കുറച്ചു നേരം മിണ്ടാതിരുന്നിട്ട് പറഞ്ഞു: "നീ ഞങ്ങളോട് മുൻ പ്രവാചകന്മാർ പ്രബോധനം ചെയ്ത സത്യം സ്ഥിരീകരിക്കാനും തന്റെ നാഥന്റെ സന്ദേശം പൂർത്തിയാക്കാനും അയക്കപ്പെടുമെന്ന് പറഞ്ഞ പ്രവാചകനാണോ ഇദ്ദേഹം" "അതെ" ഞാൻ മറുപടി പറഞ്ഞു.
ഒട്ടും താമസിയാതെ ഞാൻ സന്നിധിയിലേക്ക് നടന്നു. അടുത്തെത്തും തോറും ആളുകൾ ഏറി വന്നു. അദ്ദേഹം പറയുന്നതായി ഞാൻ ആദ്യം കേട്ട വാക്കുകൾ ഇതായിരുന്നു: "ഹേ ജനങ്ങളേ! സമാധാനം പ്രചരിപ്പിക്കുക, ഭക്ഷണം പങ്കിടുക, ജനങ്ങളെല്ലാം ഉറങ്ങുമ്പോള്‍ നിങ്ങള്‍ പ്രാർത്ഥിക്കുക, എന്നാൽ നിങ്ങൾ സമാധാനത്തോടെ സ്വർഗത്തിൽ പ്രവേശിക്കും..." ഞാൻ അവരെ സൂക്ഷിച്ചു നോക്കി. അന്നേരം അതൊരു വഞ്ചകന്റെ മുഖമല്ലെന്ന് എനിക്ക് ബോധ്യമായി. ഞാൻ അദ്ദേഹത്തിന്റെ അടുത്ത് ചെന്ന് അല്ലാഹുവല്ലാതെ മറ്റൊരു ദൈവമില്ലെന്നും മുഹമ്മദ് അല്ലാഹുവിന്റെ ദൂതനാണെന്നുമുള്ള വിശ്വാസ പ്രഖ്യാപനം നടത്തി. നബി(സ്വ) എന്റെ നേരെ തിരിഞ്ഞ് ചോദിച്ചു: "എന്താണ് നിന്റെ പേര്?" “അൽ ഹുസൈൻ ഇബ്നു സലാം,” ഞാൻ മറുപടി പറഞ്ഞു. "പകരം, ഇപ്പോൾ അബ്ദുല്ല ഇബ്നു സലാം ആണ്," അദ്ദേഹം എനിക്ക് പുതിയൊരു നാമം നൽകുകയുണ്ടായി. "അതെ ഞാൻ അംഗീകരിക്കുന്നു, അബ്ദുല്ലാഹിബ്നു സലാം. നിങ്ങളെ സത്യവുമായി അയച്ചവനാണ് സത്യം, ഈ ദിവസത്തിന് ശേഷം മറ്റൊരു പേര് ഉണ്ടാകാൻ ഞാൻ ആഗ്രഹിക്കുന്നില്ല.
ഞാൻ വീട്ടിൽ തിരിച്ചെത്തി. എന്റെ ഭാര്യയ്ക്കും കുട്ടികൾക്കും എന്റെ വീട്ടുകാർക്കും ഇസ്ലാമിനെ പരിചയപ്പെടുത്തി. എന്റെ അമ്മായി ഖാലിദ ഉൾപ്പെടെ എല്ലാവരും ഇസ്ലാം സ്വീകരിച്ചു. എന്നിരുന്നാലും, ഞാൻ അവർക്ക് അനുവാദം നൽകുന്നതു വരെ യഹൂദന്മാരിൽ നിന്ന് അക്കാര്യം മറച്ചുവെക്കാൻ അവരെ ഉപദേശിച്ചു. തുടർന്ന്, ഞാൻ നബി(സ്വ)യുടെ അടുത്തേക്ക് മടങ്ങിപ്പോയി പറഞ്ഞു: "ദൈവദൂതരേ! യഹൂദർ പരദൂഷണത്തിലും അസത്യത്തിലും തല്‍പരരായ ഒരു ജനതയാണ്. അത് ഞാന്‍ നിങ്ങള്‍ക്ക് നേരിട്ട് കാണിച്ച് തരാം. അവരുടെ ഏറ്റവും പ്രമുഖരായ പുരുഷന്മാരെ നിങ്ങളെ കാണാന്‍ ക്ഷണിക്കണമെന്ന് ഞാൻ ആഗ്രഹിക്കുന്നു. നിങ്ങളുടെ മുറികളിലൊന്നിൽ എന്നെ അവരിൽ നിന്ന് ഒളിപ്പിക്കുക. ഞാൻ ഇസ്ലാം സ്വീകരിച്ചതായി അറിയുന്നതിന് മുമ്പ് അവരോട് എന്നെ കുറിച്ച് ചോദിക്കുക. എന്നിട്ട് അവരെ ഇസ്‍ലാമിലേക്ക് ക്ഷണിക്കുക. ഞാനൊരു മുസ്‍ലിമായി എന്നറിഞ്ഞാൽ, അവർ എന്നെ കുറ്റപ്പെടുത്തുകയും പറഞ്ഞ വാക്കുകള്‍ മാറ്റിപ്പറയുകയും ചെയ്യുന്നത് നിങ്ങള്‍ക്ക് കാണാം. പ്രവാചകൻ എന്നെ തന്റെ ഒരു മുറിയിൽ പാർപ്പിക്കുകയും പ്രമുഖ ജൂത വ്യക്തികളെ ക്ഷണിക്കുകയും ചെയ്തു. നബി അവർക്ക് ഇസ്ലാമിനെ പരിചയപ്പെടുത്തുകയും ദൈവത്തിൽ വിശ്വസിക്കാൻ അവരെ പ്രേരിപ്പിക്കുകയും ചെയ്തു. അവർ സത്യത്തെക്കുറിച്ച് തർക്കിക്കുകയും ദൈവത്തെ പരിഹസിക്കുകയും ചെയ്തു.
അവർക്ക് ഇസ്ലാം സ്വീകരിക്കാൻ ആഗ്രഹമില്ലെന്ന് മനസ്സിലാക്കിയപ്പോൾ നബി അവരോട് ചോദിച്ചു: "നിങ്ങളുടെ ഇടയിൽ അൽ ഹുസൈൻ ഇബ്നു സലാമിന്റെ സ്ഥാനമെന്താണ്?" "അദ്ദേഹം ഞങ്ങളുടെ നേതാവും നേതാവിന്റെ മകനുമാണ്. അവൻ ഞങ്ങളുടെ ആചാര്യനും ഞങ്ങളുടെ പണ്ഡിതനുമാണ്, "അദ്ദേഹം ഇസ്ലാം സ്വീകരിച്ചുവെന്നറിഞ്ഞാൽ നിങ്ങളും ഇസ്ലാം സ്വീകരിക്കുമോ?" പ്രവാചകൻ ചോദിച്ചു. “ദൈവം നിങ്ങളെ നശിപ്പിക്കട്ടെ! അവൻ ഒരിക്കലും ഇസ്ലാം സ്വീകരിക്കില്ല. ഇസ്ലാം സ്വീകരിക്കുന്നതിൽ നിന്ന് ദൈവം അവനെ രക്ഷിക്കട്ടെ, " അവർ പറഞ്ഞു. ഈ സമയത്ത്, ഞാൻ കടന്നു വരികയും ഇസ്ലാം സ്വീകരിച്ചതായി പ്രഖ്യാപിക്കുകയും ചെയ്തു. "യഹൂദരുടെ സമൂഹമേ! ദൈവത്തെക്കുറിച്ച് ബോധവാനായിരിക്കുകയും മുഹമ്മദ് കൊണ്ടുവന്നത് സ്വീകരിക്കുകയും ചെയ്യുക. അവൻ ദൈവത്തിന്റെ ദൂതനാണെന്ന് നിങ്ങൾക്ക് തീർച്ചയായും അറിയാം, അദ്ദേഹത്തെക്കുറിച്ചുള്ള പ്രവചനങ്ങളും അവന്റെ പേരും സവിശേഷതകളും നിങ്ങളുടെ തൗറാത്തിൽ നിങ്ങൾക്ക് കണ്ടെത്താനാകും. അദ്ദേഹം ദൈവത്തിന്റെ ദൂതനാണെന്ന് ഞാൻ പ്രഖ്യാപിക്കുന്നു. എനിക്ക് അവനിൽ വിശ്വാസമുണ്ട്, അവൻ പറയുന്നത് സത്യമാണെന്ന് ഞാന്‍ വിശ്വസിക്കുന്നു. എനിക്ക് അവനെ അറിയാം." ഇത് കേട്ടതും "നിങ്ങൾ ഒരു നുണയനാണ്" എന്ന് പറഞ്ഞ് അവർ ആക്രോശിച്ചു. 'ദൈവമാണേ, നീ ദുഷ്ടനും അജ്ഞനുമാണ്, ദുഷ്ടനും അജ്ഞനുമായ ഒരു വ്യക്തിയുടെ മകനുമാണ്.' സങ്കൽപ്പിക്കാവുന്ന എല്ലാ അധിക്ഷേപങ്ങളും അവർ എന്റെ മേൽ പറഞ്ഞുകൊണ്ടിരുന്നു..." (അൽ-ബുഖാരി, 3839)
അബ്ദുല്ലാഹിബ്നു സലാം (റ) വിജ്ഞാന ദാഹത്തോടെ ഇസ്ലാമിനെ സമീപിച്ചു. ഖുർആനെ തീക്ഷ്ണതയോടെയും ഉത്സാഹത്തോടെയും സമീപിച്ചു. അതിലെ മനോഹരവും ഉദാത്തവുമായ വാക്യങ്ങൾ പാരായണം ചെയ്യാനും പഠിക്കാനും ധാരാളം സമയം ചെലവഴിച്ചു. പ്രവാചകനോട് (സ്വ) അഗാധമായ അടുപ്പം പുലർത്തിയിരുന്ന അദ്ദേഹം നിരന്തരം ആ സഹവാസത്തിലായിരുന്നു. ആരാധനയിലും പഠനത്തിലും അധ്യാപനത്തിലും മുഴുകി അദ്ദേഹം തന്റെ സമയത്തിന്റെ ഭൂരിഭാഗവും മസ്ജിദുന്നബവിയിൽ കഴിച്ചുകൂട്ടി. പ്രവാചകന്റെ പള്ളിയിൽ പതിവായി ഒത്തുകൂടുന്ന സ്വഹാബാക്കളുടെ പഠന വൃന്ദങ്ങളെ പഠിപ്പിക്കുന്നതിനുള്ള ലളിതവും ചലനാത്മകവും ഫലപ്രദവുമായ കാര്യങ്ങളിൽ അദ്ദേഹം പ്രശസ്തനായിരുന്നു. അഹ്‌ലുൽജന്നയിൽ നിന്നുള്ള "സ്വർഗ്ഗത്തിലെ വ്യക്തി" എന്ന നിലയിൽ സ്വഹാബാക്കൾക്കിടയിൽ അബ്ദുല്ല ഇബ്നു സലാം അറിയപ്പെട്ടു. ദൈവത്തിലുള്ള വിശ്വാസവും സമ്പൂർണ്ണ സമർപ്പണവും പ്രവാചകൻ മുഹമ്മദ് നബിയുമായുള്ള സഹവാസവും അദ്ദേഹത്തെ ഉന്നതികളിലെത്തിച്ചു.
Leave A Comment