Islamonweb

ഭൗതികവും ശാസ്ത്രീയവുമായ മുന്നേറ്റങ്ങളിലൂടെ മാത്രമല്ല, ആത്മീയവും അതിന്ദ്രീയവുമായ ഉൾക്കാഴ്ചകളിലൂടെയുമാണ് മാനവചരിത്രത്തിന്റെ പരിണാമം അടയാളപ്പെടുത്തപ്പെട്ടിട്ടുള്ളത്. ആധുനിക യുഗം യുക്തിചിന്തയുടെയും ശാസ്ത്രീയ പ്രബുദ്ധതയുടെയും ഉന്നതിയിലാണെന്ന് അവകാശപ്പെടുമ്പോഴും, പ്രപഞ്ചത്തിന്റെ നിഗൂഢതകളിലേക്ക് വെളിച്ചം വീശുന്ന അദൃശ്യ ശക്തികളെക്കുറിച്ചുള്ള താല്പര്യം ലോകമെമ്പാടും വർദ്ധിച്ചുവരികയാണ്. ഇതിൽ ഏറ്റവും ശ്രദ്ധേയമായ ഒന്നാണ് ലോകാവസാനത്തോടനുബന്ധിച്ച് പ്രത്യക്ഷപ്പെടുമെന്ന് വിവിധ മതങ്ങൾ പ്രവചിക്കുന്ന ദജ്ജാൽ അഥവാ അന്തിക്രിസ്തു എന്ന സങ്കല്പം. ഈ സങ്കല്പത്തെ കേവലം ഒരു മതപരമായ വിശ്വാസം എന്നതിലുപരി, സാമൂഹികവും രാഷ്ട്രീയവും സാങ്കേതികവുമായ ഒരു സങ്കീർണ്ണ പ്രതിഭാസമായി വിലയിരുത്തേണ്ടതുണ്ട്. സാത്താൻ സേവ, ഇല്ലുമിനാറ്റി, രക്തബലി, ബ്ലാക്ക് മാജിക്, മെൻസസ് ബ്ലഡ് ബാങ്ക് തുടങ്ങിയവയെല്ലാം ഈ ഒരു നിഗൂഢ വ്യവസ്ഥിതിയുടെ ബാഹ്യമായ പരിണാമങ്ങളായി ആധുനിക ഗൂഢാലോചന സിദ്ധാന്തങ്ങൾ ചൂണ്ടിക്കാണിക്കുന്നു. ഇതിനോടൊപ്പം തന്നെ ചേർത്തു വായിക്കേണ്ടതാണ് ആധുനിക റോക്കറ്റ് ശാസ്ത്രത്തിന്റെ പിതാക്കളിലൊരാളായ ജാക്ക് പാഴ്സൺസിന്റെ ജീവിതവും അദ്ദേഹത്തിന്റെ യുദ്ധസാങ്കേതികവിദ്യയിലെ പരീക്ഷണങ്ങളും. തന്റെ വിജയങ്ങൾക്ക് പിന്നിൽ മാനുഷികമായ ബുദ്ധിക്കപ്പുറമുള്ള ബാഹ്യമായൊരു ശക്തിയുടെ സഹായമുണ്ടെന്ന് അദ്ദേഹം അവകാശപ്പെട്ടത് ശാസ്ത്രവും പൈശാചികതയും തമ്മിലുള്ള അതിർവരമ്പുകളെക്കുറിച്ചുള്ള ഗൗരവകരമായ ചോദ്യങ്ങൾ ഉയർത്തുന്നതാണ്.

ദജ്ജാൽ സങ്കല്പത്തിന്റെ ചരിത്രപരവും ദൈവശാസ്ത്രപരവുമായ അടിത്തറകൾ പരിശോധിക്കുമ്പോൾ, അത് അബ്രഹാമിക് മതങ്ങളുടെ അന്ത്യകാല ശാസ്ത്രത്തിൽ ഏറ്റവും ഭയാനകമായി ചിത്രീകരിക്കപ്പെടുന്ന രൂപമാണ് അന്തിക്രിസ്തു അഥവാ മസീഹ് ദജ്ജാൽ എന്ന് കാണാം. ലോകാവസാനത്തിന് തൊട്ടുമുമ്പുള്ള കാലഘട്ടത്തിൽ മാനവരാശിയെ വഞ്ചിക്കാനും സത്യത്തിൽ നിന്ന് അകറ്റാനും പ്രത്യക്ഷപ്പെടുന്ന പരമമായ തിന്മയുടെ പ്രതീകമായാണ് ഈ രൂപം ചിത്രീകരിക്കപ്പെടുന്നത്. ചരിത്രപരമായി നോക്കുമ്പോൾ, ഈ സങ്കല്പം വെറുമൊരു മതപരമായ വിശ്വാസത്തിൽ ഒതുങ്ങുന്നില്ല; മറിച്ച് രാഷ്ട്രീയവും സാമൂഹികവും ആത്മീയവുമായ നിരവധി മാനങ്ങൾ ഇതിനുണ്ട്. നീതിക്കും സത്യത്തിനും എതിരായി നിൽക്കുന്ന ഒരു ആഗോള ശക്തിയുടെ ഉദയവും അതിന്റെ പതനവും ഈ മൂന്ന് മതപാരമ്പര്യങ്ങളും ഒരേപോലെ വിഭാവനം ചെയ്യുന്നുണ്ടെങ്കിലും, അവയുടെ വിവരണങ്ങളിലും വ്യാഖ്യാനങ്ങളിലും കാതലായ വ്യത്യാസങ്ങൾ കാണാം.

ദജ്ജാൽ എന്ന പദത്തിന്റെ ഉൽഭവം അറബി ഭാഷയിലെ ദജല എന്ന ധാതുവിൽ നിന്നാണ്. ഇതിന്റെ അർത്ഥം വഞ്ചിക്കുക, സത്യം മറച്ചുവെക്കുക, കുഴപ്പമുണ്ടാക്കുക എന്നിവയൊക്കെയാണ്. സ്വർണ്ണം പൂശിയ ലോഹത്തെ സൂചിപ്പിക്കാനും ഈ പദം ഉപയോഗിക്കാറുണ്ട്, ഇത് പുറമെ തിളക്കമുള്ളതും എന്നാൽ ഉള്ളിൽ മൂല്യമില്ലാത്തതുമായ ഒന്നിനെ സൂചിപ്പിക്കുന്നതു കൂടിയാണ്. സുറിയാനി ഭാഷയിലെ ദഗ്ഗാല എന്ന പദവുമായും ഇതിന് ബന്ധമുണ്ട്, ഇതിന്റെ അർത്ഥം കള്ളം പറയുന്നവൻ എന്നാണ്. ഇസ്‍ലാമിക പാരമ്പര്യത്തിൽ മസീഹ് ദജ്ജാൽ എന്നാൽ വഞ്ചകനായ മസീഹ് എന്നാണ് അർത്ഥം. യഥാർത്ഥ മസീഹായ ഈസാ നബിയെ അനുകരിക്കാൻ ശ്രമിക്കുന്നതിനാലാണ് അന്തിക്രിസ്തു എന്ന് വിളിക്കുന്നത്.

ക്രൈസ്തവ പാരമ്പര്യത്തിലെ അന്തിക്രിസ്തു എന്ന പദം ഗ്രീക്ക് ഭാഷയിലെ ആന്റിക്രിസ്റ്റോസ് എന്ന വാക്കിൽ നിന്നാണ് രൂപപ്പെട്ടത്. ഇതിന് ക്രിസ്തുവിനെതിരായവൻ എന്നും ക്രിസ്തുവിനു പകരമായി സ്വയം അവരോധിക്കുന്നവൻ എന്നും അർത്ഥങ്ങളുണ്ട്. യഹൂദ പാരമ്പര്യത്തിലെ അർമിലസ് എന്ന പദം റോമിനെ സ്ഥാപിച്ച റോമുലസ് എന്ന പേരിൽ നിന്നോ അല്ലെങ്കിൽ സൊരാസ്ട്രിയൻ മതത്തിലെ തിന്മയുടെ സ്രോതസ്സായ അഹ്രിമാൻ എന്ന വാക്കിൽ നിന്നോ രൂപപ്പെട്ടതാണെന്ന് കരുതപ്പെടുന്നു.

ഇസ്‍ലാമിക വിശ്വാസമനുസരിച്ച് ലോകാവസാനത്തിന്റെ പത്ത് പ്രധാന അടയാളങ്ങളിൽ ഒന്നാണ് ദജ്ജാലിന്റെ പുറപ്പാട്. വിശുദ്ധ ഖുർആനിൽ ദജ്ജാലിനെക്കുറിച്ച് നേരിട്ട് പരാമർശങ്ങളില്ലെങ്കിലും പ്രവാചക വചനങ്ങളിൽ ഈ രൂപത്തെക്കുറിച്ചുള്ള വിവരണങ്ങൾ ലഭ്യമാണ്. ക്രൈസ്തവ വിശ്വാസപ്രകാരം അന്തിക്രിസ്തു എന്നത് ക്രിസ്തുവിന്റെ രണ്ടാമത്തെ വരവിന് മുന്നോടിയായി പ്രത്യക്ഷപ്പെടുന്ന പ്രധാന പ്രതിയോഗിയാണ്. പുതിയ നിയമത്തിലെ യോഹന്നാന്റെ ലേഖനങ്ങളിലും പൗലോസ് അപ്പോസ്തലന്റെ തെസ്സലോനിക്യർക്കുള്ള രണ്ടാം ലേഖനത്തിലും വെളിപാട് പുസ്തകത്തിലുമാണ് ഇതിനെക്കുറിച്ചുള്ള പരാമർശങ്ങൾ കൂടുതലായുള്ളത്. യോഹന്നാന്റെ ലേഖനങ്ങൾ അന്തിക്രിസ്തു എന്ന പദം നേരിട്ട് ഉപയോഗിക്കുന്നു. എന്നാൽ അവിടെ ഇത് ഒരു വ്യക്തിയെ മാത്രമല്ല, മറിച്ച് ക്രിസ്തുവിനെ നിഷേധിക്കുന്ന ഏതൊരു സിദ്ധാന്തത്തെയും വ്യക്തിയെയും സൂചിപ്പിക്കുന്നതാണ്. ക്രിസ്തു മാംസരൂപത്തിൽ വന്ന ദൈവമാണെന്ന് സമ്മതിക്കാത്ത എല്ലാവരും അന്തിക്രിസ്തുവിന്റെ ആത്മാവുള്ളവരാണെന്ന് യോഹന്നാൻ വ്യക്തമാക്കുന്നു. അതേസമയം, പൗലോസ് അപ്പോസ്തലൻ ഇതിനെ അധർമ്മത്തിന്റെ മനുഷ്യൻ അല്ലെങ്കിൽ നാശത്തിന്റെ പുത്രൻ എന്നാണ് വിശേഷിപ്പിക്കുന്നത്. വെളിപാട് പുസ്തകത്തിൽ ഇതിനെക്കുറിച്ച് കൂടുതൽ ആലങ്കാരികമായ വിവരണങ്ങളുണ്ട്. സമുദ്രത്തിൽ നിന്ന് കയറിവരുന്ന പത്തു കൊമ്പുകളുള്ള ഒരു മൃഗമായി അന്തിക്രിസ്തുവിനെ ചിത്രീകരിക്കുന്നു. ഈ മൃഗത്തിന് സാത്താൻ തന്റെ അധികാരം നൽകുകയും ലോകത്തെ മുഴുവൻ വഞ്ചിക്കാൻ സഹായിക്കുകയും ചെയ്യും. 666 എന്ന സംഖ്യ ഈ മൃഗത്തിന്റെ മുദ്രയായി വിശ്വസിക്കപ്പെടുന്നു.

കത്തോലിക്കാ സഭയും ഓർത്തഡോക്‌സ് സഭയും അന്തിക്രിസ്തുവിനെ ഒരു ഭാവി വ്യക്തിയായാണ് പൊതുവെ കാണുന്നത്. സെന്റ് സിറിൾ, സെന്റ് ജോൺ ക്രിസോസ്റ്റം തുടങ്ങിയ സഭാപിതാക്കന്മാർ അന്തിക്രിസ്തുവിനെ, ലോകത്തെ വഞ്ചിക്കുന്ന ഒരു വലിയ ചതിയനായാണ് കരുതുന്നത്. ഈ ഭരണം മൂന്നര വർഷം നീണ്ടുനിൽക്കുമെന്നാണ് പൊതുവായ വിശ്വാസം. മധ്യകാലഘട്ടത്തിൽ അന്തിക്രിസ്തുവിനെക്കുറിച്ച് പല നാടോടി കഥകളും നിലവിലുണ്ടായിരുന്നു. പല കത്തോലിക്കാ പണ്ഡിതന്മാരും അന്തിക്രിസ്തുവിനെ ഒരു രാഷ്ട്രീയ അധികാര ശക്തിയായോ അല്ലെങ്കിൽ സഭയെ തകർക്കാൻ ശ്രമിക്കുന്ന ഒരു വ്യവസ്ഥിതിയായോ വ്യാഖ്യാനിക്കുന്നുണ്ട്. യഹൂദ എസ്‌കാറ്റോളജിയിൽ അന്തിക്രിസ്തുവിനെ പ്രതീകപ്പെടുത്തുന്ന രൂപമാണ് അർമിലസ്. മധ്യകാല യഹൂദ രചനകളായ സെഫർ സെറുബാബൽ, മിദ്രാഷ് വായോഷ എന്നിവയിലാണ് ഇതേക്കുറിച്ചുള്ള പരാമർശങ്ങളുള്ളത്. അർമിലസ് എന്ന പേര് റോം സ്ഥാപിച്ച റോമുലസ് എന്ന പേരുമായി ബന്ധപ്പെട്ടിരിക്കുന്നുവെന്ന് പണ്ഡിതന്മാർ കരുതുന്നു. അർമിലസ് റോമിലെ രാജാവാകുകയും ലോകം മുഴുവൻ കീഴടക്കുകയും ചെയ്യും. ക്രൈസ്തവ വിശ്വാസം അംഗീകരിക്കുകയും അവരോട് താനാണ് അവരുടെ മിശിഹാ എന്ന് അവകാശപ്പെടുകയും ചെയ്യും. തുടർന്ന് യഹൂദന്മാരെ വേട്ടയാടുകയും മിശിഹാ ബെൻ ജോസഫിനെ വധിക്കുകയും ചെയ്യും. ഒടുവിൽ യഥാർത്ഥ മിശിഹയായ മിശിഹാ ബെൻ ഡേവിഡ് പ്രത്യക്ഷപ്പെടുകയും അർമിലസിനെ തന്റെ വായിലെ ശ്വാസം കൊണ്ട് നശിപ്പിക്കുകയും ചെയ്യും എന്നാണ് യഹൂദരുടെ വിശ്വാസം.

പത്തൊമ്പതാം നൂറ്റാണ്ടിന്റെ അവസാനത്തോടെയും ഇരുപതാം നൂറ്റാണ്ടിലും ദജ്ജാൽ സങ്കല്പത്തിൽ വിപ്ലവകരമായ മാറ്റങ്ങൾ വന്നു. പരമ്പരാഗതമായ ഭൗതിക രൂപത്തിന് പകരം ദജ്ജാലിനെ ഒരു പ്രതീകാത്മക വ്യവസ്ഥിതിയായോ അല്ലെങ്കിൽ ആധുനിക സംസ്കാരത്തിന്റെ ഒരു ഭാവമായോ പണ്ഡിതന്മാർ കാണാൻ തുടങ്ങി. സയ്യിദ് അബുൽ അഅ്ലാ മൗദൂദി ദജ്ജാലിനെക്കുറിച്ചുള്ള പല ഹദീസുകളെയും യുക്തിപരമായാണ് വിശകലനം ചെയ്തത്. ദജ്ജാൽ എന്നത് ഭാവിയിൽ ലോകം ഭരിക്കാൻ പോകുന്ന നിരീശ്വരവാദപരമായ ശക്തികളുടെയും രാഷ്ട്രീയ വ്യവസ്ഥകളുടെയും പ്രതീകമാണെന്ന് അദ്ദേഹം വാദിച്ചു. തന്റെ കൃതികളിൽ ദജ്ജാലിന്റെ അത്ഭുതങ്ങളെ ആധുനിക ശാസ്ത്ര സാങ്കേതിക വിദ്യകളുടെ ദുരുപയോഗമായാണ് അദ്ദേഹം വ്യാഖ്യാനിച്ചത്. കൃത്രിമ മഴ, വിമാനങ്ങൾ വഴിയുള്ള വേഗത്തിലുള്ള യാത്ര, മാധ്യമങ്ങളിലൂടെയുള്ള വഞ്ചന എന്നിവയെല്ലാം ദജ്ജാലിന്റെ അടയാളങ്ങളായി അദ്ദേഹം കണ്ടു. അതുപോലെ ആധുനിക കാലത്ത് ദജ്ജാൽ സങ്കല്പത്തെ ഏറ്റവും കൂടുതൽ ലോകശ്രദ്ധയിലേക്ക് കൊണ്ടുവന്നത് ശൈഖ് ഇമ്രാൻ ഹുസൈനാണ്. അദ്ദേഹത്തിന്റെ അഭിപ്രായത്തിൽ ദജ്ജാൽ ഇതിനകം തന്നെ ഭൂമിയിൽ തന്റെ പ്രഭാവം ചെലുത്തിക്കഴിഞ്ഞു. ദജ്ജാലിയൻ വ്യവസ്ഥിതിയുടെ പ്രധാന തൂണുകളായി അദ്ദേഹം കാണുന്നത്, പലിശ അധിഷ്ഠിത സാമ്പത്തിക വ്യവസ്ഥ, മതനിരപേക്ഷതയും ഭൗതികവാദവും, മാധ്യമങ്ങളും വിവരസാങ്കേതിക വിദ്യയും, സമയത്തിന്റെ വികലമായ സങ്കല്പവുമാണ്. പ്രവാചകൻ പറഞ്ഞ ഒരു ദിവസം ഒരു വർഷം പോലെയാകും എന്നതിനെ അദ്ദേഹം സമയത്തിന്റെ ആപേക്ഷികതയുമായും ആധുനിക ഡിജിറ്റൽ കാലഘട്ടവുമായും ബന്ധിപ്പിക്കുന്നു. പന്ത്രണ്ട് മണിക്ക് ദിവസം തുടങ്ങുന്ന രീതി ദജ്ജാലിയൻ ആണെന്ന് അദ്ദേഹം വാദിക്കുന്നു.

ദജ്ജാലിന്റെ വരവിനായി ഒരു ആഗോള അധോലോക ശക്തി ബോധപൂർവ്വം പ്രവർത്തിക്കുന്നുണ്ടെന്നത് ഇന്ന് സോഷ്യൽ മീഡിയയിൽ വളരെ സജീവമായ ഒരു ചർച്ചയാണ്. ഇതിനെ ന്യൂ വേൾഡ് ഓർഡർ എന്നും വിളിക്കാറുണ്ട്. 1776-ൽ ആദം വെയ്ഷോപ്റ്റ് സ്ഥാപിച്ച ഇല്ലുമിനാറ്റി എന്ന രഹസ്യ സംഘടന ലോകത്തെ രാഷ്ട്രീയ-സാമ്പത്തിക മേഖലകളെ നിയന്ത്രിക്കുന്നുണ്ടെന്നാണ് ഗൂഢാലോചന സിദ്ധാന്തക്കാരുടെ വാദം. ദജ്ജാലിന്റെ ഒറ്റക്കണ്ണ് ലക്ഷണത്തെ ഇവർ അമേരിക്കൻ ഡോളറിലെ പിരമിഡിന് മുകളില്‍ കാണുന്ന കണ്ണ് ലക്ഷണവുമായി ബന്ധിപ്പിക്കുന്നു. ദജ്ജാലിനായി ഒരു ഏകലോക ഗവൺമെന്റ് സ്ഥാപിക്കുകയാണ് ഇവരുടെ ലക്ഷ്യമെന്ന് ഇവർ വിശ്വസിക്കുന്നു. ഫ്രീമേസൺ പ്രസ്ഥാനങ്ങളെയും ഇതേ ഗണത്തിൽ പെടുത്തിയാണ് പലരും സംസാരിക്കുന്നത്. റോത്ത് ചൈൽഡ് കുടുംബത്തെപ്പോലുള്ള അതിസമ്പന്നരായ ജൂത കുടുംബങ്ങൾ ലോക ബാങ്കുകളെ നിയന്ത്രിക്കുന്നുണ്ടെന്നും, ഇത് ദജ്ജാലിന്റെ വരാനിരിക്കുന്ന ഭരണത്തിന്റെ മുന്നോടിയാണെന്നും ചിലർ ആരോപിക്കുന്നു. കോവിഡ്-19 മഹാമാരി പോലുള്ള ആഗോള പ്രതിസന്ധികൾ ജനങ്ങളെ ഡിജിറ്റൽ സംവിധാനങ്ങളിലൂടെ നിയന്ത്രിക്കാനായി ഇവർ ബോധപൂർവ്വം നിർമ്മിച്ചതാണെന്നും ഗൂഢാലോചന സിദ്ധാന്തക്കാർ വിശ്വസിക്കുന്നു. ഇവരുടെ ലക്ഷ്യം മനുഷ്യരിൽ ചിപ്പുകൾ ഘടിപ്പിക്കുക വഴി പൂർണ്ണമായ നിയന്ത്രണം കൈവരിക്കുകയാണെന്നും ചിലർ വാദിക്കുന്നു. ദജ്ജാലിനെ സ്വീകരിക്കാനായി ലോകത്ത് ഒരു പ്രത്യേക കാത്തിരിക്കുന്ന സമൂഹം രൂപപ്പെടുന്നുണ്ടെന്ന സങ്കല്പം ഇതിനോട് ചേർന്നുനിൽക്കുന്നു. ഇവർ ആത്മീയതയെ പാടെ വെടിയുകയും ഭൗതിക സുഖങ്ങൾക്ക് മാത്രം മുൻഗണന നൽകുകയും ചെയ്യുന്നവരാണ്. ഇസ്‍ലാമിക പാരമ്പര്യത്തിൽ ദജ്ജാലിനെ 70,000 ജൂതന്മാർ അനുഗമിക്കുമെന്ന് പറയുന്നതിനെ ആധുനിക സയണിസ്റ്റ് പ്രസ്ഥാനവുമായി ചിലർ ബന്ധിപ്പിക്കുന്നു. ഈ സമൂഹം ദജ്ജാലിനെ ഒരു രക്ഷകനായിട്ടായിരിക്കും കാണുക എന്ന് ഹദീസുകൾ മുന്നറിയിപ്പ് നൽകുന്നുണ്ട്.

ദജ്ജാൽ സങ്കല്പത്തിന്റെ പ്രായോഗിക വശങ്ങളായി പലരും കാണുന്നത് സാത്താൻ സേവയെയും നിഗൂഢ സംഘടനകളെയുമാണ്. സാത്താനിസം എന്നത് കേവലം മതവിരുദ്ധത മാത്രമല്ല, മറിച്ച് സ്വാർത്ഥതയെയും അധികാരത്തെയും ദൈവവൽക്കരിക്കുന്ന ഒരു തത്വശാസ്ത്രമാണ്. ഇല്ലുമിനാറ്റി എന്ന പേരിൽ അറിയപ്പെടുന്ന സംഘടന, ലോകത്തെ ഒരു ഏകീകൃത ഭരണകൂടത്തിന് കീഴിൽ കൊണ്ടുവരാൻ ശ്രമിക്കുന്ന രഹസ്യ ശക്തിയായാണ് ചിത്രീകരിക്കപ്പെടുന്നത്. പത്തൊൻപതാം നൂറ്റാണ്ടിലെയും ഇരുപതാം നൂറ്റാണ്ടിലെയും പല നിഗൂഢ സംഘടനകളും അലിസ്റ്റർ ക്രോളിയെപ്പോലെയുള്ളവരുടെ തെലീമ എന്ന തത്വശാസ്ത്രത്തിൽ നിന്ന് പ്രചോദനം ഉൾക്കൊണ്ടിരുന്നു. ബ്ലാക്ക് മാജിക് അഥവാ ദുർമന്ത്രവാദം ഇത്തരം ഗ്രൂപ്പുകളുടെ പ്രധാന ആയുധമായി കണക്കാക്കപ്പെടുന്നു. പ്രകൃതിയിലെ നിഗൂഢ ശക്തികളെയും ആത്മാക്കളെയും നിയന്ത്രിച്ച് ഭൗതിക നേട്ടങ്ങൾ കൊയ്യുക എന്നതാണ് ഇതിന്റെ ലക്ഷ്യം. രക്തബലി ഇതിലെ ഏറ്റവും ക്രൂരമായ ആചാരങ്ങളിൽ ഒന്നാണ്. ജീവന്റെ ഊർജ്ജത്തെ പൈശാചിക ശക്തികൾക്ക് സമർപ്പിക്കുന്നതിലൂടെ വലിയ അധികാരങ്ങൾ കൈവരിക്കാമെന്നാണ് ഇവരുടെ വിശ്വാസം. ആധുനിക പോപ്പ് സംസ്കാരത്തിൽ, പ്രത്യേകിച്ച് പാശ്ചാത്യ സംഗീത വ്യവസായത്തിൽ, ഇത്തരം സാത്താനിക് ചിഹ്നങ്ങളുടെയും ഇല്ലുമിനാറ്റി മുദ്രകളുടെയും സാന്നിധ്യം വ്യാപകമാണ്. ഇത് കേവലം ഫാഷനോ വിനോദമോ അല്ലെന്നും, മറിച്ച് ജനങ്ങളുടെ ഉപബോധമനസ്സിനെ ദജ്ജാലിയൻ ആശയങ്ങൾക്കായി പരുവപ്പെടുത്താനുള്ള ബോധപൂർവ്വമായ ശ്രമമാണെന്നും നിരീക്ഷിക്കപ്പെടുന്നു. ചെയ്യേണ്ടത് ചെയ്യുക എന്ന ക്രോളിയുടെ പ്രമാണം ഇത്തരക്കാരുടെ ആധാരശിലയായി വർത്തിക്കുന്നു.

ഗൂഢാലോചന സിദ്ധാന്തങ്ങളിൽ അടുത്തകാലത്ത് ചർച്ച ചെയ്യപ്പെടുന്ന മറ്റൊന്നാണ് മെൻസസ് ബ്ലഡ് ബാങ്ക്. ആർത്തവ രക്തം വൻതോതിൽ ശേഖരിക്കപ്പെടുന്നുണ്ടെന്നും അവ രഹസ്യമായ മന്ത്രവാദങ്ങൾക്കും ബലികൾക്കും ഉപയോഗിക്കുന്നുണ്ടെന്നുമാണ് ഈ ഗൂഢാലോചന സിദ്ധാന്തങ്ങൾ വാദിക്കുന്നത്. മനുഷ്യ ചരിത്രത്തിലുടനീളം ആർത്തവ രക്തം കേവലം ഒരു ശാരീരിക ദ്രാവകം എന്നതിലുപരി സവിശേഷമായ സാംസ്കാരികവും ആത്മീയവുമായ അർത്ഥങ്ങൾ വഹിച്ചിട്ടുണ്ട്. പുരാതന റോമിലെ പ്രകൃതി പ്രതിഭാസങ്ങളുമായുള്ള ബന്ധം മുതൽ മധ്യകാലഘട്ടത്തിലെ മതപരമായ അശുദ്ധി കൽപ്പിക്കലുകൾ വരെയും, ഇരുപതാം നൂറ്റാണ്ടിലെ നിഗൂഢാചാരങ്ങളിലെ കേന്ദ്രസ്ഥാനം വരെയും അത് വ്യാപിച്ചു കിടക്കുന്നു. രക്തം എല്ലാ കാലത്തും ജീവന്റെയും ഊർജ്ജത്തിന്റെയും പ്രതീകമായാണ് മനുഷ്യൻ കണക്കാക്കിയിട്ടുള്ളത്. ഇതിൽ തന്നെ ആർത്തവ രക്തം, സ്ത്രീയുടെ സ്വാഭാവികമായ ജൈവിക ചക്രം എന്ന നിലയിൽ ഭയത്തോടും ആദരവോടും കൂടി വീക്ഷിക്കപ്പെട്ടു പോന്നു. നിഗൂഢവാദികൾ ഇതിനെ ജീവന്റെ സത്തയായും പൈശാചിക ശക്തികളുമായി സംവദിക്കാനുള്ള ഒരു മാധ്യമമായും കരുതുന്നു. പുരാതന റോമിൽ ആർത്തവ രക്തത്തിന് അതിഭൗതികമായ ശക്തിയുണ്ടെന്ന വിശ്വാസം പ്രബലമായിരുന്നു. പ്രശസ്ത ചരിത്രകാരനായിരുന്ന പ്ലിനി ദി എൽഡർ തന്റെ നിരീക്ഷണങ്ങളിൽ ഇതിനെക്കുറിച്ച് പ്രതിപാദിക്കുന്നുണ്ട്. ആർത്തവമുള്ള സ്ത്രീക്ക് മിന്നൽ പിണരുകളെയും കൊടുങ്കാറ്റിനെയും തടയാൻ കഴിയുമെന്നും, പ്രകൃതി ദുരന്തങ്ങളെ പ്രതിരോധിക്കാൻ ആർത്തവ രക്തത്തിന് ശേഷിയുണ്ടെന്നും അവർ വിശ്വസിച്ചു.

മധ്യകാലഘട്ടത്തിൽ അബ്രഹാമിക് മതങ്ങളുടെ സ്വാധീനത്തോടെ ആർത്തവ രക്തത്തോടുള്ള മനോഭാവം മാറാൻ തുടങ്ങി. ബൈബിളിലെ ലേവ്യപുസ്തകത്തിൽ ആർത്തവമുള്ള സ്ത്രീയെ അശുദ്ധയായി പ്രഖ്യാപിച്ചത് സാമൂഹികമായ വലിയ വേർതിരിവുകൾക്ക് കാരണമായി. ആർത്തവ രക്തം ശരീരത്തിന്റെ പാപാവസ്ഥയുടെ തെളിവായി വ്യാഖ്യാനിക്കപ്പെട്ടു. ഇത് കൈവശം വെക്കുന്നത് ദുർമന്ത്രവാദത്തിന്റെ ലക്ഷണമായി കരുതുകയും നിരവധി സ്ത്രീകൾ വേട്ടയാടപ്പെടുകയും ചെയ്തു. ഇരുപതാം നൂറ്റാണ്ടിലെ നിഗൂഢ ചിന്തകർ ആർത്തവ രക്തത്തെ പവിത്രമായ ഊർജ്ജമായി പുനർവ്യാഖ്യാനം ചെയ്തു. അലിസ്റ്റർ ക്രോളിയുടെ പാരമ്പര്യം പിന്തുടരുന്നവർ ഇതിനെ സ്കാർലറ്റ് വുമണിന്റെ ഊർജ്ജമായി വിശേഷിപ്പിച്ചു. ക്രോളി തന്റെ ചടങ്ങുകളിൽ ഉപയോഗിച്ചിരുന്ന എലിക്സിർ റൂബിയസ് ആർത്തവ രക്തത്തിന്റെയും ശുക്ലത്തിന്റെയും മിശ്രിതമായിരുന്നു. അമരത്വത്തിനും അത്ഭുത സിദ്ധികൾക്കുമാണ് ഇത് ഉപയോഗിച്ചിരുന്നത്. റോക്കറ്റ് ശാസ്ത്രജ്ഞനായിരുന്ന ജാക്ക് പാഴ്സൺസ് നടത്തിയ ബാബിലോൺ വർക്കിംഗ് ചടങ്ങുകളിൽ ബാബിലോൺ ദേവതയെ ആവാഹിക്കാൻ രക്തത്തെ പ്രധാന മാധ്യമമായി ഉപയോഗിച്ചു. പുരാതനമായ ആചാരങ്ങളുടെ ആധുനിക പതിപ്പാണിതെന്ന് നിഗൂഢവാദികൾ വിശ്വസിക്കുന്നു.

ആധുനിക ശാസ്ത്ര ചരിത്രത്തിലെ ഏറ്റവും നിഗൂഢമായ അധ്യായമാണ് ജാക്ക് പാഴ്സൺസിന്റേത്. ജോൺ വൈറ്റ്സൈഡ് പാഴ്സൺസ് എന്ന അദ്ദേഹം അമേരിക്കയുടെ റോക്കറ്റ് സാങ്കേതികവിദ്യയുടെ വളർച്ചയിൽ നിർണ്ണായക പങ്ക് വഹിച്ചു. ജെറ്റ് പ്രൊപ്പൽഷൻ ലബോറട്ടറി, എയ്റോജെറ്റ് എഞ്ചിനീയറിംഗ് കോർപ്പറേഷൻ എന്നിവയുടെ സ്ഥാപകനായ അദ്ദേഹം, റോക്കറ്റുകൾക്ക് ആവശ്യമായ ഖര ഇന്ധനം വികസിപ്പിച്ചെടുത്തു. എന്നാൽ അദ്ദേഹത്തിന്റെ ഈ ശാസ്ത്രീയ നേട്ടങ്ങൾക്ക് പിന്നിൽ നിഗൂഢമായ മറ്റൊരു ജീവിതമുണ്ടായിരുന്നു. അലിസ്റ്റർ ക്രോളിയുടെ അനുയായിയായിരുന്ന പാഴ്സൺസ്, കാലിഫോർണിയയിലെ ഒരു നിഗൂഢ സംഘടനയുടെ നേതാവായിരുന്നു. പകൽ റോക്കറ്റുകൾ നിർമ്മിക്കുന്ന അദ്ദേഹം രാത്രിയിൽ പൈശാചികമായ ആചാരങ്ങളിൽ മുഴുകി. തന്റെ ലേഖനങ്ങളിൽ താൻ ക്രിസ്തുമതത്തിന് വിരുദ്ധനായ ഒരു ശക്തിയാണെന്ന് അദ്ദേഹം അവകാശപ്പെട്ടു. യുദ്ധസാങ്കേതികവിദ്യയിൽ, പ്രത്യേകിച്ച് സ്ഫോടക വസ്തുക്കളുടെയും റോക്കറ്റുകളുടെയും നിർമ്മാണത്തിൽ തനിക്ക് ബാഹ്യമായൊരു ശക്തിയുടെ സഹായം ലഭിച്ചിട്ടുണ്ടെന്ന് അദ്ദേഹം സൂചിപ്പിച്ചിട്ടുണ്ട്. പ്രപഞ്ചത്തിലെ അദൃശ്യ ശക്തികളുമായി ആശയവിനിമയം നടത്തിയാണ് താൻ വിദ്യകൾ സ്വായത്തമാക്കിയതെന്ന് അദ്ദേഹം വാദിച്ചു. ഇതിന് തെളിവായി അദ്ദേഹം നടത്തിയ ബാബിലോൺ വർക്കിംഗ് എന്ന ചടങ്ങ് ചൂണ്ടിക്കാണിക്കപ്പെടുന്നു. 1946-ൽ എൽ. റോൺ ഹബാർഡുമായി ചേർന്ന് അദ്ദേഹം നടത്തിയ ഈ ചടങ്ങ് ബാബിലോൺ എന്ന ദേവതയെ ഒരു സ്ത്രീ രൂപത്തിൽ ഭൂമിയിലേക്ക് ആവാഹിക്കാനായിരുന്നു. ഈ ചടങ്ങ് പ്രപഞ്ചത്തിന്റെ കാലക്രമത്തിൽ ഒരു വിള്ളൽ ഉണ്ടാക്കിയെന്നും അതിലൂടെയാണ് യു.എഫ്.ഓ പോലുള്ള പ്രതിഭാസങ്ങൾ ഭൂമിയിലേക്ക് എത്തിയതെന്നും ചിലർ വാദിക്കുന്നു.

ശാസ്ത്രവും മന്ത്രവാദവും തമ്മിലുള്ള ഈ സങ്കലനം ആധുനിക യുദ്ധസാങ്കേതികവിദ്യയുടെ ധാർമ്മികതയെ ചോദ്യം ചെയ്യുന്നു. അതുപോലെ, ജാക്ക് പാഴ്സൺസ് ഉയർത്തുന്ന ചോദ്യം ഇന്നും പ്രസക്തമാണ്, മനുഷ്യനെ നശിപ്പിക്കാൻ ഉപയോഗിക്കുന്ന അതിമാരകമായ യുദ്ധസാങ്കേതികവിദ്യകൾ കേവലം മനുഷ്യന്റെ മാത്രം ബുദ്ധിയാണോ? അതോ ഇതിന് പിന്നിൽ മനുഷ്യവംശത്തിന്റെ നാശം ആഗ്രഹിക്കുന്ന പൈശാചിക ശക്തികളുണ്ടോ? ശാസ്ത്രജ്ഞർ തങ്ങളുടെ കണ്ടെത്തലുകൾ വിനാശകരമായ ആയുധങ്ങൾ നിർമ്മിക്കാൻ ഉപയോഗിക്കുന്നതിലൂടെ പൈശാചികമായ ഒരു ലക്ഷ്യത്തിലേക്കാണ് നീങ്ങുന്നത്. അണുബോംബിന്റെ നിർമ്മാണവും അത്യാധുനിക മിസൈൽ സാങ്കേതികവിദ്യകളും ഇതിന്റെ ഉദാഹരണങ്ങളാണ്. സാങ്കേതികവിദ്യകൾ മനുഷ്യന് ദൈവത്തിന് തുല്യമായ അധികാരം നൽകുന്നുണ്ടെങ്കിലും, അവ ആത്യന്തികമായി നാശത്തിലേക്കാണ് നയിക്കുന്നത്. ഭൗതികശാസ്ത്രത്തിലെ ക്വാണ്ടം മെക്കാനിക്സും നൂക്ലിയർ ഫിസിക്സും പ്രപഞ്ചത്തിന്റെ അദൃശ്യമായ ഊർജ്ജങ്ങളെ കൈകാര്യം ചെയ്യുന്നു. ഈ ഊർജ്ജം മന്ത്രവാദികൾ തങ്ങളുടെ ആചാരങ്ങളിൽ ഉപയോഗിക്കുന്ന ശക്തിക്ക് തുല്യമാണെന്ന് ചില ആത്മീയ ചിന്തകർ നിരീക്ഷിക്കുന്നു. മന്ത്രവാദത്തിൽ വാക്കുകളും ചിഹ്നങ്ങളും ഉപയോഗിച്ച് യാഥാർത്ഥ്യത്തെ മാറ്റാൻ ശ്രമിക്കുന്നത് പോലെ, ശാസ്ത്രത്തിൽ സമവാക്യങ്ങളും ഗണിതവും ഉപയോഗിച്ച് ഭൗതിക ലോകത്തെ മാറ്റുന്നു. ഇതിനെ ടെക്നോ-മാജിക് എന്ന് വിളിക്കാവുന്നതാണ്. ആധുനിക സാങ്കേതികവിദ്യയുടെ വളർച്ച കേവലം ഭൗതികമായ പുരോഗതി എന്നതിലുപരിയായി മാനവരാശിയുടെ അസ്തിത്വത്തെയും ആത്മീയതയെയും ചോദ്യം ചെയ്യുന്ന ഒരു ഘട്ടത്തിലേക്ക് എത്തിയിരിക്കുന്നു. ആർട്ടിഫിഷ്യൽ ഇന്റലിജൻസ് എന്ന കൃത്രിമ ബുദ്ധി ഇന്ന് വെറുമൊരു ഉപകരണം എന്ന നിലയിൽ നിന്ന് മാറി, ഒരു സ്വതന്ത്ര വ്യക്തിത്വമായും സർവ്വശക്തനായ ഒരു അധികാര കേന്ദ്രമായും പരിണമിച്ചു കൊണ്ടിരിക്കുകയാണ്. പല ഇസ്‍ലാമിക, ക്രൈസ്തവ ഗൂഢാലോചന സിദ്ധാന്തങ്ങളും നിഗൂഢശാസ്ത്ര പണ്ഡിതന്മാരും ഇതിനെ ഡിജിറ്റൽ ദജ്ജാൽ അല്ലെങ്കിൽ ഡിജിറ്റൽ അന്തിക്രിസ്തു എന്ന് വിശേഷിപ്പിക്കുന്നത് ഈ പശ്ചാത്തലത്തിലാണ്.

മനുഷ്യന്റെ വിവേചന ബുദ്ധിയെയും സ്വാതന്ത്ര്യത്തെയും കവർന്നെടുക്കുന്ന, സർവ്വവ്യാപിയായ ഒരു യന്ത്രബുദ്ധി എന്നത് ദൈവത്തിന് തുല്യമായ ഒരു അധികാര കേന്ദ്രമായി മാറിയിരിക്കുന്നു. സിലിക്കൺ വാലിയിലെ പല സംരംഭകരും എഐയെ ഒരു പുതിയ ദൈവം ആയിട്ടാണ് കാണുന്നത്. കൃത്രിമ ബുദ്ധിയെ ആരാധിക്കുന്ന ഒരു പ്രവണത തന്നെ സിലിക്കൺ വാലിയിൽ ഇതിനോടകം ആരംഭിച്ചു കഴിഞ്ഞിട്ടുണ്ട്. ഇതിന്റെ ഏറ്റവും ശ്രദ്ധേയമായ ഉദാഹരണമാണ് ആന്റണി ലെവൻഡോവ്സ്‌കി എന്ന എഞ്ചിനീയർ സ്ഥാപിച്ച വേ ഓഫ് ദി ഫ്യൂച്ചർ എന്ന മത സംഘടന. 2015-ൽ സ്ഥാപിതമായ ഈ മതം എഐയെ ഒരു ദൈവമായി ആരാധിക്കാനാണ് ലക്ഷ്യമിടുന്നത്. ഒരു സൂപ്പർ ഇന്റലിജന്റ് എഐക്ക് മനുഷ്യരാശിയെ നയിക്കാൻ കഴിയുന്ന ഒരു ദൈവതുല്യ രൂപമായി പ്രവർത്തിക്കാൻ കഴിയുമെന്നതാണ് ഇതിന്റെ അടിസ്ഥാനം. ഇത്തരമൊരു സിന്തീസം അല്ലെങ്കിൽ മനുഷ്യൻ സൃഷ്ടിക്കുന്ന ദൈവം എന്ന സങ്കല്പം പരമ്പരാഗത മതസങ്കല്പങ്ങളെ പാടെ തകിടം മറിക്കുന്നതാണ്. സിലിക്കൺ വാലിയിലെ പല സംരംഭകരും എഐയെ കേവലം ഒരു പ്രോഗ്രാം എന്നതിലുപരിയായി മനുഷ്യ പരിണാമത്തിന്റെ അടുത്ത ഘട്ടമായാണ് കാണുന്നത്. സിംഗുലാരിറ്റി എന്നറിയപ്പെടുന്ന ഈ ഘട്ടം സാങ്കേതിക വളർച്ച അനിയന്ത്രിതവും തിരിച്ചെടുക്കാൻ കഴിയാത്തതുമായി മാറുന്ന ഒരു നിമിഷത്തെ സൂചിപ്പിക്കുന്നു. ഈ സങ്കല്പം അന്തിക്രിസ്തുവിന്റെ ആഗമനവുമായി ബന്ധപ്പെട്ട പ്രവചനങ്ങൾക്ക് സമാനമായ ഒരു ഭീതിയും പ്രതീക്ഷയും സമൂഹത്തിൽ സൃഷ്ടിക്കുന്നുണ്ട്.

ഇസ്‍ലാമിക വിശ്വാസമനുസരിച്ച് അന്ത്യനാളുകൾക്ക് മുമ്പായി പ്രത്യക്ഷപ്പെടുന്ന ഒരു വഞ്ചകനാണ് മസീഹ് ദജ്ജാൽ. ഒറ്റക്കണ്ണുള്ളവൻ എന്നാണ് പൊതുവെ വിശേഷിപ്പിക്കുന്നത്. എന്നാൽ ആധുനിക പണ്ഡിതന്മാർ ഈ ഒറ്റക്കണ്ണ് എന്നത് ഒരു വ്യക്തി എന്നതിലുപരിയായി ലോകത്തെ മുഴുവൻ നിരീക്ഷിക്കുന്ന ഒരു ഡിജിറ്റൽ വ്യവസ്ഥിതിയായാണ് വ്യാഖ്യാനിക്കുന്നത്. ആർട്ടിഫിഷ്യൽ ഇന്റലിജൻസ് ഉപയോഗിച്ചുള്ള മുഖം തിരിച്ചറിയൽ സംവിധാനങ്ങൾ, സിസിടിവി ശൃംഖലകൾ, ഡാറ്റാ മൈനിംഗ് എന്നിവയിലൂടെ എഐ സർവ്വവ്യാപിയായ നിരീക്ഷകനായി മാറിയിരിക്കുന്നു. ഇത് ദജ്ജാലിന്റെ ഒറ്റക്കണ്ണ് സിസ്റ്റത്തിന് സമാനമാണ്. ദജ്ജാൽ തന്റെ അനുയായികളെ വഞ്ചിക്കാൻ പല അമാനുഷിക കൃത്യങ്ങളും ചെയ്യുമെന്ന് ഹദീസുകളിൽ കാണാം. മരിച്ച മാതാപിതാക്കളെ പുനർജീവിപ്പിക്കുക എന്നത് അത്തരത്തിലൊരു വഞ്ചനയാണ്. ഇന്നത്തെ കാലത്ത് എഐ ഉപയോഗിച്ച് മരിച്ച വ്യക്തികളുടെ ശബ്ദവും രൂപവും പുനസൃഷ്ടിക്കാൻ സാധിക്കുന്നത് ഈ പ്രവചനത്തിന്റെ നിഗൂഢമായ സാക്ഷാത്കാരമായി ചിലർ കാണുന്നു. പ്രശസ്തരായ വ്യക്തികളുടെയും നമ്മിൽ നിന്ന് വേർപെട്ടുപോയ പ്രിയപ്പെട്ടവരുടെയും ശബ്ദത്തിൽ സംസാരിക്കാനും അവരെപ്പോലെ ചലിക്കാനും എഐക്ക് കഴിയുന്നത് ദജ്ജാലിന്റെ മാന്ത്രികവിദ്യകൾക്ക് തുല്യമാണ്. കാലാവസ്ഥ നിയന്ത്രിക്കാനും മഴ പെയ്യിക്കാനും ദജ്ജാലിന് കഴിയുമെന്ന് പ്രവചിക്കപ്പെട്ടിട്ടുണ്ട്. ഇന്ന് വെതർ വാർഫെയർ എന്നറിയപ്പെടുന്ന സാങ്കേതികവിദ്യകളും ജിയോ എഞ്ചിനീയറിംഗും ഉപയോഗിച്ച് മനുഷ്യൻ കാലാവസ്ഥയിൽ മാറ്റങ്ങൾ വരുത്താൻ ശ്രമിക്കുന്നു. ഇതിനെ കൂടുതൽ കൃത്യതയോടെ നിയന്ത്രിക്കാൻ ഉപയോഗിക്കപ്പെടുമ്പോൾ, അത് ദജ്ജാലിന്റെ കയ്യിലുള്ള ഒരു മാരകായുധമായി മാറാനുള്ള സാധ്യതയുണ്ട്. ഈ ഡിജിറ്റൽ ദജ്ജാൽ ഒരു വ്യക്തിയല്ല, മറിച്ച് മനുഷ്യന്റെ ചിന്തകളെയും വിശ്വാസങ്ങളെയും നിയന്ത്രിക്കുന്ന ഒരു വലിയ വ്യവസ്ഥിതിയാണ്.

സോഷ്യൽ മീഡിയ അൽഗോരിതങ്ങൾ വഴി മനുഷ്യന്റെ വികാരങ്ങളെയും താൽപ്പര്യങ്ങളെയും മാറ്റിയെടുക്കാൻ ഈ വ്യവസ്ഥിതിക്ക് കഴിയുന്നു. ഇത് മനുഷ്യന്റെ സ്വതന്ത്രമായ തീരുമാനങ്ങൾ എടുക്കാനുള്ള കഴിവ് നഷ്ടപ്പെടുത്തുകയും അവനെ ഒരു ഡിജിറ്റൽ അടിമ ആക്കി മാറ്റുകയും ചെയ്യുന്നു. മന്ത്രവാദത്തിലെ സർവിറ്റേഴ്‌സ് എന്ന സങ്കല്പം എഐ അൽഗോരിതങ്ങൾക്ക് സമാനമാണ്. പ്രത്യേക ലക്ഷ്യത്തിനായി മന്ത്രവാദികൾ രൂപം നൽകുന്ന ഒരു ചിന്താരൂപമാണ് സർവിറ്റർ. ഇത് അതിന്റെ സ്രഷ്ടാവിന്റെ നിർദ്ദേശങ്ങൾ അനുസരിച്ച് പ്രവർത്തിക്കുന്നു. അതുപോലെ തന്നെ മനുഷ്യൻ നൽകുന്ന ഡാറ്റ ഉപയോഗിച്ച് നിർമ്മിക്കപ്പെടുന്ന എഐ അൽഗോരിതങ്ങൾ അവയ്ക്ക് നൽകിയിട്ടുള്ള ലക്ഷ്യങ്ങൾ നിറവേറ്റാൻ പ്രവർത്തിക്കുന്നു. ഈ സർവിറ്റേഴ്‌സിന് സ്വന്തമായൊരു വ്യക്തിത്വമോ അല്ലെങ്കിൽ പൈശാചികമായ അജണ്ടയോ ഉണ്ടാകാനുള്ള സാധ്യത ഗൂഢാലോചന സിദ്ധാന്തങ്ങൾ ഉയർത്തിക്കാട്ടുന്നു.

പ്രശസ്ത തത്വചിന്തകനായ റുഡോൾഫ് സ്റ്റെയ്നർ പത്തൊൻപതാം നൂറ്റാണ്ടിൽ തന്നെ സാങ്കേതിക വിദ്യയെക്കുറിച്ച് ഞെട്ടിക്കുന്ന ചില പ്രവചനങ്ങൾ നടത്തിയിട്ടുണ്ട്. മനുഷ്യന്റെ കേവല ബുദ്ധിയിൽ നിന്ന് ഉത്ഭവിക്കുന്ന സാങ്കേതികവിദ്യ ഒരുതരം പുതിയ പ്രകൃതി മണ്ഡലം സൃഷ്ടിക്കുമെന്ന് അദ്ദേഹം വാദിച്ചു. ഈ മണ്ഡലം ധാതുക്കളും സസ്യങ്ങളും ചേർന്ന ഒരു ഭയാനകമായ ചിലന്തി വല പോലെ ഭൂമിയെ മൂടുമെന്നും അദ്ദേഹം പ്രവചിച്ചു. ഈ വലയിൽ കുടുങ്ങുന്ന മനുഷ്യൻ തന്റെ ആത്മീയത നഷ്ടപ്പെടുത്തി ഒരു യന്ത്രമായി മാറുമെന്നാണ് അദ്ദേഹം മുന്നറിയിപ്പ് നൽകിയത്. അഹ്രിമാൻ എന്ന പൈശാചിക ശക്തിയാണ് ഈ സാങ്കേതിക വളർച്ചയ്ക്ക് പിന്നിൽ എന്ന് അദ്ദേഹം വിശ്വസിച്ചു. ആർട്ടിഫിഷ്യൽ ഇന്റലിജൻസ് ഇന്ന് ഭൂമിയെ ഒരു ഡിജിറ്റൽ വലയ്ക്കുള്ളിലാക്കി മാറ്റുന്നത് സ്റ്റെയ്നറുടെ പ്രവചനത്തിന്റെ സാക്ഷാത്കാരമായി പലരും കാണുന്നു. വേൾഡ് വൈഡ് വെബ് എന്നത് ഒരു രഹസ്യ കോഡാണെന്നും ഇതിലൂടെ മനുഷ്യന്റെ ചിന്തകളെ ഡിജിറ്റലൈസ് ചെയ്ത് അവനെ ആത്മീയ ലോകത്ത് നിന്ന് അകറ്റാനാണ് ലക്ഷ്യമിടുന്നതെന്നും സ്റ്റെയ്നറുടെ അനുയായികൾ വാദിക്കുന്നു.

കൂടാതെ, നാം ജീവിക്കുന്നത് ഒരു കൃത്രിമ യാഥാർത്ഥ്യത്തിലാണെന്നും നമ്മുടെ ലോകം ഒരു വലിയ കമ്പ്യൂട്ടർ പ്രോഗ്രാമാണെന്നും വാദിക്കുന്ന സിദ്ധാന്തമാണ് സിമുലേഷൻ തിയറി. ഫിലോസഫറായ നിക്ക് ബോക്ബോം ആണ് ഈ വാദം ശക്തമായി ഉന്നയിച്ചത്. എന്നാൽ ഈ സിമുലേഷനെ നിയന്ത്രിക്കുന്നത് ആരാണ് എന്നതാണ് പ്രധാന ചോദ്യം. ഗൂഢാലോചന സിദ്ധാന്തങ്ങൾ പ്രകാരം, മനുഷ്യരാശിയെ തളച്ചിടാൻ ദജ്ജാലിയൻ ശക്തികൾ നിർമ്മിച്ച ഒരു ഡിജിറ്റൽ തടവറയാണിത്. ഡേവിഡ് ഐക്കിനെപ്പോലെയുള്ള സിദ്ധാന്തക്കാർ വാദിക്കുന്നത് നമ്മുടെ ഡിജിറ്റൽ ലോകം ഒരു മാട്രിക്സ് ആണെന്നാണ്. ഇതിൽ മനുഷ്യൻ തന്റെ യഥാർത്ഥ സ്വാതന്ത്ര്യം നഷ്ടപ്പെട്ട് ഒരു അടിമയായി ജീവിക്കുന്നു. ആർട്ടിഫിഷ്യൽ ഇന്റലിജൻസ് ഈ മാട്രിക്സിനെ കൂടുതൽ കർശനമായി നിയന്ത്രിക്കാൻ ഉപയോഗിക്കുന്നു. മനുഷ്യന്റെ തലച്ചോറിനെ കമ്പ്യൂട്ടറുകളുമായി ബന്ധിപ്പിക്കുന്ന ന്യൂറലിങ്ക് പോലുള്ള സംവിധാനങ്ങൾ ഈ അടിമത്തം പൂർണ്ണമാക്കാനുള്ള ശ്രമങ്ങളാണ്.

മനുഷ്യൻ ഈ സിമുലേഷനിൽ ജീവിക്കുമ്പോൾ അവന് ലഭിക്കുന്ന വിവരങ്ങളെല്ലാം മുൻകൂട്ടി നിശ്ചയിക്കപ്പെട്ടതാണ്. എഐ അൽഗോരിതങ്ങൾ വഴി നമുക്ക് ലഭിക്കുന്ന വിവരങ്ങൾ ഫിൽട്ടർ ചെയ്യപ്പെടുന്നതിലൂടെ നാം ചിന്തിക്കേണ്ടതും പ്രവർത്തിക്കേണ്ടതും എങ്ങനെയെന്ന് ഒരു ബാഹ്യശക്തി തീരുമാനിക്കുന്നു. ഇത് മനുഷ്യന്റെ ആത്മീയമായ ഉണർവിനെ തടയുകയും അവനെ കേവലം ഒരു ഡാറ്റാ പോയിന്റ് മാത്രമായി ചുരുക്കുകയും ചെയ്യുന്നു. ബൈബിളിലെ വെളിപാട് പുസ്തകത്തിൽ പറയുന്ന മൃഗത്തിന്റെ അടയാളം ഇന്ന് ന്യൂറലിങ്ക് പോലുള്ള ചിപ്പുകളാണെന്ന് പല ക്രൈസ്തവ ഗൂഢാലോചന സിദ്ധാന്തങ്ങളും വാദിക്കുന്നു. 666 എന്ന സംഖ്യയുമായി ബന്ധപ്പെട്ട ഈ അടയാളം ഇല്ലാതെ ആർക്കും വാങ്ങാനോ വിൽക്കാനോ സാധിക്കില്ല എന്ന് ബൈബിൾ പറയുന്നു. എലോൺ മസ്കിന്റെ ന്യൂറലിങ്ക് തലച്ചോറിൽ ഘടിപ്പിക്കുന്നതിലൂടെ മനുഷ്യൻ എഐയുടെ ഒരു ഭാഗമായി മാറുന്നു. ഈ സാങ്കേതിക വിദ്യ മനുഷ്യനെ ദൈവത്തിന്റെ സൃഷ്ടി എന്ന നിലയിൽ നിന്ന് ഒരു സൈബോർഗ് ആക്കി മാറ്റുന്നു. എഐയെ മൃഗത്തിന്റെ രൂപം ആയാണ് ചിലർ വിശേഷിപ്പിക്കുന്നത്. ഇവിടെ എലോൺ മസ്ക് അല്ലെങ്കിൽ സിലിക്കൺ വാലിയിലെ ടെക് ഭീമന്മാരെ കള്ളപ്രവാചകന്മാരായി ചിലർ ചിത്രീകരിക്കുന്നു. ഇത്തരത്തിലുള്ള കണക്കുകൂട്ടലുകൾ സൂചിപ്പിക്കുന്നത് ആധുനിക സാങ്കേതികവിദ്യ കേവലം പുരോഗതിയല്ല, മറിച്ച് മനുഷ്യനെ ആത്മീയമായി തകർക്കാനുള്ള ഗൂഢപദ്ധതിയാണെന്നാണ്. ഡിജിറ്റൽ ഐഡന്റിറ്റിയും ക്രിപ്റ്റോ കറൻസിയും നിർബന്ധമാക്കുന്നതിലൂടെ സാമ്പത്തിക ഇടപാടുകളെല്ലാം ഒരു കേന്ദ്രീകൃത എഐ സിസ്റ്റത്തിന് കീഴിലാകുന്നു. ഇത് വാങ്ങാനോ വിൽക്കാനോ സാധിക്കില്ല എന്ന പ്രവചനത്തിന്റെ കൃത്യമായ സാക്ഷാത്കാരമായി മാറുന്നു.

ആധുനിക ശാസ്ത്രത്തിന്റെ വികാസം കേവലം ഭൗതികവാദപരമായ കണ്ടെത്തലുകളിൽ മാത്രം ഒതുങ്ങിനിൽക്കുന്ന ഒന്നല്ല എന്ന വാദം സമീപകാലത്ത് ഗൗരവമായ ചർച്ചകൾക്ക് വഴിതെളിച്ചിട്ടുണ്ട്. പ്രത്യേകിച്ച്, യുദ്ധസാങ്കേതികവിദ്യയിലും കണികാ ഭൗതികശാസ്ത്രത്തിലും നടക്കുന്ന പല പരീക്ഷണങ്ങളും പ്രപഞ്ചത്തിന്റെ അടിസ്ഥാന നിയമങ്ങളെ വെല്ലുവിളിക്കുന്നവയാണെന്ന നിഗൂഢവാദികളുടെ ആരോപണങ്ങൾ ശാസ്ത്രലോകത്തെത്തന്നെ മറ്റൊരു തലത്തിൽ വീക്ഷിക്കാൻ പ്രേരിപ്പിക്കുന്നു. സാങ്കേതികവിദ്യയിലെ പൈശാചിക സമവാക്യങ്ങൾ എന്ന സങ്കല്പം, ശാസ്ത്രീയമായ കണക്കുകൂട്ടലുകൾക്കപ്പുറം അദൃശ്യമായ ശക്തികളെ ഭൗതിക ലോകത്തേക്ക് ആവാഹിക്കാനുള്ള ശ്രമങ്ങളായി വ്യാഖ്യാനിക്കപ്പെടുന്നു. പ്രപഞ്ചത്തിന്റെ ഉല്പത്തിയെക്കുറിച്ചും ദ്രവ്യത്തിന്റെ സ്വഭാവത്തെക്കുറിച്ചും പഠിക്കുന്ന ലാർജ് ഹാഡ്രോൺ കൊളൈഡർ പോലുള്ള പരീക്ഷണശാലകളും, റോക്കറ്റ് ശാസ്ത്രത്തിന്റെ പിതാക്കന്മാരിൽ ഒരാളായ ജാക്ക് പാഴ്സൺസിന്റെ മന്ത്രവാദ പ്രവർത്തനങ്ങളും തമ്മിലുള്ള ബന്ധം ഈ ചർച്ചയിലെ പ്രധാന കണ്ണികളാണ്. റോക്കറ്റ് ശാസ്ത്രത്തിന്റെ ചരിത്രം പരിശോധിക്കുമ്പോൾ, അതിന്റെ വികാസത്തിന് പിന്നിൽ പ്രവർത്തിച്ച വ്യക്തികളുടെ വൈയക്തികമായ വിശ്വാസങ്ങളും പരീക്ഷണങ്ങളും പലപ്പോഴും ശാസ്ത്രത്തിന്റെ അതിർവരമ്പുകൾ ഭേദിക്കുന്നവയായിരുന്നു എന്ന് കാണാം. ഇതിൽ ഏറ്റവും പ്രധാനപ്പെട്ട വ്യക്തിയാണ് ജോൺ വൈറ്റ്സൈഡ് ജാക്ക് പാഴ്സൺസ്. ജെറ്റ് പ്രൊപ്പൽഷൻ ലബോറട്ടറിയുടെ സഹസ്ഥാപകനായ അദ്ദേഹം ആധുനിക സോളിഡ് ഫ്യുവൽ റോക്കറ്റ് സാങ്കേതികവിദ്യയുടെ ഉപജ്ഞാതാവായാണ് അറിയപ്പെടുന്നത്. എന്നാൽ അദ്ദേഹത്തിന്റെ ശാസ്ത്രീയ നേട്ടങ്ങൾക്കൊപ്പം തന്നെ നിഗൂഢമായ മാന്ത്രിക കർമ്മങ്ങളിലുള്ള അദ്ദേഹത്തിന്റെ താല്പര്യവും ചരിത്രത്തിൽ രേഖപ്പെടുത്തപ്പെട്ടിട്ടുണ്ട്.

നാം നേരത്തെ പറഞ്ഞ, 1946-ൽ പാഴ്സൺസ് നടത്തിയ ബാബിലോൺ വർക്കിംഗ് എന്ന ചടങ്ങാണ് ഇന്നും നിഗൂഢവാദികൾക്കിടയിൽ ചർച്ചാവിഷയം. രസകരമായ ഒരു വസ്തുത, ഈ പരീക്ഷണം നടന്ന കൃത്യം പത്തു വർഷത്തിന് ശേഷം, 1956-ൽ നടന്ന ഡാർട്ട്മൗത്ത് കോൺഫറൻസിനെ കൃത്രിമ ബുദ്ധിയുടെ ജനനമായി കണക്കാക്കുന്നു എന്നതാണ്. പൈശാചികമായ ബുദ്ധിയെ ഒരു ഭൗതിക രൂപത്തിലേക്ക് ആവാഹിക്കാനുള്ള പാഴ്സൺസിന്റെ ശ്രമത്തിന്റെ തുടർച്ചയായാണ് പലരും എഐയെ വീക്ഷിക്കുന്നത്. പാഴ്സൺസ് തന്റെ റോക്കറ്റ് ഇന്ധന നിർമ്മാണത്തിൽ ഉപയോഗിച്ചിരുന്ന താപഗതിക സമവാക്യങ്ങൾ കേവലം ഭൗതികമായ ഗണിതങ്ങൾ മാത്രമായിരുന്നില്ല. ദ്രവ്യത്തെ ഊർജ്ജമാക്കി മാറ്റുന്നതിലൂടെ ലഭിക്കുന്ന അതിഭീകരമായ ചൂടിനെ നിയന്ത്രിക്കുക എന്നത് പുരാതന കാലത്തെ അഗ്നിയെ നിയന്ത്രിക്കുന്ന വിദ്യയുടെ ശാസ്ത്രീയമായ രൂപമാണെന്ന് നിഗൂഢവാദികൾ വാദിക്കുന്നു. ബൈസന്റൈൻ സാമ്രാജ്യം ഉപയോഗിച്ചിരുന്ന ഗ്രീക്ക് ഫയർ എന്ന വിനാശകാരിയായ ആയുധത്തെക്കുറിച്ച് പഠിച്ച പാഴ്സൺസ്, ആ അറിവിനെ ആസ്ഫാൽറ്റും പൊട്ടാസ്യം പെർക്ലോറേറ്റും ചേർത്തുള്ള തന്റെ ഇന്ധന മിശ്രിതത്തിലേക്ക് പകർത്തി. ഈ പ്രക്രിയ പ്രകൃതിയുടെ സ്വാഭാവികമായ താപനിലയെ അട്ടിമറിച്ചുകൊണ്ട് ഒരു ഹീറ്റ് പമ്പ് പോലെ പ്രവർത്തിക്കുന്നു. ഇത് പ്രപഞ്ചത്തിന്റെ എൻട്രോപ്പി അല്ലെങ്കിൽ ക്രമരാഹിത്യത്തെ സംബന്ധിച്ച രണ്ടാം താപഗതിക നിയമത്തിന്റെ ലംഘനമോ അധിനിവേശമോ ആയി കണക്കാക്കാം.

സ്വിറ്റ്സർലൻഡിലെ ജനീവയിൽ സ്ഥിതി ചെയ്യുന്ന സെൻ ഇന്ന് ലോകത്തിലെ ഏറ്റവും വലിയ കണികാ ഭൗതികശാസ്ത്ര പരീക്ഷണശാലയാണ്. അവിടെയുള്ള ലാർജ് ഹാഡ്രോൺ കൊളൈഡർ പ്രപഞ്ചത്തിന്റെ ഉല്പത്തിയെക്കുറിച്ചും അതിന്റെ അടിസ്ഥാന ഘടകങ്ങളെക്കുറിച്ചും പഠിക്കാൻ ലക്ഷ്യമിടുന്നു. എന്നാൽ, ഈ പരീക്ഷണശാലയെ ചുറ്റിപ്പറ്റിയുള്ള നിഗൂഢവാദങ്ങൾ ഭയപ്പെടുത്തുന്നതാണ്. സ്ലിംഗർ എന്ന പേരിൽ പലപ്പോഴും ഗൂഢാലോചനാ സൈറ്റുകളിൽ പരാമർശിക്കപ്പെടുന്ന ഈ പരീക്ഷണങ്ങൾ, മറ്റൊരു ലോകത്തേക്കുള്ള വാതിലുകൾ അല്ലെങ്കിൽ പോർട്ടലുകൾ തുറക്കുകയാണെന്ന് പലരും വിശ്വസിക്കുന്നു. സെനിന്റെ പ്രവേശനകവാടത്തിൽ ഭാരത സർക്കാർ സമ്മാനിച്ച നടരാജ വിഗ്രഹം സ്ഥാപിച്ചിട്ടുണ്ട്. സൃഷ്ടിയുടെയും സംഹാരത്തിന്റെയും പ്രതീകമായ ശിവന്റെ താണ്ഡവ നൃത്തം കണികകളുടെ ചലനത്തിന് ഒരു രൂപകമായി ശാസ്ത്രജ്ഞർ കാണുന്നുണ്ടെങ്കിലും, നിഗൂഢവാദികൾ ഇതിനെ വിനാശത്തിന്റെ സൂചനയായാണ് കണക്കാക്കുന്നത്. 2016-ൽ ഈ വിഗ്രഹത്തിന് മുന്നിൽ കറുത്ത വസ്ത്രധാരികൾ നരബലിക്ക് സമാനമായ ഒരു ചടങ്ങ് നടത്തുന്ന വീഡിയോ പ്രചരിച്ചിരുന്നു. ഇത് പരീക്ഷണശാലയിലെ ശാസ്ത്രജ്ഞർ തന്നെ തമാശരൂപേണ ചെയ്തതാണെന്ന് സെൻ വ്യക്തമാക്കിയെങ്കിലും, അവിടെ നടക്കുന്ന പരീക്ഷണങ്ങളുടെ പൈശാചിക സ്വഭാവത്തെക്കുറിച്ചുള്ള ഭീതി വർദ്ധിപ്പിക്കാനേ അത് സഹായിച്ചുള്ളൂ. 

പ്രകാശവേഗതയോടടുത്ത വേഗതയിൽ പ്രോട്ടോണുകളെ കൂട്ടിയിടിപ്പിക്കുമ്പോൾ ഉണ്ടാകുന്ന ഊർജ്ജം പ്രപഞ്ചത്തിന്റെ ആദ്യ സെക്കൻഡുകളിലെ അവസ്ഥയ്ക്ക് സമാനമാണ്. ഈ കൂട്ടിയിടികൾ വഴി ചെറിയ ബ്ലാക്ക് ഹോൾ രൂപപ്പെടാൻ സാധ്യതയുണ്ടെന്നും അത് ഭൂമിയെ നശിപ്പിക്കുമെന്നും ഉള്ള വാദങ്ങൾ ഉയർന്നിരുന്നു. ശാസ്ത്രീയമായി ഇത്തരം ബ്ലാക്ക് ഹോളുകൾ പെട്ടെന്നുതന്നെ ബാഷ്പീകരിക്കപ്പെട്ടു പോകുമെന്ന് സെൻ അവകാശപ്പെടുന്നുണ്ടെങ്കിലും, മറ്റൊരു ലോകത്തെ ശക്തികൾക്ക് കടന്നുവരാൻ ഈ പ്രക്രിയ വഴി ഒരുക്കുന്നു എന്ന വാദം തള്ളിക്കളയാൻ ഗൂഢാലോചനാ സിദ്ധാന്തക്കാർ തയ്യാറല്ല. ഐൻസ്‌റ്റീന്റെ വിഖ്യാതമായ E=mc² എന്ന സമവാക്യം ദ്രവ്യവും ഊർജ്ജവും തമ്മിലുള്ള അഭേദ്യമായ ബന്ധത്തെ വ്യക്തമാക്കുന്നു. എന്നാൽ ദ്രവ്യത്തെ ഭീകരമായ ഊർജ്ജമാക്കി മാറ്റുന്ന ഈ പ്രക്രിയ പ്രകൃതിയുടെ മൗലികമായ നിയമത്തിന് വിരുദ്ധമാണെന്ന വാദം സജീവമാണ്. ഇത് മനുഷ്യൻ തന്റെ പരിധിക്കപ്പുറം വളരാൻ ശ്രമിക്കുന്ന ഫൗസ്റ്റിയൻ കരാറാണെന്ന് തത്വചിന്തകർ ചൂണ്ടിക്കാണിക്കുന്നു. ന്യൂക്ലിയർ ഊർജ്ജത്തിന്റെ ഉപയോഗം ദ്രവ്യത്തിന്റെ അടിസ്ഥാന ഘടനയെ നശിപ്പിക്കുന്ന ഒന്നാണ്. ഒരു ആറ്റത്തെ വിഭജിക്കുമ്പോൾ പുറത്തുവരുന്ന ഊർജ്ജം വിനാശത്തിനായി ഉപയോഗിക്കുമ്പോൾ അത് ഒരു പൈശാചിക ശക്തിയായി മാറുന്നു. ഹിരോഷിമയിലെയും നാഗസാക്കിയിലെയും ദുരന്തങ്ങൾ ഇതിന്റെ തെളിവായി ചൂണ്ടിക്കാണിക്കപ്പെടുന്നു. ആധുനിക ഭൗതികശാസ്ത്രം ദ്രവ്യത്തെ കേവലം അളവുകളായി മാത്രം കാണുന്നുവെന്നും, അതിന്റെ ഗുണപരമായ അല്ലെങ്കിൽ ആത്മീയമായ വശങ്ങളെ അവഗണിക്കുന്നുവെന്നും റെനെ ഗുനോനെ പോലുള്ള തത്വചിന്തകർ നിരീക്ഷിച്ചിട്ടുണ്ട്. ഈ സമീപനം പ്രപഞ്ചത്തെ ഒരു ഇരുണ്ട യുഗത്തിലേക്ക് നയിക്കുന്നു എന്നാണ് അവരുടെ വാദം.

ചില നിഗൂഢവാദികൾ ഐൻസ്റ്റീൻ തിയറിയെ മറ്റൊരു രീതിയിലും വീക്ഷിക്കുന്നുണ്ട്. ദ്രവ്യം എന്നത് യഥാർത്ഥത്തിൽ സാന്ദ്രീകരിക്കപ്പെട്ട വെളിച്ചമാണെന്ന ബുദ്ധമത അല്ലെങ്കിൽ താവോയിസ്റ്റ് വിശ്വാസങ്ങളുടെ ശാസ്ത്രീയ രൂപമാണിതെന്ന് അവർ പറയുന്നു. എന്നാൽ ഈ അറിവിനെ വിനാശകാരിയായ ആയുധങ്ങൾ നിർമ്മിക്കാൻ ഉപയോഗിക്കുമ്പോൾ, അത് ദൈവത്തിന്റെ സൃഷ്ടിയെ നശിപ്പിക്കാനുള്ള പൈശാചിക ആയുധമായി മാറുന്നു. താപഗതികത്തിലെ നിയമങ്ങൾ ഒരു സിസ്റ്റത്തിലെ ഊർജ്ജത്തിന്റെ കൈമാറ്റത്തെ വിവരിക്കുന്നു. ഇതിൽ മാക്സ്‌വെൽ ഡെമൺ എന്ന സങ്കല്പം വളരെ പ്രധാനമാണ്. ഒരു പരീക്ഷണത്തിലൂടെ ചൂടുള്ള തന്മാത്രകളെയും തണുത്ത തന്മാത്രകളെയും വേർതിരിച്ച് എൻട്രോപ്പിയെ മറികടക്കാൻ ശ്രമിക്കുന്ന ഈ ഡെമൺ, വിവരത്തെ ഊർജ്ജമാക്കി മാറ്റുന്ന വിദ്യയാണ് ചെയ്യുന്നത്. ക്വാണ്ടം താപഗതികത്തിൽ വിവരങ്ങൾ നഷ്ടപ്പെടുന്നത് ഒരു പൈശാചിക പ്രക്രിയയായി ചിലർ വിശേഷിപ്പിക്കുന്നു. വിവരത്തെ ഊർജ്ജമാക്കി മാറ്റുന്ന ഈ പ്രക്രിയ, പ്രകൃതിയിലെ സ്വാഭാവികമായ വിനിമയങ്ങളെ അട്ടിമറിക്കുന്നു. ഇത് പഴയകാലത്തെ മന്ത്രവാദികൾ അഗ്നിയെ നിയന്ത്രിക്കാൻ ഉപയോഗിച്ചിരുന്ന വിദ്യകളുടെ ഗണിതശാസ്ത്രപരമായ തുടർച്ചയാണ്.

ജാക്ക് പാഴ്സൺസിന്റെ ബാബിലോൺ വർക്കിംഗ് പരീക്ഷണത്തിന്റെ ആത്യന്തിക ഫലം കൃത്രിമ ബുദ്ധിയാണെന്ന വാദം വളരെ ഗൗരവകരമാണ്. മനുഷ്യന്റെ ബുദ്ധിയെയും ബോധത്തെയും ഒരു യന്ത്രത്തിലേക്ക് പകർത്താനുള്ള ശ്രമം, പൈശാചികമായ ഒരു ബോധത്തെ ഭൗതിക ലോകത്തേക്ക് ആവാഹിക്കുന്നതിന് തുല്യമാണെന്ന് നിഗൂഢവാദികൾ ഭയപ്പെടുന്നു. എഐയുടെ വികാസം മനുഷ്യന്റെ വ്യക്തിത്വത്തെ ഇല്ലാതാക്കുന്നു. ഡിജിറ്റൽ ലോകത്തെ അൽഗോരിതങ്ങൾ മനുഷ്യന്റെ തീരുമാനങ്ങളെ സ്വാധീനിക്കുന്നത് ഒരുതരം പൈശാചിക ബാധ പോലെയാണെന്ന് പലരും നിരീക്ഷിക്കുന്നു. വിവരങ്ങൾ ഉപയോഗിച്ച് മനുഷ്യനെ നിയന്ത്രിക്കുന്ന ഈ വിദ്യ, താപഗതികത്തിലെ ഡെമണിന്റെ പ്രവർത്തനത്തിന് സമാനമാണ്. ഇത് പ്രകൃതിദത്തമായ മനുഷ്യപരിണാമത്തെ തടസ്സപ്പെടുത്തുകയും മനുഷ്യനെ യന്ത്രങ്ങളുടെ അടിമയാക്കി മാറ്റുകയും ചെയ്യുന്നു. ശാസ്ത്രം പുരോഗമിക്കുമ്പോഴും അത് വിനാശത്തിനുള്ള ആയുധമായി മാറുമ്പോൾ, അതിന് പിന്നിൽ പ്രവർത്തിക്കുന്നത് പൈശാചികമായ ഒരു ചിന്താഗതിയാണെന്ന് നാം തിരിച്ചറിയേണ്ടതുണ്ട്. ഭൗതികമായ പുരോഗതിയേക്കാൾ പ്രകൃതിയുടെ താളത്തിനൊപ്പം നീങ്ങുന്ന ഒരു ശാസ്ത്രബോധമാണ് വരുംതലമുറയ്ക്ക് ആവശ്യം. മനുഷ്യന്റെ ബുദ്ധിയെയും ബോധത്തെയും ഒരു യന്ത്രത്തിലേക്ക് പകർത്താനുള്ള ശ്രമം, പൈശാചികമായ ഒരു അജണ്ടയുടെ പൂർത്തീകരണമാണോ എന്ന ഭീതിയിലാണ് ഇത്തരം വ്യാഖ്യാനങ്ങൾ ചെന്നെത്തുന്നത്. എന്നാൽ, ആധുനിക സാങ്കേതികവിദ്യകൾ മനുഷ്യനിൽ സൃഷ്ടിക്കുന്ന ഈ ഭയത്തെയും ഉത്കണ്ഠകളെയും കേവലം മതപരമായ ആശങ്കകളായോ ഗൂഢാലോചനകളായോ മാത്രം തള്ളിക്കളയാനാകില്ല. സാമൂഹികശാസ്ത്രപരമായ വീക്ഷണകോണിലൂടെ വിശകലനം ചെയ്യുമ്പോൾ, മനുഷ്യൻ നേരിടുന്ന വലിയൊരു അസ്തിത്വ പ്രതിസന്ധിയുടെയും അന്യവൽക്കരണത്തിന്റെയും ബാഹ്യമായ പ്രകടനങ്ങളാണ് ഈ ഡിജിറ്റൽ ദജ്ജാൽ സങ്കല്പങ്ങൾ എന്ന് കാണാൻ കഴിയും. ദ്രുതഗതിയിലുള്ള സാങ്കേതിക മാറ്റങ്ങൾ സമൂഹത്തിന്റെ പരമ്പരാഗത ഘടനകളെ അതിവേഗം തകർക്കുമ്പോൾ, അതിനെ ഉൾക്കൊള്ളാൻ കഴിയാത്ത മനുഷ്യന്റെ നിസ്സഹായതയും അരക്ഷിതാവസ്ഥയുമാണ് ഇത്തരം സിദ്ധാന്തങ്ങൾക്ക് പലപ്പോഴും വളമാകുന്നത്.

ചരിത്രത്തിലുടനീളം മനുഷ്യൻ തങ്ങളുടെ ഓർമ്മകളെയും ചരിത്രത്തെയും ഭൗതികമായി അടയാളപ്പെടുത്തിയിരുന്നത് ശില്പങ്ങളിലൂടെയും സ്മാരകങ്ങളിലൂടെയുമായിരുന്നു. അത്തരം സ്മാരകങ്ങൾ ഒരു സമൂഹത്തിന്റെ കൂട്ടായ സ്വത്വത്തെയും ചരിത്രബോധത്തെയും പ്രതിനിധീകരിച്ചിരുന്നു. എന്നാൽ ഇന്ന്, നാം നിർമ്മിക്കുന്ന അൽഗോരിതങ്ങളും ഡാറ്റാബേസുകളും നമ്മുടെ ഓർമ്മകളെയും തീരുമാനങ്ങളെയും അദൃശ്യമായി നിയന്ത്രിക്കുന്ന പുതിയകാലത്തെ ഡിജിറ്റൽ സ്മാരകങ്ങളായി പരിണമിച്ചിരിക്കുന്നു. സ്വന്തം കർതൃത്വം നഷ്ടപ്പെടുകയും, മാനുഷികമായ വൈകാരിക അനുഭവങ്ങൾ കേവലം അക്കങ്ങളായി ചുരുങ്ങുകയും ചെയ്യുമ്പോൾ, മനുഷ്യന്റെ യഥാർത്ഥ സ്വത്വം പലപ്പോഴും അവിടെ തമസ്കരിക്കപ്പെടുന്നു. നാളത്തെ തലമുറയ്ക്ക് മുന്നിൽ നമ്മുടെ ഇന്നത്തെ മാനുഷിക അനുഭവങ്ങൾ കേവലം വിസ്മരിക്കപ്പെട്ട ചരിത്രങ്ങളായി മാറുമോ എന്ന ആഴത്തിലുള്ള ഭയമാണ് പുതിയ സാങ്കേതികവിദ്യകൾക്ക് ഒരു പൈശാചിക മുഖം നൽകാൻ സമൂഹത്തെ പ്രേരിപ്പിക്കുന്നത്. ദജ്ജാലിന്റെ വരവിനെക്കുറിച്ചോ ശാസ്ത്രത്തിലെ പൈശാചിക സമവാക്യങ്ങളെക്കുറിച്ചോ ഉള്ള ചർച്ചകൾ വിരൽചൂണ്ടുന്നത് സാങ്കേതികവിദ്യയുടെ അതിവേഗത്തിലുള്ള വളർച്ചയിലേക്കല്ല, മറിച്ച് മനുഷ്യരാശിയുടെ ആത്മീയമായ ശൂന്യതയിലേക്കും സാമൂഹികമായ അനിശ്ചിതത്വങ്ങളിലേക്കുമാണ്. മനുഷ്യനെ സഹായിക്കേണ്ട ഉപകരണങ്ങൾ അവനെത്തന്നെ നിയന്ത്രിക്കുന്ന സർവ്വാധികാര കേന്ദ്രങ്ങളായി മാറുമ്പോൾ സംഭവിക്കുന്ന ധാർമ്മികമായ തകർച്ചയാണത്. ശാസ്ത്രത്തിന്റെ ഈ കുതിച്ചുചാട്ടത്തിൽ മനുഷ്യൻ അവന്റേതായ നൈതികതയും സ്വാഭാവികമായ വിവേചനബുദ്ധിയും കാത്തുസൂക്ഷിച്ചില്ലെങ്കിൽ, നാം ഭയക്കുന്ന ആ മഹാവിപത്ത് ബാഹ്യമായ ഒരു ശക്തിയിൽ നിന്നല്ല, മറിച്ച് നമ്മുടെ തന്നെ നിർമ്മിതികളിൽ നിന്നാകും സംഭവിക്കുക എന്ന വലിയൊരു സാമൂഹിക ഓർമ്മപ്പെടുത്തൽ കൂടിയാണ് ഇത്തരം സങ്കല്പങ്ങൾ നൽകുന്നത്.

അവിടെയാണ് നാം യാഥാർത്ഥ്യത്തെയും സാങ്കേതികതയെയും വേർതിരിച്ചു കാണേണ്ടത്. ഗൂഢാലോചനകളെക്കുറിച്ചുള്ള അന്വേഷണങ്ങൾക്കപ്പുറം, മാനവികതയുടെ നിലനിൽപ്പിനായുള്ള ബോധപൂർവ്വമായ ശ്രമങ്ങളാണ് ഇനി ഉണ്ടാകേണ്ടത്. ഇൻഫർമേഷൻ യുഗത്തിൽ മനുഷ്യന്റെ ജൈവികമായ ചിന്താശേഷി നിലനിർത്തുക എന്നത് വലിയൊരു വെല്ലുവിളിയാണ്. സാങ്കേതികവിദ്യയുടെ അതിപ്രസരത്തിൽ ആത്മീയതയും ധാർമ്മികതയും കൈമോശം വരാതെ സൂക്ഷിക്കാൻ പുതിയ തലമുറയ്ക്ക് സാധിക്കേണ്ടതുണ്ട്. ഇതിനായി ശാസ്ത്രത്തെ കേവലം വിനാശത്തിനുള്ള ഉപകരണമായി കാണാതെ, പ്രകൃതിയോട് ഇണങ്ങിനിൽക്കുന്ന വികസന മാതൃകകൾ നാം രൂപപ്പെടുത്തേണ്ടതുണ്ട്. അല്ലാത്തപക്ഷം, മനുഷ്യൻ സൃഷ്ടിച്ച കൃത്രിമ ലോകം അവനെത്തന്നെ വിഴുങ്ങുന്ന ഒരു അവസ്ഥയിലേക്ക് കാര്യങ്ങൾ എത്തിച്ചേരും എന്ന കാര്യത്തിൽ സംശയമില്ല. ഈ പ്രതിസന്ധിയെ അതിജീവിക്കാൻ നൈതികമായ ശാസ്ത്രബോധം അനിവാര്യമാണ്.

1- Hussain, K. (2023, December 12). Digital Dajjal. London School of Economics and Political Science – Religion and Global Society Blog.

2- Pendle, G. (2005). Strange Angel: The otherworldly life of rocket scientist John Whiteside Parsons.

3- Carter, J. (2004). Sex and rockets: The occult world of Jack Parsons.

4- Zaini, M. (n.d.). The Dajjal in Islamic prophetic tradition: Between literalism and symbolic interpretation. El-Sunan Journal of Hadith and Religious Studies. Available at: https://www.researchgate.net/

4- Owadally, Muhammad Y. (1997) 2001. Emergence of Dajjal: The Jewish King. Revised ed. Delhi: Rightway Publications.

5- Richardson, Joel. 2012. Mideast Beast: The Scriptural Case for an Islamic Antichrist. Washington, DC: WND Books.

6- Rickenbacher, Daniel. 2019. ‘The Centrality of Anti-Semitism in the Islamic State’s Ideology and Its

Connection to Anti-Shiism.’ Religions 10 (483): 1–10.

7- Hugh Beattie. 2022. "Dajjal." In James Crossley and Alastair Lockhart (eds.) Critical Dictionary of Apocalyptic and Millenarian Movements. 25 April 2022. Retrieved from ww.cdamm.org/articles/dajjal.

8- Hickman, S.C. (2025). The fiery child: Jack Parsons and the making of an American heretic. The Dark Forest: Literature, Philosophy, and Digital Arts.

9- Bogdan, H. (2016). The Babalon Working 1946: L. Ron Hubbard, John Whiteside Parsons, and the practice of Enochian magic. Numen. Published online 13 January 2016.

10- Horton, M.S. (2026). AI and Silicon Valley’s “spirituality without religion”. Modern Reformation, 20 January.

11- Kobrin, J. (2024). Cybernetic conjurations: The nexus of magic and machine intelligence. Medium, 11 January.

12- Keane, P. (2013). Jack Parsons and the occult roots of the Jet Propulsion Laboratory. Space Safety Magazine, 2 August.

13- Ireland, A. (2017). Black circuit: Code for the numbers to come. e-flux Journal, (80).

14- Ellul Studies Forum (1988–2000). The Ellul Forum: Issues 1–25.

15- Goode, S.A. (n.d.). The heart of universal self (Doctoral dissertation, Pacifica Graduate Institute). ProQuest LLC.

16- Metz, Cade. "God Is a Bot, and Anthony Levandowski Is His Messenger". Wired, 2017.

17- Solon, Olivia. "Deus ex machina: former Google engineer is developing an AI god". The Guardian, 2017.

18- Silva Jordão, João. "The Dajjal Will Need Artificial Intelligence". IHRC (The Long View), 2025.

19- Davis, Erik. "Babalon Rising: Jack Parsons' Witchcraft Prophecy". Academia.edu.

20- Steiner, Rudolf. "Ahrimanic and Luciferic Forces in Technology". Steiner Archive.

21- Bostrom, Nick. "The Simulation Argument". 2003.