ഉൻവാൻ ശറഫിൽ വാഫി: പഞ്ചജ്ഞാന കൂട്ടുകൾ
ഇസ്‍ലാമിക ലോകത്ത് വൈജ്ഞാനിക വിപ്ലവത്തിന് സാക്ഷിയായ കാലഘട്ടമാണ് എട്ട് ഒമ്പത് നൂറ്റാണ്ടുകൾ. മാത്സര്യ ബുദ്ധിയോടെ രചിക്കപ്പെട്ട പല രചനകൾക്കും ബീജാവാപം നൽകാൻ ഒത്തിണങ്ങിയ സാഹചര്യമായിരുന്നു പ്രസ്തുത നൂറ്റാണ്ടിനെ വ്യതിരക്തമാക്കിയത്. വൈവിധ്യമാർന്ന രചനവിഭവങ്ങൾ സമ്മാനിച്ച അന്നത്തെ അനേകം പണ്ഡിതവൃന്ദത്തിൽ വേറിട്ട സാന്നിധ്യമാണ് ഇബ്നുമഖരി എന്ന പേരിൽ വിശ്രുതനായ ശറഫുദ്ധീൻ അബൂ മുഹമ്മദ് ഇസ്മാഈൽ.
ഹിജ്റ 755 ജമാദുൽ ഊലയിലാണ് യമനിന്റെ മണ്ണിലേക്ക് ഈ അത്ഭുത പ്രതിഭ പിറന്നുവീണത്. അബയാത്തുൽഹുസ്സൈൻ കുടുംബത്തിൽ വളർന്നുവന്ന ഇബ്നുമഖരി കർമശാസ്ത്രം, ചരിത്രം, ഭാഷ, അറബിവ്യാകരണം, കവിത എന്നിങ്ങനെ വ്യത്യസ്ത വിജ്ഞാന ശാഖകളിൽ പ്രാവീണ്യം നേടിയതുകൊണ്ട് തന്നെ അത്ഭുതാവഹമായ ഒരു ശേഷിപ്പ് ലോകത്തിനു മുമ്പിൽ സമർപ്പിച്ചാണ് അദ്ദേഹം വിടപറഞ്ഞത്. അതായിരുന്നു ഉൻവാൻ ഷറഫിൽ വാഫി. പ്രസ്തുത ഗ്രന്ഥത്തിന്റെ രചനാശാസ്ത്രം അടുത്തറിഞ്ഞ തന്റെ സമകാലികരായ ഇബ്ൻ ഹജറുൽ ഹൈതമിയും, ഇമാം ശൗകാനി, ഇമാം സഖാവി അടക്കമുള്ള പണ്ഡിതരും അദ്ദേഹത്തെ പ്രശംസിച്ചതായി ചരിത്രത്തിൽ കാണാൻ സാധിക്കും.
രചനാ പശ്ചാത്തലം
യമനിലെ ഗവർണറായിരുന്ന മജ്‌ദുദ്ധീൻ ഫൈറൂസാബാദ്, എല്ലാ വരികളും അറബി അക്ഷരമാലയിലെ അലിഫ് കൊണ്ട് തുടങ്ങുന്ന രീതിയിൽ വിചിത്രമായ ഒരു ഗ്രന്ഥപൂർത്തീകരണം നടത്തികൊണ്ട്, അക്കാലത്തെ സുൽത്താനായിരുന്ന അഷ്റഫ് ഇസ്മാഈൽ രണ്ടാമനുവേണ്ടി സമർപ്പിക്കുകയുണ്ടായി. ഇതിൽ ആശ്ചര്യം പ്രകടിപ്പിച്ച രാജാവിന്റെ സന്നിധിയിൽ വെച്ച് ഇബ്നുമഖരി മറ്റൊരു ഗ്രന്ഥരചന നടത്താൻ തീരുമാനിക്കുകയുണ്ടായി.
മജ്‌ദുദ്ധീൻ ഫൈറൂസാബാദി രചിച്ചിരുന്നത് എല്ലാ വരികളുടെയും തുടക്കം അലിഫ് അക്ഷരം കൊണ്ടായിരുന്നെങ്കിൽ അഞ്ചു വിജ്ഞാന ശാഖകൾ സമ്മേളിച്ചിട്ടുള്ള അത്ഭുത ഗ്രന്ഥമായിരുന്നു ഇബ്‌നുമഖരിയുടെ സംഭാവന. ദൗർഭാഗ്യവശാൽ, അഷ്റഫ് സുൽത്താന്റെ പെട്ടന്നുണ്ടായ മരണം മൂലം അദ്ദേഹത്തിന്റെ കാലത്ത് ഗ്രന്ഥപൂർത്തീകരണം സാധ്യമാകാത്തതിനാൽ മകനായ നാസ്വിറിനായിരുന്നു അദ്ദേഹം തന്റെ ഗ്രന്ഥം സമർപ്പിച്ചെതെന്ന് പ്രമുഖ ചരിത്ര പണ്ഡിതൻ ശംസുദ്ധീൻ സഖാവി കുറിച്ചുവെക്കുന്നുണ്ട്.
ആരോപണം
അതിമനോഹരമായ കലാവിഷ്‌കാരങ്ങളുടെ സ്വരൂപമായി ഇബ്‌നുമഖരിയുടെ ഗ്രന്ഥത്തെ പരിചയപ്പെടുത്തുമ്പോഴും അദ്ദേഹത്തിന്റെ രചനാ പശ്ചാത്തലവുമായി ആരോപണങ്ങൾ ഉയർന്നുവന്നിരുന്നു. മജ്‌ദുദ്ധീൻ ഫൈറൂസാബാദിനു ശേഷം ഖാളി ഖുളാത്ത് സ്ഥാനലബ്ധിക്ക് വേണ്ടിയാണ് ഇത്തരത്തിലുള്ള ശ്രമത്തിനു ഇബ്നുമഖരി മുതിർന്നെതെന്നായിരുന്നു ആരോപണം. എന്നാൽ, ആയുഷ്‌കാലം മുഴുവനും ദീനി വിജ്ഞാന പ്രസരണത്തിനു വേണ്ടി ഉഴിഞ്ഞുവെച്ച ഇബ്നുമഖരിയെ കുറിച്ച് അടിസ്ഥാനരഹിതമായ ആരോപണമാണ് ഇതെന്ന് അദ്ദേഹത്തിന്റെ ജീവിതക്രമത്തിൽ നിന്നുതന്നെ ബോധ്യപ്പെടുന്ന വസ്‌തുതയാണ്.
രീതി ശാസ്ത്രം
കർമശാസ്ത്രം (فقه), ചരിത്രം (تاريخ), വ്യാകരണ ശാസ്ത്രം (علم النحو), പദ്യ ശാസ്ത്രം (علم العروض), സ്വരമേള ശാസ്ത്രം (علم القوافي) ഉൾപ്പെടെയുള്ള അഞ്ചു വിജ്ഞാന ശാഖകൾ ഉൾക്കൊള്ളിച്ചിട്ടുള്ള ഗ്രന്ഥത്തിന്റെ വായനാരീതി വിസ്‌മയാവഹമാണ്. പൊതുവായി ഗ്രന്ഥങ്ങൾ വായിക്കുന്നതുപോലെ പ്രസ്‌തുതഗ്രന്ഥം വായിച്ചുകഴിഞ്ഞാൽ ശാഫിഈ ഫിഖ്ഹിന്റെ സാന്നിധ്യം കണ്ടെത്താൻ സാധിക്കും. മറ്റൊന്ന്, ആദ്യ വരികൾ താഴോട്ട് വായിച്ചാൽ ഗദ്യ ശാസ്ത്രവും, അവസാന വരികൾ താഴോട്ട് വായിച്ചാൽ സ്വരമേള ശാസ്ത്രവും ഓരോ പേജിലും അടങ്ങിയ രണ്ടു കോളങ്ങളിൽനിന്നു ആദ്യത്തേത് റസൂലിയ്യ ഭരണകൂടത്തിന്റെ ചരിത്രവും (റസൂലിയ്യയുടെ സ്ഥാപനവർഷമായ ഹി: 626 മുതൽ ഇബ്‌നു മഖരി രചന പൂർത്തീകരിക്കുന്ന വർഷമായ 804 വരെയുള്ള ചരിത്ര സംഭവങ്ങള്‍), രണ്ടാമത്തെ കോളത്തിൽ വ്യാകരണ ശാസ്ത്രവുമാണ് അടങ്ങിയിട്ടുള്ളത്.
ഉൻവാൻ ശറഫിൽ വാഫിയുടെ പല ഭാഗങ്ങളും ഇന്നും സൂക്ഷിക്കപ്പെട്ടിട്ടുണ്ട്. കൈറോ ആസ്ഥാനമായി പ്രവർത്തിക്കുന്ന ദാറുൽ കുതുബിൽ മിസ്‌രിയ്യയിലും (دارالكتب المصرية), ബെർലിൻ, പാരീസ് മ്യൂസിയങ്ങളിലും ഇത് കാണാവുന്നതാണ്.
പ്രിന്റിങ് സംവിധാനത്തിന്റെ ആദ്യകാലങ്ങളിൽ കൊൽക്കത്തയിൽ പ്രസിദ്ധീകരണമാരംഭിച്ച ഗ്രന്ഥം വടക്കൻ സിറിയയിലെ അസീസിയ്യ പബ്ലിഷേഴ്സ് പുനഃപ്രസിദ്ധീകരിക്കുകയും (مطبعة العزيزة) പിന്നീട് ഇന്ന് കാണുന്ന രൂപത്തിലേക്ക് 1976ൽ ദോഹയിലെ ദാറുൽ ഉലൂം പ്രസിദ്ധീകണ വിഭാഗം (مؤسسة دار العلوم) മാറ്റിയെടുക്കുകയുമാണ് ചെയ്തത്. ഇസ്‍ലാമിക വിജ്ഞാന ലോകത്തെ നിത്യാല്‍ഭുതമായി ഇന്നും ആ കൃതി ശേഷിക്കുന്നു.
Leave A Comment