മുസ്ലിം കുട്ടികളുടെ തട്ടം അഴിപ്പിക്കുന്നതാണോ രാഷ്ട്രീയം
തട്ടം വേണ്ടെന്നു പറയുന്ന പെണ്‍കുട്ടികള്‍ മലപ്പുറത്ത് ഉണ്ടായത് കമ്മ്യൂണിസ്റ്റ് പാര്‍ട്ടിയുടെ സ്വാധീനം കൊണ്ടാണെന്ന സിപിഎം നേതാവ് അഡ്വ. അനില്‍കുമാറിന്റെ പ്രസ്താവന ഏറെ വിവാദങ്ങള്‍ക്ക് വഴി വെച്ചിരിക്കുകയാണ്. അത് കേവലം യാദൃശ്ചിക പരാമർശമായോ വ്യക്തിപരമായ അഭിപ്രായമായോ ഗണിക്കാനാവില്ലെന്ന് തന്നെയാണ് മനസ്സിലാവുന്നത്. കമ്മ്യൂണിസ്റ്റ് പാർട്ടിയുടെ സ്ഥാപിത താത്പര്യങ്ങളുടെ ബോധപൂർവ്വമുള്ള തുറന്നു പറച്ചിലായിട്ടു തന്നെ വേണം ഇതിനെ കരുതാൻ. തീർത്തും മതരഹിതവും യുക്തിഭദ്രവുമായ ഒരു ആശയധാരയെ കെട്ടിപ്പുണരുന്ന കമ്മ്യൂണിസത്തിന് മത സംഹിതകളോടും സിദ്ധാന്തങ്ങളോടും എക്കാലവും അലർജിയും അകൽച്ചയുമാണ് ഉണ്ടായിട്ടുള്ളത്. സാഹചര്യവും സന്ദർഭവും ഒത്തു വരുമ്പോഴെല്ലാം മത പ്രീണനത്തിന്റെ വേഷം അഴിച്ചു വെച്ച് മാർക്സിസം തങ്ങളുടെ യഥാർത്ഥ രൂപവും ഭാവവും തുറന്ന് കാണിച്ചിട്ടുമുണ്ട്.
സാർ ചക്രവർത്തിമാരിൽ നിന്നും അധികാരം കൈയ്യിലൊതുക്കാൻ മോഹനവാഗ്ദാനങ്ങൾ നൽകി മഹാഭൂരിപക്ഷം വരുന്ന നിസ്വാർത്ഥരായ റഷ്യൻ മുസ്‍ലിംകളുടെ പിന്തുണനേടുകയും ഒടുവിൽ ഭരണം കയ്യിൽ ഭദ്രമായപ്പോൾ വഞ്ചിക്കുകയും ക്രൂരമായി മർദ്ദിക്കുകയും ചെയ്തവരാണ് കമ്മ്യൂണിസ്റ്റുകൾ. സോവിയറ്റ് റഷ്യയിലെ സാധാരണക്കാരും ദരിദ്രരുമായ ഭൂരിപക്ഷ മുസ്‌ലിംകള്‍ ഈ ആഹ്വാനത്തോട് അനുകൂല നിലപാട് സ്വീകരിച്ചപ്പോൾ അൽപം അറിവും കാഴ്ചപ്പാടുമുള്ള മറു വിഭാഗം മുസ്‍ലിംകൾ ഈ വാഗ്ദാനങ്ങൾ നിരാകരിക്കുകയാണ് ചെയ്തത്. എന്നാൽ, ആവശ്യം നേടിയ ശേഷം, നിരസിച്ചവരെ മാത്രമല്ല, അനുകൂലിക്കുകയും അധികാരത്തിലേറ്റുകയും ചെയ്ത ലക്ഷക്കണക്കിനാളുകളെ കൂട്ടത്തോടെ തിരഞ്ഞുപിടിക്കുകയും മർദിക്കുകയും കൊടും തണുപ്പിൽ പട്ടിണിക്കിട്ട് കൊല്ലുകയും ചെയ്തു.
വിവിധ മേഖലകളിൽ അതികായകരായിരുന്ന അനവധി മുസ്ലിം പണ്ഡിതർ, ചിന്തകർ, എഴുത്തുകാർ, വ്യാപാരികൾ, കർഷകർ, തുടങ്ങി നിരവധി മേഖലകളിൽ പ്രാഗത്ഭ്യം തെളിയിച്ച അനേകായിരം വ്യക്തികളെ നിർദാക്ഷിണ്യം കൊന്നുതള്ളി, പള്ളികളും മദ്രസ്സകളും ലൈബ്രറികളും നൃത്തശാലകളും മ്യൂസിയങ്ങളും ബാറുകളുമാക്കി, അറബി ഭാഷയും ഗ്രന്ഥങ്ങളും വിലക്കി, കഅബയുടെ ചിത്രം ചില്ലിട്ട് സൂക്ഷിച്ചവരെ പോലും രക്തദാഹികളായ കമ്മ്യൂണിസ്റ്റുകൾ വെറുതെ വിട്ടില്ല. ഗതകാല മാർകിസ്റ്റ് തേർവാഴ്ചയുടെ രക്തപങ്കിലമായ ചരിത്ര വർത്തമാനങ്ങളാണിതൊക്കെ.
അത് കൊണ്ട് സമകാലിക രാഷ്ട്രീയത്തിൽ കാര്യമായ ഇടപെടലുകൾക്ക് ഇടമില്ലാതെ കേവല കേരള രാഷ്ട്രീയപാർട്ടിയായി ചുരുങ്ങി കൊണ്ടിരിക്കുന്ന മാർക്സിസ്റ്റു പാർട്ടി ഒരു പക്ഷേ അനിൽകുമാറിന്റെ അഭിപ്രായത്തെ വ്യക്തിപരമായ കാഴ്ചപ്പാടായി ചുരുക്കി കെട്ടിയാലും മാർക്സിസ്റ്റ് പാർട്ടിയുടെ നിലപാടല്ലാതായി അതു മാറില്ല. കാരണം പാർട്ടി ക്ലാസ്സുകളിലും ക്യാമ്പുകളിലും നിരന്തരം പങ്കെടുത്ത് നിരീശ്വരവാദിയായി മാറിയ ഒരാളിൽ മാർക്സിസ്റ്റ് ആശയമല്ലാതെ മറ്റേത് ആശയമാണ് കുടികൊള്ളുക. അതിനാൽ കാലഹരണപ്പെട്ട തങ്ങളുടെ തത്വങ്ങൾക്കും വീക്ഷണങ്ങൾക്കും കേരളത്തിലെ ഭൂരിപക്ഷ മത വിശ്വാസികൾക്കിടയിൽ ഇടം പിടിക്കാനാവില്ലെന്ന തിരിച്ചറിവും തിരഞ്ഞെടുപ്പുകളിൽ വിജയം വരിക്കാനാവില്ലെന്ന ആധിയും മാത്രമാണ് അത്തരം തിരുത്തുകളുടെ ആധാരമെന്ന് അരിയാഹാരം കഴിക്കുന്ന ആർക്കും മനസ്സിലാകും.
അല്ലെങ്കിലും മലപ്പുറത്തെ മാപ്പിള പെൺകുട്ടികളെ പാന്റും ഷർട്ടും ധരിപ്പിക്കാനും തട്ടമഴിപ്പിക്കാനും നിരത്തിൽ തട്ടമണിയിച്ച് ഫ്ലാഷ് മോബ് നടത്തുവാനും പുരോഗമന കാഴ്ചപ്പാട് പേറുന്ന ഈ ലിബറലുകൾക്ക് വല്ലാത്ത തിടുക്കമാണ്. സത്യത്തിൽ ഉത്തരേന്ത്യയിൽ സംഘപരിവാർ സംഘടനകൾ ചെയ്യുന്നതെന്താണോ അതു തന്നെയാണ് കേരളത്തിലെ മാർക്സിസ്റ്റു പാർട്ടിയും ചെയ്യുന്നത്. തട്ടം ധരിക്കാതിരിക്കൽ സ്ത്രീയുടെ സ്വതന്ത്ര്യമാണെങ്കിൽ ധരിക്കണമെന്നാഗ്രഹിക്കലും അതണിയലും അവളുടെ തന്നെ അവകാശവും സ്വാതന്ത്ര്യവുമാണ്. അതേസമയം മത വിരുദ്ധ ആശയങ്ങൾ കുത്തിവെച്ച് മത വേഷം കയ്യൊഴിയണമെന്ന് വാശിപിടിക്കുന്നതും നിർബന്ധിക്കുന്നതും തനി ഫാഷിസവും മനുഷ്യത്വരഹിതവുമാണ്.
പുള്ളിമാനിന് അതിന്റെ പുള്ളി മായ്ക്കാനാവില്ലെന്ന് പറഞ്ഞത് പോലെ, ആരെന്ത് പറഞ്ഞാലും, അവസരങ്ങള്‍ക്കനുസരിച്ച് എത്ര തന്നെ നിറം മാറിയാലും, കമ്യൂണിസം മതവിരുദ്ധതയിലധിഷ്ഠിതമാണെന്നത് വ്യക്തമാണ്. മനുഷ്യനെ മയക്കുന്ന കറുപ്പാണ് മതം എന്നതാണ് അവരുടെ അടിസ്ഥാന തത്വം. അതില്‍നിന്ന് ഒരുകാലത്തും പിന്നോട്ട് പോകാന്‍ അവര്‍ക്ക് സാധ്യമല്ല താനും. അത് കൊണ്ട് തന്നെ, മതരഹിത ജീവനുകളുള്ള സമൂഹമാണ് അവരുടെ സ്വപ്നം. അവിടെ മതങ്ങളോ ഇത് വരെയുള്ള മനുഷ്യസമുദായങ്ങളോ രൂപപ്പെടുത്തിയെടുത്ത മൂല്യങ്ങള്‍ക്കോ മര്യാദകള്‍ക്കോ സ്ഥാനമില്ല തന്നെ. അഥവാ, മൃഗതുല്യമായ, പരസ്പര സ്നേഹമോ ബഹുമാനമോ ഇല്ലാത്ത, ആര്‍ക്കും തന്നിഷ്ടപ്രകാരം തോന്നിയത് പോലെ ജീവിക്കാവുന്ന ഒരു സമൂഹമായിരിക്കും അത്. അത് കൊണ്ട് തന്നെയാണ് മതങ്ങളിലും മൂല്യങ്ങളിലും വിശ്വസിക്കുന്നവരൊക്കെ അതിനെ എതിര്‍ക്കുന്നതും.
ഈ വിഷയവുമായി ബന്ധപ്പെട്ട് വന്ന പ്രസ്കതമായ പ്രതികരണങ്ങള്‍ താഴെ കമന്റുകളില്‍ വായിക്കുക. നിങ്ങള്‍ക്കും പ്രതികരിക്കാം.
6 Comments
-
-
ഹാരിസ് മുസ്തഫ പിള്ള "തട്ടത്തീന്ന് കയ്യെടുക്കെട!" വല്യ സഖാവ് സ്റ്റാലിനോടും കട്ടസഖാവ് അനിൽകുമാറിനോടും ആണ്.. 1927 മാർച്ച് എട്ടാം തീയതി കമ്മ്യൂണിസ്റ്റ് പാർട്ടി ഒരു ഹിജാബ് കത്തിക്കൽ ക്യാമ്പയിന് തുടക്കം കുറിച്ചു. അതായത് 96 വർഷം മുമ്പ് ഒരു അന്താരാഷ്ട്ര വനിതാ ദിനമായ മാർച്ച് എട്ടാം തീയതി സോവിയറ്റ് യൂണിയനിലെ ഏറ്റവും കൂടുതൽ മുസ്ലിങ്ങൾ ഉള്ള സ്റ്റേറ്റ് ആയിരുന്ന ഉസ്ബക്കിസ്ഥാനിലെ അൻദിജാൻ എന്ന പട്ടണത്തിൽ ജോസഫ് സ്റ്റാലിന്റെ നിർദ്ദേശപ്രകാരം കമ്മ്യൂണിസ്റ്റ് പാർട്ടി ഓഫ് സോവിയറ്റ് യൂണിയൻ ഹുജ്ജൂം (Hujum ശക്തമായ ആക്രമണം) എന്ന പേരിൽ ഒരു ഹിജാബ് കത്തിക്കൽ ക്യാമ്പയിന് തുടക്കം കുറിച്ചു. എന്നും കേരളത്തിലെ കമ്മ്യൂണിസ്റ്റുകൾ നടത്തുന്ന നാടകം പോലെ ആയിരക്കണക്കിന് പട്ടാളക്കാരുടെ ഇടയിലേക്ക് ഹിജാബ് ഇട്ട കുറെ സ്ത്രീകൾ കടന്നുവന്ന് ഹിജാബ് ഊരി പരസ്യമായി നഗരം മധ്യത്തിൽ കത്തിച്ചാണ് അതിനു തുടക്കം കുറിച്ചത്. ഇസ്ലാമിൻറെ സുവർണ്ണ കാലഘട്ടത്തിൽ ലോക ഇസ്ലാമിക ആത്മീയ ശാസ്ത്ര കേന്ദ്രമായിരുന്ന പ്രദേശമായ സമർഖണ്ടും ഇമാം ബുഖാരിയെ പോലുള്ള മഹാരഥന്മാർ ജന്മം കൊടുത്ത ബുഖാറയും ഉൾപ്പെടുന്ന രാജ്യമാണ് ഉസ്ബെക്കിസ്ഥാൻ. അനേകം ഇമാമുമാരുടെയും പണ്ഡിതന്മാരുടെയും അവിസെന്ന, അൽ ഫറാബി പോലുള്ള ധാരാളം ശാസ്ത്രത്തെയും സൃഷ്ടിച്ചെടുത്ത പ്രദേശം കൂടിയാണ് ഇവിടം. അവിടത്തെ അതി പുരാതനവും പ്രധാനപ്പെട്ടതുമായ ഇസ്ലാമിക സാംസ്കാരിക കേന്ദ്രവുമാണ് അൻദിജാൻ. മുസ്ലിം ഭൂരിപക്ഷ പ്രദേശങ്ങൾ ആയ അൽബാനിയ യമൻ അഫ്ഗാൻ ഇൻഡോനേഷ്യ ചൈനയുടെ പടിഞ്ഞാറ് പ്രവശ്യ റഷ്യയുടെ തെക്ക് കിഴക്കൻ പ്രാവശ്യകൾ സോവിയറ്റ് യൂണിയൻറെ ഭാഗമായിരുന്ന ആറ് മുസ്ലിം ഭൂരിപക്ഷ രാജ്യങ്ങൾ പിന്നെ നമ്മുടെ വെസ്റ്റ് ബംഗാൾ എന്നിവിടങ്ങളിലെ കമ്മ്യൂണിസ്റ്റ് ഭരണകൂടങ്ങളുടെ ചതിയുടെ ചരിത്രം പഠിച്ചു കഴിഞ്ഞാൽ മനസ്സിലാകും കമ്മ്യൂണിസ്റ്റുകൾ എങ്ങനെയാണ് അവിടെ മുസ്ലീം സമൂഹത്തെ ആത്മീയമായും ധാർമികമായും നശിപ്പിക്കാൻ ശ്രമിച്ചത് എന്ന്. പല രാജ്യങ്ങളിലും അറബിയിലുള്ള ബാങ്ക് വിളികൾ പോലും പ്രാദേശിക ഭാഷയിലേക്ക് മാറ്റിയിരുന്നു. ഗൾഫിലും മധ്യേഷ്യയിലും പ്രവർത്തിച്ച ജർമൻ പാസ്റ്റർ ആയിരുന്ന എറിക് ബെത്തുമാൻ എഴുതി 1958ൽ ന്യൂയോർക്ക് നിന്നും പ്രസിദ്ധീകരിച്ച "കമ്മ്യൂണിസ്റ്റ് ഭരണത്തിൽ സോവിയറ്റ് മുസ്ലീങ്ങളുടെ വിധി" എന്ന 36 പേജ് ഉള്ള പുസ്തകം ഇതിലേക്ക് വെളിച്ചം വീശുന്നതാണ്. മുസ്ലിം നേതൃത്വവുമായി ഒക്ടോബർ വിപ്ലവത്തിന് മുമ്പ് ഉണ്ടാക്കിയ എല്ലാ കരാറുകളും കാറ്റിൽ പറത്തിക്കൊണ്ട് സ്റ്റാലിൻ മത നിരോധനം അടിച്ചേൽപ്പിച്ചു. അറേബ്യൻ പർദ്ദയ്ക്ക് പകരം തല ഉൾപ്പെടെ മൂടുന്ന "ഫറഞ്ഞി" എന്ന പർദ്ദയ്ക്ക് സമാനമായ പ്രാദേശിക സാംസ്കാരിക തനിമയുള്ള വസ്ത്രം നിർബന്ധമാക്കാനും ഈ ക്യാമ്പയിൻ ലക്ഷ്യം വച്ചു. പക്ഷേ ക്യാമ്പയിൻ പരാജയപ്പെടുകയും തൊഴിലാളി സ്ത്രീകളുടെ ഇടയിൽ പോലും പർദ്ദ കൂടുതൽ ജനകീയമാവുകയും ചെയ്തു. കഴിഞ്ഞ 20 വർഷത്തിനുള്ളിൽ ഇസ്ലാമോഫോബിയ കേരളത്തിലും വ്യാപകമായപ്പോഴാണ് മുസ്ലിം സ്ത്രീകൾ ഇസ്ലാമികമായ വസ്ത്രധാരണത്തിലേക്ക് കൂടുതൽ കടന്നുവന്നത് എന്ന് കാണാൻ കഴിയും. സ്ത്രീകളുടെ വിദ്യാഭ്യാസം ബാലിക വിവാഹം എന്നീ വിഷയങ്ങളിൽ ബോധവൽക്കരണം ഉണ്ടാക്കുന്നതിൽ ഹുജൂം ക്യാമ്പയിൻ സ്വാധീനം ചെലുത്തിയെങ്കിലും വിശ്വാസകാര്യങ്ങളിൽ ഇടപെടേണ്ട എന്ന സന്ദേശം കൂടി കമ്മ്യൂണിസ്റ്റ് പാർട്ടിക്ക് കൊടുക്കാൻ സോവിയറ്റ് മുസ്ലീങ്ങൾക്ക് കഴിഞ്ഞു. 1929 ഏപ്രിൽ എട്ടിന് മതവും വിശ്വാസവും ആയി ബന്ധപ്പെട്ട പുതിയ 65 ആർട്ടിക്കിലുകൾ റഷ്യൻ ഭരണഘടനയിൽ ചേർത്തുകൊണ്ട് പ്രഖ്യാപനം ഉണ്ടായി. കുട്ടികളെ മതവിദ്യാഭ്യാസം കൊടുക്കുന്നതിൽ ശക്തമായ നിയന്ത്രണങ്ങൾ ആയിരുന്നു അതിൽ മുഖ്യം. മുസ്ലീങ്ങളുടെ പ്രതിഷേധം ഭയന്ന് ഈ നിയമങ്ങൾ ഘട്ടംഘട്ടമായി നടപ്പാക്കാൻ ആണ് അവർ ശ്രമിച്ചത്. അവർ ലക്ഷ്യം വയ്ക്കുന്നത് മൂന്ന് കാര്യങ്ങളാണെന്ന് പാർലമെൻറിൽ വ്യക്തമാക്കിയിരുന്നു; വഖഫ്, ശരീഅത്ത് നിയമങ്ങൾ, ഇസ്ലാമിക വിദ്യാഭ്യാസം എന്നിവയായിരുന്നു അവ. 1910കളിൽ സാർ ചക്രവർത്തിയുടെ റഷ്യയിൽ മാത്രം 26000 മുസ്ലീം പള്ളികൾ ഉണ്ടായിരുന്നു, 1970 കളിൽ വെറും 500 പള്ളികൾ മാത്രമാണ് അവശേഷിച്ചത് ബാക്കി മുഴുവനും ചതിയിലൂടെ സ്റ്റാലിൻ അടച്ചുപൂട്ടി. കമ്മ്യൂണിസം എന്താണെന്ന് മനസ്സിലാക്കാതെ സാർ ചക്രവർത്തിക്കെതിരെയുള്ള പ്രവർത്തനങ്ങളിൽ കമ്മ്യൂണിസ്റ്റ് പാർട്ടിക്ക് പിന്തുണ നൽകിയ ലക്ഷക്കണക്കിന് പണ്ഡിതന്മാരെയാണ് 1929 മുതൽ 1940 വരെയുള്ള കാലഘട്ടത്തിൽ സ്റ്റാലിന്റെ നേതൃത്വത്തിൽ കൂട്ടക്കൊല ചെയ്തത്. ഖലീഫ ഉസ്മാൻ്റെ ചോര വീണ ഖുർആൻ സമർഖണ്ഡിലേക്ക് എത്തിക്കാം എന്ന് വാഗ്ദാനമായിരുന്നു ലെനിനും സ്റ്റാലിനും അവർക്ക് നൽകിയിരുന്നത്. കൂടുതൽ ചരിത്ര പഠനങ്ങൾ നടത്തി കഴിയുമ്പോൾ ഹിറ്റ്ലറെയും മുസോളിനിയെയും പിന്നിലേക്ക് തള്ളി ലോകം കണ്ട ഏറ്റവും ക്രൂരനായ ഭരണാധികാരിയായി പേര് മാറ്റപ്പെട്ട ഫാസിസത്തിന്റെ വക്താവായ സ്റ്റാലിൻ മാറുമെന്നതിൽ സംശയമില്ല. ഇന്ന് റഷ്യൻ ഗവൺമെന്റിന്റെ തന്നെ സ്പിരിച്ചൽ ഡയറക്ടറേറ്റ് എന്ന ഡിപ്പാർട്ട്മെൻറ് വഴി തകർത്തെറിഞ്ഞ പള്ളികൾ എല്ലാം പുനസ്ഥാപിച്ചു കൊണ്ടിരിക്കുന്നു എന്നുള്ളത് സന്തോഷകരമാണ്. 18-19 നൂറ്റാണ്ടുകളിൽ ഇസ്ലാമിക വിശ്വാസത്തെ തകർത്തെറിയാൻ ശ്രമിച്ച കമ്മ്യൂണിസത്തെയും തുർക്കിയിലെ മത നിരാസത്തെയും അതിജീവിച്ചത് സൂഫി ചിന്താധാരയിലൂടെയായിരുന്നു. സൂഫി തരീക്കത്തുകളെ കുറിച്ച് നമുക്ക് വിയോജിപ്പുകൾ ഉണ്ടെങ്കിലും വേനലിൽ ഭൂമിക്ക് അടിയിൽ സുരക്ഷിതമായിരിക്കുന്ന വിത്തു പോലെ ഒരു നൂറ്റാണ്ടിനടുത്ത് കാലം ഈ രാജ്യങ്ങളിലെ കമ്മ്യൂണിസ്റ്റ് മതനിരാസ ഫാസിസ്റ്റ് തേരോട്ടത്തിലും ഇസ്ലാമിക ആത്മീയ ചൈതന്യം ഓരോ കുടുംബങ്ങളിലും നിലനിർത്തുന്നതിൽ സൂഫിസം വഹിച്ച പങ്ക് അനിർവജനീയമാണ്. കെ അനിൽകുമാർ ഇസ്ലാം വിരുദ്ധരുടെ വലിയൊരു സദസ്സ് കണ്ടപ്പോൾ സമാന ചിന്താഗതിയുള്ള കമ്മ്യൂണിസ്റ്റ് ആവേശം ഉൾക്കൊണ്ട് സത്യം പറഞ്ഞതാണ്. അദ്ദേഹത്തിൻറെ മുഴുവൻ പ്രസംഗം മുഴുവൻ കേട്ടു കഴിയുമ്പോൾ മനസ്സിലാകുന്നത് പതിറ്റാണ്ടുകൾ കൊണ്ട് കേരളം നേടിയെടുത്ത ഉന്നതിയുടെ അവകാശം ഏതാനും പ്രാവശ്യം മാത്രം അഞ്ചുവർഷം വീതം ഭരിച്ച ഇടതുപക്ഷ പ്രസ്ഥാനത്തിലാണ് എന്ന തമാശയാണ്. കൂടാതെ മുസ്ലീം സമുദായം ഉൾപ്പെടെ കേരളത്തിലെ സ്ത്രീകളെ മതത്തിന്റെയ
-
മുഹമ്മദ് രാമന്തളി രാഷ്ട്രീയ കമ്മ്യൂണിസവും സൈദ്ധാന്തിക കമ്മ്യൂണിസവും ........................ ലീഗ് വിരോധം മൂലം സമസ്ത വിട്ട് കമ്മ്യൂണിസ്റ്റ് പാർട്ടിക്ക് വോട്ടു മറിച്ച കാന്തപുരം വിഭാഗം പോലും രാഷ്ട്രീയ കമ്മ്യൂണിസം സൈദ്ധാന്തിക കമ്മ്യൂണിസം, എന്ന് വേർതിരിച്ച് പതിരിൽ നെല്ല് ചികയുന്ന പണി ഏറ്റെടുത്തിരുന്നില്ല. എന്നിട്ടും അവരിട്ട പാലത്തിലൂടെ ഉമ്മത്ത് കമ്മ്യൂണിസത്തിലേക്ക് പടർന്നു.കാൽ ചുവട്ടിലെ മണ്ണൊലിച്ചു തുടങ്ങിയപ്പോഴാണ് അവർ കണ്ണുതുറന്ന് മിഴിച്ച് നോക്കുന്നത്. സമസ്തയിൽ പ്രശ്നമുണ്ടാക്കി പിരിയുന്ന സമയത്ത് യുവാക്കളും വയോധികരുമായ തന്റെ കൂടെ നിന്ന ആളുകളുടെ അഖീദ അരക്കിട്ടുറപ്പിക്കാൻ കാന്തപുരത്തിന് സാധിച്ചു. എന്നാൽ മൂന്ന് പതിറ്റാണ്ടിനിടയിൽ ജനിച്ച അവരുടെ മക്കളും പേരമക്കളും കണ്ടു ശീലിച്ചത് കമ്മ്യൂണിസ്റ്റ് വൽകരിച്ച സുന്നിസവും ഏറെ ശത്രുത പുലർത്തേണ്ട സമുദായ രാഷ്ട്രീയവുമാണ്. അരിവാൾ ഏന്തിയ സംഘടന തറപ്പണിക്കിടയിൽ മക്കൾക്ക് അള്ളാഹുവിനെ പരിചയപ്പെടുത്താൻ മറന്നുപോയ രക്ഷിതാക്കൾ, വ്യക്തി പ്രതാപവും പ്രസ്ഥാന പ്രഭാവവും രാകി മൂർച്ച കൂട്ടുന്നതിനിടയിൽ പുതുതലമുറ മതനിരാസത്തിലേക്ക് നീങ്ങുന്നത് നോക്കി നിന്ന നേതാക്കൾ, അതിന് വളം വെച്ച് കൊടുത്ത മുള്ളുർക്കര പ്രഭാഷകർ.. കമ്മ്യൂണിസ്റ്റ് വേദിയിൽ സുന്നി പണ്ഡിതന്റെ മകൻ അള്ളാഹുവിന്റെ ഉൻമയെ ചോദ്യം ചെയ്യുന്നതും എ പി മഹല്ല് ഭാരവാഹിയുടെ ഏക സന്താനം പാർട്ടി ആപ്പീസിൽ ദിവ്യയെ താലി കെട്ടുന്നതും സമാനമായ ഉമ്മത്തിന് താങ്ങാനാവാത്ത സമുദായത്തിന് തല താഴ്ത്തേണ്ടി വന്ന പല സംഭവങ്ങൾക്കും നാം സാക്ഷിയായി.മുസ്ലിമിന് കമ്മ്യൂണിസ്റ്റാവാം... എന്ന കാന്തപുരത്തിന്റെ ഫത് വയുടെ ദുരന്തം.. മതത്തിന്റെ വേലിക്കെട്ടുകൾ പൊളിച്ച് അമ്പലനടയിൽ താലികെട്ടുന്ന ഷഹാനമാരെയും മാനവരക്തം പാടി തെരുവിൽ നിന്ന് അള്ളാഹുവിന്റെ അസ്തിത്വം ചോദ്യം ചെയ്യുന്ന രിയാസുമാരെയും ഇസ്ലാമിനെതിരെ സമൂഹമാധ്യമങ്ങളിൽ മുസ്ലിമിനോട് ഏറ്റുമുട്ടുന്ന മുസ്തഫമാരെയും സൃഷ്ടിക്കാൻ കമ്മ്യൂണിസത്തിന്റെ തൊഴുത്തിൽ ഈ സമുദായത്തെ മൂക്കയറിട്ട് നിർത്താനാണ് ചിലരുടെശ്രമം.. പൂർവ്വസൂരികൾ കെട്ടിപ്പൊക്കിയ ചിറ തകർത്ത്, ഉമ്മത്ത് കമ്മ്യൂണിസത്തിലേക്ക് പരന്നൊഴുകുകയാവും ഈ കൂട്ടിക്കൊടുപ്പിന്റെ അനന്തരഫലം. തിരിച്ചറിവുണ്ടാകുമ്പോഴേക്ക്, ഇനിയൊരിക്കലും വീണ്ടെടുക്കാനാവാത്ത വിധം സമൂഹം ഛിദ്രമായിട്ടുണ്ടാവും.. സന്നിഗ്ധ ഘട്ടത്തിൽ നോക്കിനിന്നവരെന്ന് ചരിത്രം പഴിപറയാതിരിക്കാൻ മൗനം വെടിഞ്ഞേ മതിയാവൂ.....
-
അഡ്വ. മുഹമ്മദ് ഫൈസി ഓണമ്പിള്ളി അടിസ്ഥാനപരമായി കമ്മ്യൂണിസത്തിന്റെ ആശയാടിത്തറ മതനിരാസത്തിലൂന്നിയ ഭൗതിക വാദമാണ്. ഒരു യഥാർത്ഥ കമ്മ്യൂണിസ്റ്റ് ആയിത്തീരുന്നത് അപ്പോഴാണ്. പാർട്ടിക്ക് വോട്ട് ചെയ്യുന്നവരും അനുഭാവികളുമുണ്ടാവാം. പക്ഷേ, പാർട്ടിക്കാരൻ കമ്മ്യൂണിസ്റ്റാകണം. പു.ക. സ പോലെയുള്ള സർഗാത്മക പ്രവർത്തനങ്ങളിലൂടെയും എസ്.എഫ്.ഐ പോലെയുള്ള വിദ്യാർത്ഥി പ്രസ്ഥാനങ്ങളിലൂടെയും വളരെ തന്ത്രപരമായി ആ ദൗത്യം നിർവഹിക്കപ്പെടുന്നുണ്ട്. കാമ്പസിൽ പോയവർക്കൊക്കെ അത് മനസ്സിലാവും. നല്ല സുന്നീ കുടുംബങ്ങളിൽ പെട്ടവർ പാർട്ടി അനുഭാവികളായി പിന്നീട് അവരുടെ തലമുറകളിലെ ചെറുപ്പക്കാർ ചിന്ത കക്ഷത്തിൽ വച്ച് നടന്ന് മതത്തെ തള്ളി പറയുന്ന കാഴ്ച കണ്ടിട്ടുണ്ട്. മറ്റു പാർട്ടികളിൽ പലതരം വിശ്വാസികളുണ്ടാവാം. നെഹ്രു ഒരു സന്ദേഹവാദിയും ഗാന്ധിജി ഒരു ഹിന്ദു വൈഷ്ണവ വിശ്വാസിയുമായിരുന്ന പോലെ . പക്ഷേ, പാർട്ടിയുടെ ലക്ഷ്യങ്ങളിലൊന്ന് വൈരുദ്ധ്യാത്മക ഭൗതിക വാദ പ്രചരണമാണെന്ന് മാനിഫെസ്റ്റോ എഴുതി വച്ച പാർട്ടി കമ്മ്യൂണിസ്റ്റ് പാർട്ടി തന്നെയാണ്. ആ നിഷ്കളങ്കമായ സത്യം പറഞ്ഞതിന് ശുദ്ധ കമ്മ്യൂണിസ്റ്റായ അനിൽ കുമാറിനെ എന്തിന് ക്രുശിക്കണം. ചാനലുകളിൽ പാർട്ടിയുടെ നിലപാടുകളറിയിക്കുന്ന അദ്ദേഹം ഒരു സത്യം ആത്മാർത്ഥമായി പറഞ്ഞതല്ലേ? https://m.facebook.com/story.php?story_fbid=pfbid02nKb9ZypKaTrZm6tasRWVvaCc2NmVVS6hYFEdU4PhNPXe2FN5gdJdgukqfaaCL3pRl&id=100046800978506&mibextid=Nif5oz
-
അബ്ദുൽ ഹമീദ് ഫൈസി അമ്പലക്കടവ് സി.പി.എമ്മും മുസ്ലിം പെൺകുട്ടികളുടെ തട്ടവും ************* കമ്മ്യൂണിസം മതനിരാസത്തിൽ അധിഷ്ഠിതമാണ്. ഒരു യഥാർത്ഥ കമ്മ്യൂണിസ്റ്റുകാരന് ഒരിക്കലും മതവിശ്വാസിയാവാൻ കഴിയില്ല. ലോകത്ത് എവിടെയായാലും അവർ അവരുടെ ആശയം പ്രചരിപ്പിക്കും. ക്യാമ്പസുകളിൽ എസ്.എഫ്.ഐ മുസ്ലിം വിദ്യാർത്ഥികളെ ലിബറലിസത്തിലേക്കും മതനിഷേധത്തിലേക്കും നയിക്കുന്നത് അതിൻറെ ഭാഗമാണ്. തട്ടമിട്ട മുസ്ലിം പെൺകുട്ടികളെ കൊണ്ട് മലപ്പുറത്ത് ഫ്ലാഷ് മോബ് കളിപ്പിച്ചതും മുസ്ലിം പെൺകുട്ടികളുടെ തട്ടം ഒഴിവാക്കാൻ സി.പി.എം പ്രവർത്തിച്ചു എന്ന് പാർട്ടി നേതാവ് അനിൽകുമാർ ഇന്നലെ തിരുവനന്തപുരം പറഞ്ഞതും തമ്മിൽ വൈരുദ്ധ്യമില്ല. പരസ്യമായി മലപ്പുറത്ത് നടു റോഡിൽ ഇറങ്ങി മുസ്ലിം പെൺകുട്ടികൾ ഫ്ലാഷ് മോബ് കളിക്കുന്നുവെന്ന് അറിയിക്കണമെങ്കിൽ ഇസ്ലാമിക ചിഹ്നമായ തട്ടം അവർ ഇടണമല്ലോ. ലിബറലിസത്തിലേക്ക് മുസ്ലിം പെൺകുട്ടികളെ ഞങ്ങൾക്ക് കൊണ്ടുപോകാൻ കഴിയുന്നുവെന്ന് സമൂഹത്തെ ബോധ്യപ്പെടുത്തണമെങ്കിൽ അവരുടെ തട്ടമഴിപ്പിച്ചു എന്ന് പറയുകയും വേണം. കമ്മ്യൂണിസ്റ്റ് പ്രത്യയശാസ്ത്രത്തിന്റെ കുഴപ്പമാണിത്. കമ്മ്യൂണിസ്റ്റ് ആശയം ഉൾക്കൊണ്ടവർ മത നിഷേധികളാണ്. സൈദ്ധാന്തികമായി കമ്മ്യൂണിസം പഠിക്കുകയും പാർട്ടിയിൽ ഉയർന്നു പോവുകയും ചെയ്യുന്നവർ ക്രമേണ മതത്തിൽ നിന്ന് പുറത്ത് പോകേണ്ടിവരും. കമ്മ്യൂണിസ്റ്റ് ആശയം ഉൾക്കൊണ്ട് മതത്തിൽ നിന്ന് പുറത്തുപോയി മരണപ്പെട്ടവരെ ഈ ലേഖകന് നേരിട്ടറിയാം. സാന്ദർഭികമായി പറയട്ടെ ഈ വിനീതന്റെ ഒരു വീഡിയോയുടെ ഒരു കഷണം മുറിച്ചെടുത്ത് കമ്മ്യൂണിസത്തെ വെള്ളപൂശി എന്ന് പ്രചരിപ്പിക്കുന്നവരോട് സവിനയം ഉണർത്തട്ടെ ആ വീഡിയോ താഴെയുണ്ട്. അതൊന്നു കാണുക അതിൽ എവിടെയാണ് കുഴപ്പമെന്ന് നിങ്ങൾക്ക് ചൂണ്ടിക്കാണിക്കാം. അതിലൊരു പരാമർശം ഉണ്ട്. കേരളത്തിലെ കമ്മ്യൂണിസ്‌റ്റ്പാർട്ടികൾ ഇവിടത്തെ മതേതര ജനാധിപത്യ ഗവർമെന്റുമായി സഹകരിച്ച് കൊണ്ട് തെരഞ്ഞെടുപ്പിൽ മൽസരിച്ച് ഒരു മതേതര പാർട്ടിയെ പോലെ പ്രവർത്തിക്കുകയാണ് ചെയ്യുന്നത്. അത് വാസ്തവമല്ലേ.? പ്രത്യുത ചൈനയെ പോലെയോ ക്യൂബയെ പോലെയോ കമ്മ്യൂണിസ്റ്റ് വ്യവസ്ഥിതി രാഷ്ട്രത്തിൽ നടപ്പിലാക്കുകയല്ലല്ലോ അവരിവിടെ ചെയ്യുന്നത്. നിലവിലുള്ള ഇന്ത്യൻ വ്യവസ്ഥിതിയിൽ അതവർക്ക് സാധ്യവുമല്ല. കമ്മ്യൂണിസം നടപ്പാക്കുകയാണ് ഇവിടെ കമ്മ്യൂണിസ്റ്റുകൾ ചെയ്യുന്നതെങ്കിൽ അവരോട് നാം എങ്ങനെ മുന്നണി ബന്ധമുണ്ടാക്കും.? അവർ നേതൃത്വം നൽകുന്ന ഗവൺമെന്റിനോട് മുസ്ലീങ്ങൾ എങ്ങനെ സഹകരിക്കും? കടുത്ത തെറ്റാകില്ലേ അത്? മറ്റൊരു കാര്യം , കമ്മ്യൂണിസ്റ്റ് പാർട്ടിയിൽ പ്രവർത്തിക്കുന്നവർ മുഴുവൻ മതനിഷേധികളാണെന്ന് പറയാൻ പറ്റില്ല. വിവിധ താൽപര്യങ്ങൾക്ക് വേണ്ടി ആ പാർട്ടിയിൽ ഒരു രാഷ്ട്രീയ പാർട്ടി എന്ന നിലയിൽ പ്രവർത്തിക്കുന്നവർ ഉണ്ടാകാം. അതേസമയം കമ്മ്യൂണിസം ഒരു മുസ്ലിം ഉൾക്കൊണ്ടാൽ അവൻ മതത്തിൽ നിന്ന് തന്നെ പുറത്തു പോകും. എൻറെ സഹപ്രവർത്തകൻ സമദ് പൂക്കോട്ടൂരും ഇക്കാര്യം വ്യക്തമായി പറയുന്നു. ‘പാർട്ടിയിൽ പ്രവർത്തിക്കുന്നവർ മുഴുവൻ മതവിശ്വാസികളെല്ലെന്ന് പറയുന്നില്ല അരിക്കും തുണിക്കും പണിക്കും വേണ്ടി കമ്മ്യൂണിസ്റ്റായ ആളുകളുണ്ട്. മുസ്ലിം ലീഗിൽ സ്ഥാനം കിട്ടാത്തതിന്റെ പേരിലോ അവഗണന നേരിട്ടതിനാലോ മാർക്സിസ്റ്റ് പാർട്ടിയിലേക്ക് പോയവരുണ്ട്. അവർ മതവിശ്വാസികൾ അല്ലെന്ന് പറയാൻ കഴിയില്ല.’ മതപരമായി ഇങ്ങനെ പറയാനേ പറ്റൂ. ഒരു കാര്യം ഉറപ്പ്. ജനാധിപത്യ വ്യവസ്ഥിതിയിൽ പങ്കാളികളാകുന്നവരോടൊപ്പം അവർ അവരുടെ ഹിഡൻ അജണ്ട നടപ്പാക്കാൻ ശ്രമിക്കുന്നു എന്നതാണ് അനിൽകുമാറിന്റെ പ്രസ്താവന വ്യക്തമാക്കുന്നത്. നാം അതീവ ജാഗ്രത പാലിക്കേണ്ടിയിരിക്കുന്നു.
Leave A Comment